ރާއްޖޭގައި ފުޅާ ދާއިރާއެއްގައި ސުޕަރމާކެޓް ވިޔަފާރި ކުރަމުންދާ ރެޑްވޭވް ސުޕަރމާކެޓް ޗެއިންގެ 13ވަނަ އައުޓުލެޓް މިއަދު މާލޭގައި ހުޅިވައިފިއެވެ. ރެޑްވޭވުން މުޅިން އަލަށް ހުޅުވި މި ސުޕަރމާރކެޓް ހުޅުވާފައިވަނީ މަޖީދީ މަގުގައި ހުންނަ، ހެންވޭރު އެސްޓީއޯ ފާމަސީގެ ކުރިމަތީގައެވެ.
ދިވެހިންގެ ތެރޭގައި މަޝްހޫރު ރެޑްވޭވް ސުޕަރމާކެޓް ޗެއިންގެ ގިނަ ފިހާރަތަކެއް ހުޅުމާލެއާއި މާލޭގައި ހުންނައިރު، މާލޭގައި މިހާރު މި ޗެއިންގެ 11 ފިހާރައެއް ހުރެއެވެ. ހުޅުމާލޭގައި ހުންނަނީ 2 ފިހާރައެކެވެ. އޭގެ ތެރޭގައި ހިމެނެނީ ހުޅުމާލޭގައި ހުންނަ އެންމެ ބޮޑު އެއް ސުޕަރ މާރކެޓް ކަމުގައިވާ "ރެޑްވޭވް މެގަމޯލް" އާއި އަދި އޭގެ އިތުރުން ސުޕަރ މާރކެޓް އެކެވެ.
މާލޭގައި މުޅިން އަލަށް، "ރެޑްވޭވް އެކްސްޕްރެސް"ގެ ނަމުގައި މި ސުޕަރމާރކެޓް ހުޅުވައި ދެއްވީ ކުންފުނީގެ ޗެއަރމަން، ރައްޔިތުންގެ މަޖިލިހުގެ އޭދަފުށީ ދާއިރޭގެ މެމްބަރު އަހުމަދު ސަލީމްއެވެ. އޭނާ މިފިހާރަ ހުޅުއްވައި ދެއްވީ މިކަމަށްޓަކާ މިއަދު ހަވީރު 4:30 ގައި ބޭއްވުނު ޚާއްސަ ރަސްމިއްޔާތެއްގައެވެ.
ހެންވޭރުގައި ހުންނަ އެސްޓީއޯ ފާމަސީ ކުރިމަތީގައި ހުޅުވި ރެޑްވޭވްގެ މި އާ ފިހާރައިން ގޭތެރެއަށް ބޭނުންވާ ހުރިހާ ބާވަތެއްގެ ތަކެއްޗާއި އަދި ތަރުކާރީގެ ބާވަތްތައްވެސް ހެޔޮ އަގެއްގައި ލިބެން ހުރެއެވެ.
މި ފިހާރަ ހުޅުވުމަށް މިއަދު ހަވީރު ބޭއްވި ރަސްމިއްޔާތުގައި ވާހަކަ ދައްކަވަމުން ރެޑްވޭވް ކުންފުނީގެ ޗެއަރމަން، ރައްޔިތުންގެ މަޖިލިހުގެ އޭދަފުށީ ދާއިރާގެ މެމްބަރު އަހުމަދު ސަލީމް ވިދާޅުވީ ދާދިފަހުން ފަހުން ސަރުކާރުން ޖީއެސްޓީ ބޮޑު ކޮށްފައިވިނަމަވެސް، އެ ކުންފުނީގެ ސުޕަރމާރކެޓް ތަކުން އާންމުންނަށް ބޭނުންވާ ތަކެތި ވިއްކަމުން ދަނީ ބޮޑުތަނުން އަގު ހެޔޮކޮށް ކަމުގައެވެ.
މިގޮތުން ސަލީމު ވިދާޅުވީ އެސްޓީއޯ ފަދަ، ހެޔޮ އަގުގައި މުދާ ރާއްޖެއަށް އެތެރެކޮށް، އަދި މުދާ ގުދަން ކުރުމަށްވެސް ކުޑަ ޚަރަދެއް ކުރާންޖެހޭ އެސްޓީއޯފަދަ ކުންފުނިތަކަށްވުރެ ރެޑްވޭވްގެ ފިހާރަތަކުން އާންމުންނަށް ބޭނުންވާ ތަކެތި ލިބެން ހުންނާނީ އަގު ހެޔޮކޮށް ކަމުގައެވެ.
މިސާލަކަށް މައިލޯ 1.5 ދަޅެއްގެ އަގަކީ 255ރ. އަޅުގަނޑުމެން މި ވިއްކަނީ 205ރ. އަށް. އަޅުގަނޑުމެން މި ބަލަނީ އެއް އަގެއްގައި ހާއްސަކޮށް ކާބޯތަކެތީގެ އަގު އެއް އަގެއްގައި ހިފެހެއްޓޭތޯ. އަޅުގަނޑުމެންގެ ފައިދާ ކުޑަކޮށްފައި ވިޔަސް، ރައްޔިތުންނަށް ހިދުމަތް ކުރެވޭތޯ އަޅުގަނޑުގެ މައިގަނޑު މަސައްކަތަކީ.
ސަލީމް ވިދާޅުވިއެވެ.
އަ ފިހާރަ ހުޅުވުމަށް ބޭއްވި ރަސްމިއްޔާތުގައި ވާހަކަ ދައްކަވަމުން ސަލީމް ވިދާޅުވީ، ހުޅުމާލޭގެ ދެވަނަ ފިޔަވަހީގައިވެސް ރެޑްވޭވްގެ ފިހާރައެއް ހުޅުވުމަކީ އެސަރަހައްދުގައި ދިރިއުޅޭ ގިނަބަޔަކު އެދެމުންދާ ކަމެއް ކަމުގައި ވިނަމަވެސް އެފުރުސަތު ރެޑްވޭވަށް ދީފައި ނުވާކަމުގައެވެ. މިގޮތުން އޭނާ ވިދާޅުވީ އެ ސަރަހައްދުގައި ފިހާރަ ހިންގުމަށް މިހާތަނަށް ހުޅުވާލާފައިވާ ހުރިހާ ފުރުސަތެއްގައިވެސް އެކުންފުނިން ބީލަން ހުށަހަޅާފައި ވާކަމަށެވެ.
އަދި ބީލަން ހުށަހެޅީ ބޮޑު އަގުގައި ނަމަވެސް، މިހާތަނަށް ރެޑްވޭވަށް އެފުރުސަތު ދީފައި ނުވާކަމުގައި ސަލީމް ވިދާޅުވިއެވެ.
ރެޑްވޭވްއިން މިއަދު ހުޅުވި ފިހާރަ ހުންނަނީ ދެ ފަންގި ފިލާއަށެވެ. މިގޮތުން އެންމެ ތިރީ ފަންގިފިލާ އާންމު ކާބޯތަކެއްޗަށް ޚާއްސަ ކޮށްފައިވާއިރު، ފުރަތަމަ ފަންގިފިލާ ޚާއްސަ ކޮށްފައިވަނީ ބަދިގެއާއި ގެއަށް ބޭނުންވާ ސާމާނުގެ އިތުރުން ކުޑަ ކުދިންނާއި ބޮޑެތިމީހުންގެ ހެދުންތައް ވިއްކުމަށެވެ.
މިއަދު ސަލީމް ވިދާޅުވީ ރޯދަމަހަށް ތަކެތީގެ އަގު އިތުރަށް ހެޔޮ ކުރުމުގެ އިތުރުން، އެހެން އަހަރުތަކެކޭވެސް އެއްފަދައިން ރޯދައަށް ޚާއްސަ، ބޮޑެތި އިނާމްތައް ލިބޭ ޕްރޮމޯޝަންތައްވެސް ބާއްވާނެ ކަމުގައެވެ.
