މި ސީޒަނުގައި ތަފާތު މޮޅު ކުޅުމެއް ދައްކަމުން އަންނަ ނިއުކާސަލް ޔުނައިޓެޑުން އިނގިރޭސި ޕްރިމިއާ ލީގުގެ ތާވަލުގެ އެއްވަނައިގައި އޮތް އާސެނަލް ހިފަހައްޓައިފިއެވެ.
ލީގުގެ ގަދަ ހަތަރެއްގެ ޖާގައެއް ޔަޤީންކޮށް ޗެމްޕިއަންސް ލީގުގެ ޖާގައެއް ހޯދުމަށް ނިއުކާސަލް ކުރާ މަސައްކަތުގައި މިއީ މުހިއްމު ޕޮއިންޓެކެވެ. އަނެއްކޮޅުން ނިއުކާސަލްއިން އާސެނަލް އަތުން ޕޮއިންޓެއް މިހޯދީ ޗެމްޕިއަންސް ލީގުން ނިއުކާސަލްއަށް ޖާގަ ލިބިއްޖެނަމަ ދާދިފަހުން ސައޫދީ އަރަބިޔާގެ އަލް ނަސްރަށް ބަދަލުވި ރޮނަލްޑޯއަށް އެޓީމަށް ކުޅުމުގެ ފުރުޞަތު ލިބޭ މާއްދާއެއް އޮތްކަމަށް ރިޕޯޓުތައް ބުނަމުން ދަނިކޮށެވެ.
އާސެނަލްގެ އަމިއްލަ ދަނޑުގައި ކުޅުނު މެޗު އެއްވަރުވީ 0-0 ގެ ނަތީޖާއިންނެވެ. ރޭ ކުޅުނު މެޗުގައި ގޯލެއް ފެނިގެން ގޮސްފައި ނުވާއިރު މި މެޗުގައި ގޯލެއް ކާމިޔާބު ކުރަން ރަނގަޅު ފުރުސަތުތަކެއް އާސެނަލަށް ލިބިފައިވެއެވެ. އެގޮތުން މާޓިނެއްލީ ބޮލުން ފޮނުވާލި ހަމަލާއެއް ގޯލުގެ ކުޑަތަންކޮޅެއް ބޭރުން ދިޔައިރު ނިއުކާސަލްގެ ޕެނަލްޓީއޭރިއާ ތެރޭ ހުރެ އެޑީ އެންކެޓިއާ ފޮނުވާލި ބާރު ހަމަލާ ދިފާއުކުރީ ނިއުކާސަލްގެ ގޯލްކީޕަރު ނިކް ޕޯޕްއެވެ.
މެޗުގައި ގިނަވަގުތު ބޯޅަ ހިފަހައްޓައިގެން ކުޅުނީ އާސެނަލްއިންނެވެ. އަދި ގިނަ ހަމަލާތަކެއް އުފައްދައި، އެޓޭކިންގް ގޭމެއް ކުޅުނީ ވެސް އެ ޓީމެވެ. ޖުމްލަ 17 ހަމަލާއެއް އާސެނަލްއިން ނިއުކާސަލްގެ ގޯލާ ދިމާލަށް ފޮނުވާލިއިރު، ނިއުކާސަލްގެ ކުޅުންތެރިންނަށް ފޮނުވާލެވުނީ އަށް ހަމަލާއެކެވެ. މެޗު ނިމެން މިނެޓަކަށްވެފައި ވަނިކޮށް އާސެނަލްގެ ބުކާޔޯ ސަކާއަށް ޓީމު މޮޅުކޮށްދިނުމުގެ ފުރުސަތު ލިބުނުނަމަވެސް، އޭނާ ފޮނުވާލި ހަމަލާ ދިޔައީ ބޭރަށެވެ.
ނިއުކާސަލްއިން ލީގު ހޯދުމުގެ ރޭހުގައި އެ ޓީމްގެ ސީރިއަސްކަން ދެއްކީ އާސެނަލްގެ ދަނޑުގައި އެ ޓީމް ލަނޑެއް ޖެހިޔަނުދީ ހިފަހައްޓައިގެން ހޯދި ޕޮއިންޓާއެކުއެވެ. ނިއުކާސަލް އޮތީ ލީގު ތާވަލްގައި ތިންވަނާގައެވެ. އެއީ 35 ޕޮއިންޓާއެކުއެވެ. އެއްވަނާގައި އޮތް އާސެނަލްއާ ދެމެދު އޮތީ ނުވަ ޕޮއިންޓްގެ ފަރަގެކެވެ. އާސެނަލް އެއްވަނާގައި އޮތީ 44 ޕޮއިންޓާއެކުއެވެ. ދެވަނާގައި މެންޗެސްޓަރ ސިޓީ އޮތީ 36 ޕޮއިންޓާއެކުއެވެ.
