އިނގިރޭސި ޕްރިމިއާ ލީގުގައި ރޭ އާސެނަލް އިން ޓޮޓެންހަމް ހޮޓްސްޕާ 2-0 އިން ބަލިކޮށް އެއް ވަނައިގައި އަށް ޕޮއިންޓަށް ލީޑެއް ލިބިއްޖެއެވެ.
ޓޮޓެންހަމްގެ ދަނޑުގައި ކުޅުނު މި މެޗުގައި އާސެނަލްގެ ދެ ގޯލު ވެސް ޖެހީ ފުރަތަމަ ހާފުގައެވެ. މެޗުގެ 14 ވަނަ މިނިޓުގައި ލީޑު ހޯދީ ބުކަޔޯ ސަކާ ހުރަސް ކޮށްލި ބޯޅަ ދިފާއު ކުރަން އުޅުމުގެ ތެރޭގައި ގޯލްކީޕަރު ހޫގޯ ލޮރިސް އަތުން ބައިކޮޅަށް ވަން ގޯލަކުންނެވެ. އަދި 36 ވަނަ މިނިޓުގައި ދެ ވަނަ ގޯލު ކެޕްޓަން މާޓިން އޮޑެގާޑް ޖެހީ އޭރިއާ ބޭރުން ފޮނުވާލި ބާރު ހަމަލާ ގޯލަށް ފޮނުވާލައިގެންނެވެ.
ޓޮޓެންހަމުން ލަނޑެއް ޖެހޭތޯ ކުރި މަސައްކަތް ހުއްޓުވީ ކީޕަރު ރަމްސްޑޭލް އެވެ. ރަމްސްޑޭލް ވަނީ ޓޮޓެންހަމްގެ ހެރީ ކޭން އާއި ސެސެންނޯން ޖެހި ޝޮޓްތައް މަތަކޮށްފައެވެ. އާސެނަލުން މި ވަނީ 2013-2014 ވަަނަ ސީޒަނުގެ ފަހުން، ލީގު ސީޒަނެއްގައި ޓޮޓެންހަމް އަތުން ދެ ފަހަރު މޮޅުވެފައެވެ.
އާސެނަލްގެ ކޯޗު މިކޭލް އާޓެޓާ ބުނީ ޓޮޓެންހަމް ދަނޑުގައި މި ހޯދުނު މޮޅުގައި އޭނާ އެންމެ ހިތްހަމަޖެހުނު ކަަމަކީ ޓީމުގެ ސްޓައިލް ބަދަލުނުކޮށް ކޮންފިޑެންސާ އެކު މެޗު ކޮންޓްރޯލް ކޮށްގެން މޮޅުވުން ކަމަށެވެ.
މިމޮޅާއެކު އާސެނަލް އެއްވަނާގައި އޮތީ 18 މެޗުން 47 ޕޮއިންޓާއެކުއެވެ. ސިޓީއަށް ލިބެނީ 39 ޕޮއިންޓާއެކުއެވެ. ތިންވަނާގައި އޮތީ 1-0 ން ފުލަމް ބަލިކުރި ނިއުކާސަލް ޔުނައިޓެޑެވެ. އެއީ 38 ޕޮއިންޓާއެކުއެވެ. ހަމަ އެއަދަދަށް ޕޮއިންޓް ހޯދައިގެން މެންޗެސްޓަރ ޔުނައިޓެޑް އޮތީ ހަތަރު ވަނާގައެވެ.
