ޒަމާނީ ފެންވަރަށް އަމީނީމަގު ތަރައްޤީ ކުރުމަށް ސަރުކާރުން ފެށި މަސައްކަތުގެ ދަށުން އަމީނީ މަގުގެ ފުރަތަމަ ސެގްމަންޓުގެ މަސައްކަތް ނިންމައި އާމުންނަށް ހުޅުވާލައިފިއެވެ.
ބަންދު ކުރި ފުރަތަމަ ސެގްމެންޓް ހުއްޓިފައި އޮތުމަށް ފަހު، އެ އޮތް ގޮތަށް ޢާންމުންނަށް ހުޅުވާލުމުން ގިނަ ބައެއްގެ ފާޑުކިޔުން ވަނީ އަމާޒުވެފައެވެ. މިމަސައްކަތް ކުރަމުންދަނީ އާރުޑީސީންނެވެ. މާލޭގެ ހުރިހާ އަވަށްތަކެއް ގުޅުވައިދޭ މައި އެއް މަގުކަމަށްވާ އަމީނީމަގު ތަރައްޤީކުރުމުގެ މަސައްކަތް ކުރިއަށްގެންދިއުމަށް ހަމަޖެހިފައިވަނީ ޖުމްލަ 13 ސެގްމަންޓަކަށް ބަހާލައިގެންނެވެ.
ބޮޑު ތަކުރުފާނު މަގާ ގުޅޭ ހިސާބުން މޫނިމާ ހިނގުމާ ހަމައަށް ބަންދުކޮށްފައި އޮތުމަށް ފަހު މިހާރު އެތަނުގައި އާންމުން ދަނީ އެކި އެއްގަމު އުޅަނދުތައް ދުއްވާ، ޕާކުކޮށް ހަދަމުންނެވެ. މިކަމާ ގުޅިގެން ޕްލޭނިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވީ އަމީނީ މަގުގެ ފުރަތަމަ ސެގްމެންޓް މިހާރު އާންމުންނަށް ހުޅުވާލައިފައިވާ ކަމަށެވެ.
އަދި އެ މަގުގައި ތާރު އަޅާނީ ބިލަބޮންގް ސްކޫލާ ހަމައަށް ބަންދުކުރުމަށް ފަހު، އެ ސްކޫލާ ހަމައަށް ތާރު އެޅުމުގެ މަސައްކަތް ކުރުން ފިޔަވައި ކުރަން ޖެހޭ އެހެން ކަންކަން ކޮށް ނިމުމުން ކަމަށް އޭނާ ވިދާޅުވިއެވެ.
އަމީނީމަގު ޒަމާނީ ފެންވަރަށް ތަރައްޤީކުރުމުގެ މުޅި މިމަޝްރޫޢުގައި 1.79 ކިލޯމީޓަރުގެ މަގު ހިމެނެއެވެ. މި މަސައްކަތް ސަރުކާރުން އާރް.ޑީ.ސީއާއި ޙަވާލުކޮށްފައިވަނީ 7 މަސް ދުވަހުގެ ތެރޭގައި ނިންމާގޮތަށެވެ. ޖުމްލަ 13 ސެގްމަންޓަކަށް ބަހާލައިގެން ކުރިއަށްގެންދާ މި މަޝްރޫޢުގެ ދަށުން، މަގުތަކުގައި ތާރު އެޅުމުގެ މަސައްކަތް އާރް.ޑީ.ސީން ކުރާނީ މަގުތަކުގެ އަޑީގައި ކުރަންޖެހޭ މަސައްކަތްތައް އެއްކޮށް ނިންމާ، މުޅި އަމީނީމަގު 3 ނުވަތަ 4 ސެގްމަންޓަކަށް ބަހާލައިގެންކަމަށް އާރް.ޑީ.ސީން ވިދާޅުވިއެވެ.
