އެމްޑީޕީގެ ރިޔާސީ ޕްރައިމަރީގައި ކެމްޕެއިން ކުރެއްވުމަށް ރައީސް އިބްރާހިމް މުހައްމަދު ސޯލިހް ރ.މާކުރަތަށް ވަޑައިގެންފިއެވެ.
ރ.އަތޮޅު އަލިފުށީފައި ބައިނަލްއަޤުވާމީ ނުކުޅެދުންތެރިކަން ހުންނަ މީހުންގެ ދުވަހާއި ގުޅިގެން ބޭއްވި ޖަލްސާގައި ބައިވެރިވެވަޑައިގެންނެވުމަށްފަހު ރައީސް ވަނީ ކެމްޕެއިން ދަތުރުތައް މިއަދު ފަށާފައެވެ. އެގޮތުން އެންމެ ފުރަތަމަ މަންޒިލަކީ ރ.މުކަރެތެވެ. މާކުރަތުން ރައީސް ޞާލިހަށް ހޫނު މަރުހަބާއެއް ކިޔާފައިވެއެވެ.
މި މަހުގެ 28 ގައި އޮންނަ އެމްޑީޕީގެ ޕްރައިމަރީގެ ފޯރި ގަދަވެފައިވާ އިރު، ދެ ބޭފުޅުން ވެސް ވަނީ ޕްރައިމަރީ ކާމިޔާބު ކުރައްވައި އެމްޑީޕީގެ ރިޔާސީ ޓިކެޓު ހޯއްދަވާނެ ކަމުގެ ޔަގީން ކަން ދެއްވައިފައެވެ. މި ކެމްޕެއިންގެ ދަށުން ނަޝީދު ވަނީ މީގެކުރިން އުތުރުގެ ބައެއް ރަށްރަށަށް ވަޑައިގަންނަވައިފައެވެ. މިއީ ރައީސް ސޯލިހް މި ކެމްޕެއިންގައި ރާއްޖޭގެ ރަށްތަކަށް ދަތުރުފުޅު ކުރައްވާ ފުރަތަމަ ފަހަރެވެ.
ރައީސް ސޯލިހް މި ކެމްޕެއިންގައި މިއަދު ފުރަތަމަ ވަޑައިގަންނަވާނެ ރަށަކީ ރ. މާކުރަތެވެ. އެ ރަށުގައި ތިބި އެމްޑީޕީގެ މެމްބަރުންނާ ބައްދަލު ކުރެއްވުމަށް ފަހު، އެމަނިކުފާނުގެ ދެވަނަ މަންޒިލަކީ ރ. އިންނަމާދޫއެވެ. އެ ރަށުގައި ތިބި އެމްޑީޕީގެ މެމްބަރުންނާ ރައީސް ބައްދަލު ކުރައްވާނެއެވެ. އެއަށް ފަހު، ރައީސް ވަޑައިގަންނަވާނީ ރ. މީދޫއަށެވެ. އެ ރަށުގައި ހާއްސަ ޖަލްސާއެއް އޮންނާނެއެވެ.
މީގެއިތުރުން ނަޝީދު ވެސް އއ. އަތޮޅާއި އދ. އަތޮޅާއި ފ. އަތޮޅާއި ދ. އަތޮޅުގެ ބައެއް ރަށްތަކަށް ކުރައްވާ ދަތުރުފުޅެއް މިއަދު ފައްޓަވާނެއެވެ. މި ރަށްތަކަށް އެމަނިކުފާނު ކުރައްވާ ދަތުރުފުޅު ނިންމަވާލައްވާނީ މާދަމާއެވެ.
އޭގެ އެއް ދުވަސް ފަހުން ނަޝީދު ވަޑައިގަންނަވާނީ ނ. އަތޮޅާއި ރ. އަތޮޅާއި ބ. އަތޮޅަށެވެ. އެ އަތޮޅުތަކަށް ވަޑައިގެންނެވުމަށް ފަހު، ލ. އަތޮޅާއި ތ. އަތޮޅާއި މ. އަތޮޅާއި ވ. އަތޮޅާއި ޅ. އަތޮޅާއި ކ. އަތޮޅާއި ގއ. އަދި ގދ. އަތޮޅަށް ވެސް ވަޑައިގަންނަވާނެއެވެ. އެމަނިކުފާނުގެ ދަތުރުފުޅު ނިންމަވާލައްވާނީ އައްޑޫ ސިޓީންނެވެ.
