ހުޅުމާލެ ޑިވެލޮޕްމަންޓް ކޯޕަރޭޝަން (އެޗްޑީސީ)އަށް، ކުރީގެ ރައީސް ޔާމިންގެ ވެރިކަމުގައި 131 މުވައްޒަފަކު އުސޫލާއި ޚިލާފަށް ވައްދާފައިވާކަމަށް އޮޑިޓް ރިޕޯޓުގައި ބުނެފިއެވެ.

ކުރީ ސަރުކާރުގެ 2018ވަނަ އަަހަރުގެ އެޗްޑީސީއާއި ގުޅުންހުރި ގިނަ މައްސަލަތަކެއް ފާހަގަ ކޮށް، އޮޑިޓަރ ޖެނެރަލް ނެއްރުއްވާފައިވާ އޮޑިޓް ރިޕޯޓުގައި ހާމަ ކޮށްފައިވާ ގޮތުގައި، 2018ވަނަ އަހަރުގެ ރިޔާސީ އިންތިޚާބާއި ދިމާކޮށް، އާންމުކޮށް އިއުލާން ކުރުމަކާ ނުލާ، އަދި އެ ކުންފުންޏަށް މުވައްޒަފުން ހޯދުމަށް އާންމުކޮށް އަމަލް ކުރަމުންދިޔަ އުސޫލާވެސް ޚިލާފަށް، ކުއްލިއަކަށް ގިނަ އަދަދެއްގެ މުވައްޒަފުން ވައްދާފައި ވެއެވެ.

އަދި މި މުވައްޒަފުން އެ ކުންފުންޏަށް ނަގާފައިވަނީ، ކުންފުނީގެ ބޯޑުން ފާސްކޮށްފައިވާ އުސޫލުތަކާވެސް ޚިލާފަށްކަން ހާމަ ކުރަމުން އޮޑިޓް ރިޕޯޓުގައި ބުނެފައިވަނީ، ކުންފުނިން ވަޒީފާ ދޭ މުވައްޒަފުންގެ ބެކްގްރައުންޑް ޗެކް ހެދުމަކީ، ވަޒީފާ ދިނުމުގެ ކުރިން ކުންފުނީގެ މެނޭންމަންޓުން ފުރިހަމަ ކުރާންޖެހޭ ޝަރުތެއްގެ ގޮތުގައި މުވައްޒަފުންގެ އަތްމަތީ ފޮތުގައި ބަޔާން ކޮށްފައި އޮތްނަމަވެސް، ގިނަ އަދަދެއްގެ މިމުވައްޒަފުންނަށް ވަޒިފާ ދީފައިވަނީ ބެކްގްރައުންޑް ޗެކް ހެދުމަކާވެސް ނުލާ ކަމުގައެވެ.

މިގޮތުން، ރިޔާސީ އިންތިޚާބާއި ވަރަށް ގާތްވެފައި ވަނިކޮށް ކުންފުންޏަށް ވައްދާފައިވާ މި މުވައްޒަފުންގެ ތެރެއިން 116 މުވައްޒަފެއްގެ ތައުލީމީ ސެޓްފިކެޓް އެކުންފުންޏަށް ހުށަހަޅާފައި ނުވާއިރު، 81 މުވައްޒަފެއްގެ ވަޒީފާއަށް އެދޭ ފޯމާއި ވަނަވަރުވެސް ހުށަހަޅާގައި ނުވާކަމަށް އޮޑިޓް ރިޕޯޓުގައި ބުނެފައި ވެއެވެ. އަދި މުވައްޒަފުންގެ ވަޒީފާއަށް ވެއްދުމަށްފަހުވެސް، ވަޒިފާ ދިނުމުގެ ކުރިން ހުށަހަޅާންޖެހޭ މި ލިޔެކިޔުންތައް ހޯދާ އެ ކުންފުނިން ފައިލް ކޮށްފައި ނުވާކަންވެސް އޮޑިޓް ރިޕޯޓުގައި ފާހަގަ ކޮށްފައި ވެއެވެ.

އޭގެ އިތުރުން އޮޑިޓް ރިޕޯޓުގައި ފާހަގަ ކޮށްފައިވާ ގޮތުގައި މުވައްޒަފުން ވަޒީފާއަށް ވެއްދުމުގެ އިންޓަވިއު ޕްރެސެސްއެއް ކުރިޔަށް ގެންގޮސްފައި ނުވާއިރު، މުވައްޒަފުންގެ ފެންވަރު ވަޒަންކޮށް މާރކްސްދޭނެ މިންގަޑުތަކެއްވެސް އެޗްޑީސީން އެކުލަވާލާފައެއް ނުވެއެވެ.

2017 އިން 2018 އެޗްޑީސީން ކޮށްފައިވާ މަސައްކަތައް އޮޑިޓް ކުރުމަށްފަހު އޮޑިޓަރ ޖެނެރަލް ނެރުއްވާފައިވާ އޮޑިޓް ރިޕޯޓުގައި މީގެ އިތުރުންވެސް، އެކުންފުނިން ކޮރަޕްޝަނަަށް މަގުފަހި ވާގޮތަށް ކޮށްފައިވާ ގިނަ ކަންތަކައްތަކެއް ފާހަގަ ކޮށްފައި ވެއެވެ.

އޭގެ ތެރޭގައި ހިމެނޭ އެއް މަސައްކަތަކީ، ޕްރޮކިއުމަންޓް އުސޫލާއި ޚިލާފަށް، ހުޅުމާލޭގައި ވޯޓަރ ތީމް ޕާރކެއް ހެދުމަށް ދޫކޮށްފައިވާ ބިން ސާފުކުރުމުގެ މަސައްކަތް ހަވާލު ކުރި މައްސަލައެވެ. މިގޮތުން އޮޑިޓް ރިޕޯޓުގައި ފާހަގަ ކޮށްފައިވާ ގޮތުގައި، މިމަސައްކަތް ޕްލޭން ކުރެވި ކުރިޔަށް ގޮސްފައިވާގޮތް އެކުންފުނިން ބަލަހައްޓާފައި ނުވާއިރު، މަސައްކަތް ހަވާލުކުރި ކުންފުނިން މުއްދަތަށް މަސައްކަތް ނިންމާފައެއްވެސް ނުއެވެ.

އަދި، މި މަސައްކަތުގެ މުއްދަތު އިތުރުކޮށް، އެޗްޑީސީން، މަސަކަތް ހަވާލުކުރި ކުންފުންޏަށް އިތުރަށް 6 މިލިއަން ރުފިޔާ ދީފައިވާކަމަށްވެސް އޮޑިޓް ރިޕޯޓުގައި ބުނެފައި ވެއެވެ.