މާލޭގެ ނީލަން ފިހާރަ ސިނާއީ ސަރަހައްދަށް ބަދަލުކުރުމަށް މާލޭ ސިޓީ ކައުންސިލުން މަސައްކަތް ކުރި ނަމަވެސް އެކަމަށް ސަރުކާރުން ހުއްދަ ނުދިންކަމަށް މާލޭގެ މޭޔަރު ޑރ.މުހައްމަދު މުއިއްޒު ވިދާޅުވެއްޖެއެވެ.
މޭޔަރ މިފަދައިން ވިދާޅުވީ މިއަދު ފަތިހުގެ ވަގުތެއްގައި ނީލަން ފިހާރައިގައި އަލިފާން ރޯވެ، އެ ތަން އަނދައިގެން ދިއުމާ ގުޅިގެން މީޑިއާއާ ވާހަކަ ދައްކަވަމުންނެވެ. މޭޔަރު ވިދާޅުވީ މީހުން ދިރިއުޅޭ ބާރު ބޮޑު ސަރަހައްދުން ނީލަން ފިހާރަ ނަގައި މާލޭގެ ސިނާއީ ސަރަހައްދަށް ބަދަލު ކުރުމަށް އެ ކައުންސިލުން 2021 ވަނަ އަހަރު ނިންމާފައިވާ ކަމަށެވެ.
"މާލެ އަދި ކޮންމެ ސިޓީއެއްގައި ވެސް ސެކަންޑް ހޭންޑް މާކެޓެއް އޮންނާނެ. އެއީ އޮންނަ އެއްޗެއް. އެކަން ކުރެވެން ވާނެ. އެކަމަކު މީހުން ތޮއްޖެހިފައި އޮންނަ ތަނަކު ނޫން ކުރާނީ. ރައްޔިތުންނަށް ބޭނުންވާ މި ކަހަލަ ކަންކަމުގައި ސަރުކާރުގެ އެއްބާރުލުން މުހިންމު،" މޭޔަރ މުއިއްޒުވިދާޅުވިއެވެ.
މޭޔަރު ވިދާޅުވީ ސިނާއީ ސަރަހައްދުގައި އެކަމަށް ހާއްސަ ސަރަހައްދެއް ކަނޑައަޅައި ވަކިން ރައްކާތެރި ގޮތަކަށް ތަރައްގީ ކުރުމަށް ފަހު، އެ ތަން އެ މީހުންނާ ހަވާލު ކުރަން ރާވާފައިވާ ކަމަށާއި ނަމަވެސް ސަރުކާރުން އެ ބިން ނުދިން ކަމަށެވެ.
އެގޮތުން މާލޭގައި މީހުން ދިރިއުޅޭ ސަރަހައްދުތަކުގައި ކޮންމެހެން ހުންނަން ނުޖެހޭ ތަންތަނުގައި ހިތާމަވެރި ހާދިސާތައް ހިނގަމުންދާ އަދަދު މިހާރު ގިނަ ކަމަށާއި އެ ކަންކަން ހައްލު ކުރުމަށް އިންޑަސްޓްރިއަލް ސަރަހައްދު ބޭނުން ކުރުން މުހިންމު ކަމަށް މޭޔަރު ވިދާޅުވިއެވެ.
މޭޔަރ ވިދާޅުވި ގޮތުގައި ނީލަން ފިހާރައިގައި ރޯވުމާ ގުޅިގެން މި ވަގުތަށް ދިމާވެފައިވާ މައްސަލައަކީ ކައުންސިލްގެ 200 މުވައްޒަފުން ވަންނާނެ ތަނެއް ނެތުމެވެ. އެކަމަށްޓަކައި ބައެއް މިނިސްޓްރީތަކާ މަޝްވަރާ ކޮށްފައިވާ ކަމަށާއި ނަމަވެސް އަދި ގޮތެއް ހަމަނުޖެހޭ ކަމަށް ވެސް މޭޔަރު ވިދާޅުވިއެވެ.
