ބޮލިވުޑްގެ މަޝްހޫރު އެކްޓްރެސް ކަންގަނާ ރަނާވަތުގެ ކުރިއަށް އޮތް ފިލްމު "އިމަޖެންސީ" ގައި 10 މިނިޓްގެ ލަވައެއް ހިމެނޭނެކަން ކަށަވަރުކޮށް ދީފި އެވެ.
އިންސްޓްގާރްމް ގައި މި ލަވައާއި ބެހޭގޮތުން ވާހަކަ ދައްކަމުން ކަންގަނާ ބުނީ މީހުން ހީކުރަނީ "އިމަޖެންސީ" ގައި އެއްވެސް ލަވައެއް ނުހިމެނޭނެ ކަމަށް ކަމަށެވެ. ނަމަވަސް އޭނާ އާއި މިއުޒިކަށް ލޯބި ކުރާ މީހެއް ކަމަށާއި މި ފިލްމްގައި 5 ލަވަ ހިމެނޭ ކަމަށެވެ.
އިތުރަށް އޭނާ ބުނީ މި ފިލްމް އަކީ މިހާތަނަށް ފިލްމްއެއްގައި ހިމެނޭނެ އެންމެ ދިގު ލަވަ ހިމެނޭ ފިލްމް ކަމަށެވެ. އޭނާ މި ލަވަ ސިފަކޮށްފައި ވަނީ ފިލްމުގެ އިންޓަވަލްގެ ކުރިން ބެލުންތެރިންނަށް ގެނެސްދޭ "މިއުޒިކަލް ޑްރާމާއެއް" ގެ ގޮތުގަ އެވެ.
މި ފިލްމަކީ އިންޑިއާގެ ބޮޑުވަޒީރުކަން މިހާތަނަށް ކުރެއްވި ހަމައެކަނި އަންހެން ބޭފުޅާ އިންދިރާ ގާންދީގެ ވެރިކަމުގައި ސިޔާސީ ގޮތުން އުފެދުނު ހަލަބޮލިކަމާއި އިއުލާންކުރި އިމަޖެންސީއާ ހެދި ދިމާވި ކަންކަމަށް ބިނާކޮށް އުފައްދާ ފިލްމެކެވެ.
"އިމަޖެންސީ" އަކީ ކަންގަނާގެ ޕްރޮޑަކްޝަން ހައުސް، މަނިކަރްނިކާގެ ދަށުން އޭނާ ޕްރޮޑިއުސްކޮށް އަދި ޑައިރެކްޓުވެސް ކުރާ ފިލްމެކެވެ. މިއީ 4 ފަހަރަށް ނެޝެނަލް އެވޯޑް ހޯދައިފައިވާ ބަތަލާގެ ދެވަނަ ޑައިރެކްޝަނަށެވެ.
