ކުރިސްޓިއަނުންގެ ކުރީގެ ޕޯޕު، ޕޯޕު އެމެރިޓަސް ބެނެޑިކްޓް XVI އުމުރުން 95 އަހަރުގައި މަރުވެއްޖެއެވެ. އޭނާ މަރުވެއްޖެކަން އިއުލާން ކޮށްފައިވަނީ ކުރިސްޓިއަން ދީނުގެ މައި ފައްޅި ކަމުގައިވާ ވެޓިކަން އިންނެވެ.

ޕޯޕު ބެނެޑިކްޓް މަރުވެފައިވާކަން ވެޓިކަންއިން އިއުލާން ކޮށްފައި މިވަނީ، އޭނާގެ ސިއްޙީ ހާލު ވަރަށް ބޮޑަށް ގޯސްވެފައިވާކަމަށާއި، އޭނާގެ މައްޗަށް ހެޔޮ ދުޢާ ކޮށްދިނުމަށް މިހާރުގެ ޕޯޕު އެދުނުތާ އެއް ދުވަސް ފަހުންނެވެ.

"ދަ ހޯލީ ސީ ޕްރެސް އޮފީހުން" ހާމަ ކޮށްފައިވާ ގޮތުގައި، ޕޯޕު ބެނެޑިކްޓް މަރުވެފައިވަނީ އޭނާ ދިއިރުޅެމުން އައި ގެ ކަމުގައިވާ މާޓަރ އެކްލެސިއައި މޮނާސްޓެރީގައެވެ. މި ގެއަކީ ޕޯޕުކަމުން 2013ވަނަ އަހަރު އޭނާ އިސްތިއުފާ ދިނުމަށްފަހު ދިރިއުޅޭނެ ތަނެއްގެ ގޮތުގައި އަމިއްލައަށް އިޚްތިޔާރު ކޮށްފައިވާ ގެއެވެ. މި ތަން ހުންނަނީވެސް، ކުރިސްޓިއަން ދީނުގެ މައި ފައްޅި ކަމުގައިވާ ވެޓިކަންގެ ތެރޭގައެވެ. މިހާރުގެ ޕޯޕު، ޕޯޕު ފްރާންސިސް ވިދާޅުވެފައިވާ ގޮތުގައި އޭނާވަނީ ކުރީގެ ޕޯޕުގެ ހާލު ބެލުމަށް އެތައްފަހަރަކު އޭނާއަށް ޒިޔާރަތް ކޮށްފައި ކަމުގައެވެ.

ޕޯޕް ބެނެޑިކްޓް ކުރިސްޓިއަނުންގެ އެއްމެ އިސް ފާދިރީގެ މަގާމަށް އައްޔަން ކުރެވުނީ 2005 ވަނަ އަހަރުގެ އެޕްރިލްމަހުގެ 19 ވަނަ ދުވަހުއެވެ. އޭނާ ޕޯޕުގެ މަގާމަށް އައްޔަން ކުރެވުނީ އޭރު ހުންނެވި ޕޯޕު ޖޯން ޕައުލް II މަރުވުމާއި ގުޅިގެންނެވެ. އުމުރުން 78 އަހަރުގައި ޕޯޕަކަށް ވުމާއި ގުޅިގެން އޭނާ ހިމެނިގެން ދިޔައީ ފަހުގެ ތާރީޚެއްގައި އިސް ފާދިރީގެ މަގާމަށް އައްޔަން ކުރެވިގެންދިޔަ އެންމެ އުމުރުން ދުވަސްވީ ޕޯޕު ކަމުގައެވެ.

ޕޯޕު ބެނެޑިކްޓް އިސް ފާދިރީގެ މަގާމުން އިސްތިއުފާ ދީފައިވަނީ ސިއްހީ ހާލަތު ހުރިގޮތުން 2013 ވަނަ އަހަރުއެވެ. އޭނާ ހިމެނިގެން ދިޔައީ ފާއިތުވެދިޔަ 600 އަހަރުގެ ތެރޭގައި ކުރިސްޓިއަން ދީނުގެ އިސް ފަދިރީންގެ ތެރެއިން މަގާމުން އިސްތިއުފާދިން ހަމައެކަނި ޕޯޕު ކަމުގައެވެ.

ވެޓިކަންއިން ހާމަ ކޮށްފައިވާ ގޮތުގައި ޕޯޕު ބެނެޑިކްޓްގެ ހަށިގަޑު އާންމުނަށް ދައްކާލުމަށްޓަކާ ޖެނުއަރީމަހުގެ 2 ވަނަ ދުވަހުން ފެށިގެން އެސްޓީ ޕީޓަރސް ބަސިލިކާގައި ބޭއްވިފައި އޮންނާނެއެވެ.

ވެޓިކަންއިން ހާމަ ކޮށްފައިވާ ގޮތުގައި ޕޯޕު ބެނެޑިކްޓްގެ ޖަނާޒާގެ ކަންކަން ކުރިޔަށްދާނެ ގޮތެއް ވަރަށް އަވަހަށް އިއުލާން ކުރެވިގެން ދާނެއެވެ.