ރައީސް ޔާމީން މިނިވަންކުރުމަށް ގޮވާލައި އިދިކޮޅު ފަރާތްތަކުން ރޭ މާލޭގައި ކުރިއަށް ގެންދިޔަ މުޒާހަރާގެ ތެރެއިން އުމުރުން ދުވަސްވީ އަންހެނަކު ހައްޔަރުކުރުމުގައި ފުލުހުންގެ ޕަބްލިކް އޯޑަރު އޮފިސަރުން އަމަލުކުރާ ގޮތާމެދު ކޮމިޝަނަރ އޮފް ޕޮލިސް މުޙައްމަދު ޙަމީދު ކަންބޮޑުވާކަން ހާމަކުރައްވައިފިއެވެ.
މިއަދު ކުރެއްވި ޓްވީޓެއްގައި ޙަމީދު ވިދާޅުވީ އެ އަންހެންމީހާ ހައްޔަރުކުރުމުގައި ފުލުހުން ޢަމަލުކުރި ގޮތާމެދު ކަންބޮޑުވާކަމަށާ، އެމައްސަލަ ބައްލަވާނެކަމެވެ.
A major investigation in to the recent incidences of fire in Male’ & atolls is now launched by @PoliceMv. We call for public support for it. Also, public order officers’ way of handling an elderly woman at the protest last night in Male’ is of concern. Will be looked in to.
— Mohamed Hameed (@M_Hameedh) January 9, 2023
ރައީސް ޔާމީންގެ މައްޗަށް ތުހުމަތު ކުރެވުނު ޚިޔާނާތުގެ މައްސަލަތަކެއް ސާބިތުވެ ދަށުކޯޓުން އެމަނިކުފާނު 11 އަހަރަށް ޖަލަށްލާން ޙުކުމްކުރުމާއެކު، އެޙުކުމަކީ ސަރުކާރުގެ ނުފޫޒުން ބޭއިންސާފުން ކޮށްފައި އޮތް "ޙަރާމް ޙުކުމެއް"ކަމަށް ބުނެ އިދިކޮޅު ފަރާތްތަކުން އަންނަނީ ސިލްސިލާ މުޒާހަރާތަކެއް ކުރަމުންނެވެ. މާލޭގެ މަގުތަކުގައި ކޮންމެ ރެއަކު އެމުޒާހަރާތައް ކުރަމުންދެއެވެ. އަދި އަތޮޅުތަކުގެ ބައެއް ރަށްރަށުގައި ބައެއް ރޭރޭގައާއި ސަރުކާރުގެ އިސް ބައެއް ބޭބޭފުޅުން އެރަށްރަށަށް ވަޑައިގަންނަވާ ވަގުތުތަކާ ދިމާކޮށް މިމުޒާހަރާތައް ބާއްވައެވެ.
މާލޭގައި ކޮންމެރެއަކު ކުރާ މުޒާހަރާތަކުން ކޮންމެރެއަކުވެސް ގިނަބަޔަކު ހައްޔަރުކުރެއެވެ. އެހެންނަމަވެސް 24 ގަޑިއިރުގެ ތެރޭގައި އޭގެތެރެއިން ގިނަބަޔަކު، ދޫކޮށްލައެވެ. ގިނަދުވަސްދުވަހު އެންމެންވެސް ދޫކޮށްލައެވެ. ރޭގެ މުޒާހަރާގައި ބައިވެރިވި ޢުމުރުން ދުވަސްވީ އަންހެނަކު ހައްޔަރުކުރި މަންޒަރު ފެންނަ ވީޑިއޯއެއް ސޯޝަލް މީޑިއާގައި މިހާރު ދަނީ ދައުރުވަމުްނނެވެ. މި ވިޑިއޯގައި އަންހެންމީހާ ފަހައި ދުވެ އޭނާ ގަދަކަމުން އަތުލައިގަނެއެވެ. އަދި އަތް އަނބުރާލައި ޙާލަތާ ނުބައްދަލު ބާރުގެ ބޭނުން ފުލުހުން ކޮށްފައިވާކަމަށް ގިނަބަޔަކު ދެކެއެވެ.
ޖަމިއްތަ އަކީ ވުމާންއެއް.👊🏼
ހިޔާލުފާޅު ކުރުމާއި އެއްވެ އުޅުމުގެ މިނިވަންކަމަށް މިހާ ހަޔާތްކުޑަކޮށް އަރާގަތީމަވެސް ދޭންވީ 2ވަނަ ދައުރެއްތަ؟@ShimranAb @M_Hameedh ފުލުން ލައްވައި ތިކުރައްވަނީ ހުތުރު ކަންކަން އިގޭތޯ.ދިވެހި ރައްޔިތުން ތިބޭފުޅުން ވެރިކަމުގަ އިތުރަށް ނުބައިތިއްބާނެ.1/2 pic.twitter.com/ERUQcEixXs— Ibrahim Shujau (@IbrahimShujaau) January 8, 2023
މި އަންހެންމީހާ ހައްޔަރުކުރި ގޮތާމެދު ސޯޝަލްމިޑިއާގައި ގިނަބަޔަކު އަންނަނީ ފުލުހުންނަށާއި ސަރުކާރަށް ވަރަށްބޮޑަށް ފާޑުކިޔަމުންނެވެ. އެގޮތުން އެވަރުގެ ދުވަސްވީ އަންހެނެއް ހައްރުކުރުމުގައި އެނޫން ގޮތެއް އޮންނަންޖެހޭނެކަމަށް ޢާންމުން ބުނެއެވެ. އަދި މިއީ ވަރަށް ހަޑިހުތު މަންޒަރެއްކަމަށާ، މިކަމާމެދު ފުލުހުން މަޢާފަށް އެދެންޖެހޭނެކަމަށްވެސް ބައެއް މީހުން ބުނެފައިވެއެވެ.
އަދި އެއްވެ އުޅުމާއި ޚިޔާލު ފާޅުކުރުމަކީ ޤާނޫނުއަސާސީން ރައްޔިތުންނަށް ލިބިދީފައިވާ އަަސާސީ ހައްޤެއްކަމަށާ، އެޙައްޤަށް ހުރަސް ނާޅާނެކަމަށް ސަރުކާރުން އެއްކޮޅުން ބުނާއިރު އަނެއްކޮޅުން މިފެންނަނަކީ ވަރަށް ހަޑިހުތުރުކޮށް އެއާ ދިމާ އިދިކޮޅަށް ފުލުހުން ޢަމަލުކުރާ މަންޒަރުކަމަށްވެސް ޢަންމުންގެ ބައެއް މީހުން ޚިޔާލު ފާޅުކޮށްފައިވެއެވެ.
