އިންޑިއާގެ ބޮޑު ވަޒީރު ނަރެންދްރަ މޯދީގެ މަންމާފުޅު ހީރަބެން މޯދީ އުމުރުފުޅުން 99 އަހަރުގައި މިއަދު އަވަހާރަވެއްޖެއެވެ.
ހީރަބެންގެ ހާލުކޮޅު ގޯސްވުމުން ގުޖްރާތުގެ ހޮސްޕިޓަލްގައި އެޑްމިޓްކޮށް ފަރުވާދެމުން ގެންދަނިކޮށް އަވަހާރަވީ މިއަދު ހެނދުނުއެވެ. މޯދީ ވެސް މިވަގުތު ހުންނެވީ އޭނާ ޗީފް މިނިސްޓަރުކަން ކުރެއްވި ގުޖުރާތުގަ އެވެ. މަންމާފުޅުގެ ހަށިގަނޑު އެމްބިއުލައިންސްގައި ގެންދިޔައިރު މޯދީ ވެސް އިންނެވިއެވެ.
ޖޫން މަހު 18 ގައި މަންމާފުޅުގެ އުމުރުން 99 އަހަރު ފުރުނު ދުވަހު އުފަންދުވަސް ފާހަގަ ކުރުމުގެ ގޮތުން މޯދީ ލިޔުއްވި ބްލޮގްގައި ވިދާޅުވެފައި ވަނީ ހީރަބެންގެ ގުރުބާނީން އޭނާގެ ހިތްވަރާއި ވިސްނުން ބިނާ ކުރުމަށް މަގުފަހިވެގެން ދިޔަ ކަމަށެވެ.
މޯދީގެ މަންމަ މަރުވިއިރު، ސިލްސިލާ ޕްރޮޖެކްޓްތަކެއް އިފްތިތާހު ކުރުމަށް ވެސްޓް ބެންގާލްއަށް ވަޑައިގަތުމަށް ހަމަޖެހިފައިވާ މޯދީ ވަނީ މިއަދު ހެނދުނު އަހްމަދުއާބާދު ސިޓީ އަށް ވަޑައިގެންފައެވެ. އަދި ބޮޑުވަޒީރުގެ އޮފީހުން ކުރި ޓުވީޓެއްގައި ބުނެފައިވަނީ ބެންގާލްގައި މިއަދު ބޭއްވުމަށް ހަމަޖެހިފައިވާ ޕްރޮގްރާމްތަކުގައި ވީޑިއޯ ކޮންފަރެންސް މެދުވެރިކޮށް މޯދީ ބައިވެރިވެވަޑައިގަންނަވާނެ ކަމަށެވެ. މި ޕްރޮގްރާމްތަކުގެ ތެރޭގައި ކަނެކްޓިވިޓީއާ ގުޅުންހުރި މުހިންމު މަޝްރޫއުތައް ފެށުމާއި ނޭޝަނަލް ގަންގާ ކައުންސިލްގެ ބައްދަލުވުން ހިމެނެއެވެ.
ހީރާބެން ދިރިއުޅުއްވީ އޭނާގެ ހަގު ދަރިކަލުންނާ އެކުއެވެ. އޭނާ އުފަންވެވަޑައިގަތީ ގުޖުރާތުގެ ވިސްނަގަރު އަވަށައުގައި 1923 ގައެވެ. ފުރާވަރު އުމުރުގައި ދަމޮދަރުދުސާ މުލްޗަންދު މޯދީ އާ ކައިވެނި ބައްލަވައިގެން ގުޖުރާތުގެ އެހެން އަވަށަކަށް ބަދަލުވެވަޑައިގެންނެވިއެވެ. އެ ދެމަފިރިންނަށް ހަ ފިރިހެން ބޭފުޅުން ލިބިވަޑައިގެންނެވިއެވެ. ނަރެންދްރަ މޯދީ އަކީ ތިންވަނަ އަށް ލިބިވަޑައިގެންނެވި ދަރިކަލުންނެވެ.
