ހުޅުމާލޭ ފޭސް ދޭއްގައި ހުންނަ ފިހާރައަކުން ބޮލުގަލާ 2 ތެޔޮފުޅި ވަގަސް ނެގި މީހަކު 10،000 ރުފިޔާއިން ޖޫރިމަނާ ކުރުމަށް ހުކުމް ކޮށްފިއެވެ.
މިދިޔަ ބްރާސްފަތި ދުވަހު ކްރިމިނަލް ކޯޓުން ކޮށްފައިވާ ހުކުމަކީ މިއަހަރުގެ ޖުލައި މަހުގެ 13 ވަނަ ދުވަހުގެ މެންދުރު 3 ޖަހާކަންހާއިރު ހުޅުމާލޭ ދެވަނަ ފިޔަވަހީގެ އެޗް-6 ޓަވަރުގެ ގްރައުންޑް ފްލޯގައި ހުންނަ "ޑެއިލީ ބާޒާރު" ފިހާރައިން "ކުމަރިކާ" ބްރޭންޑުގެ ދެ ތެޔޮ ފުޅި ހުކުމް ރައްދުވާ ފަރާތުން އޭނާގެ ޖިންސު ތެރެއަށް ލައިގެން ވައްކަން ކުރަން އުޅެފައިވާ ކަމަށެވެ.
މިމައްސަލާގައި ދައުވާ ރައްދުވާ ފަރާތުން ވަނީ ތަހުގީގައި ކުށަށް އިއުތިރާފުވެފައެވެ. ވައްކަމުގެ ކުށް ސާބިތުވެ ކްރިމިނަލް ކޯޓުން ފުރަތަމަ އިއްވި ހުކުމަކީ އެއް މަހާއި 20 ދުވަހަށް ޖަލަށް ލުމަށެވެ.
ނަމަވެސް މައްސަލަ ބެއްލެވި ގާޒީ ވަނީ އެ ހުކުމް 10،000 ރުފިޔާގެ ޖޫރިމަނާ އަކަށް ބަދަލުކޮށްދީ ޑިސެމްބަރު 29، އިން ފެށިގެން ހަ މަސްދުވަހުގެ މުއްދަތެއްގައި އެ ފައިސާ މީރާއަށް ދެއްކުމަށް ހުކުމްކޮށްދީފައެވެ.
