ކުރީގެ ރައީސް ޔާމީން މިނިވަން ކުރުމަށް ގޮވާލައި އިދިކޮޅު ޕްރޮގްރެސިވް ކޯލިޝަނުން މާލޭގައި މާދަމާ ބާއްވާ ބޮޑު މުޒާހަރާއަށް ފުލުހުން ހުއްދަ ދީފައިވާކަމަށް އިދިކޮޅު ޕްރޮގްރެސިވް ކޯލިޝަނުން ބުނެފިއެވެ.
މާދަމާގެ މުޒާހަރާއާއި ގުޅިގެން އިދިކޮޅު ކޯލިޝަނުން މިމުޒާހަރާ އިންތިޒާމު ކުރާ ފަރާތުން ވަނީ ފުލުހުންނާއި ބައްދަލު ކޮށްފައެވެ. ފުލުހުންނާއި ބައްދަލު ކުރުމަށްފަހު ނޫސްވެރިންނާއި ވާއްހަކަ ދައްކަވަމުން ޕީޕީއެންސީގެ ނައިބް ރައީސް އިބްރާހިމް ޝުޖާ ވިދާޅުވީ މާދަމާގެ މުޒާހަރާއަކީ ސުލްހަވެރި މުޒާހަރާއެއް ކަމަށެވެ. މާދަމާގެ މުޒާހަރާ ނުވަތަ ހިނގާލުން ފަށާނީ ޕީޕީއެމް އޮފީސް ކައިރިން ކަމަށާއި، ނިންމާނީވެސް ހަމަ އެތަނަށް ކަމުގައެވެ.
މާދަމާ މުޒާހަރާ ފެށުމަށް ހަމަޖެހިފައިވަނީ ހަވީރު 4:00 ގައެވެ. ޝުޖާއު ވިދާޅުވީ ހުކުރު ދުވަހުގެ މުޒާހަރާ ފުލުހުން ދައްކާ ރޫޓަކުން ކުރިއަށް ގެންދިއުމަށް ހުއްދަ ދީފައިވާ ކަމަށާއި މުޒާހަރާގެ ސެކިއުރިޓީ ބަލަހައްޓާދޭނެ ކަމަށް ބުނެފައިވާ ކަމަށެވެ.
މިއޮތީ މިކަން ވަރަށް ފަސޭހަކަމާއެކު ކުރެވޭނެ އިންތިޒާމެއް ހަމަޖެހިފައި. މިކަމަށްޓަކައި ދިވެހި ފުލުހުންގެ ހިދުމަތަށް ވަރަށް ބޮޑަށް ޝުކުރު ދަންނަވަން.
– ޝުޖާއު ވިދާޅުވިއެވެ.
މީގެ އިތުރުން ކޮންމެ ރެއަކު މާލޭގައި ޕީޕީއެމުން ކުރިއަށް ގެންދާ އިހުތިޖާޖުގައި ހާލަތާއި ނުބައްދަލު ބާރުގެ ފުލުހުން ބޭނުން ކުރަމުންދާ ކަމާއި ފުލުހުން ބޮޑީ ކެމް ބޭނުން ނުކުރާ މައްސަލަ ފުލުހުންގެ ސަމާލުކަމަށް ގެނައި ކަމަށް ޝުޖާއު ވިދާޅުވިއެވެ. އޭގެ އިތުރުން ބައެއް ފުލުހުން ނަން ޓެގު ނައްޓާލައިގެން އުޅޭކަންވެސް ސަމާލު ކަމަށް ގެނެސްފައިވާ ކަމަށް ވިދާޅުވިއެވެ.
ޙަރާމް ހުކުމާ ދެކޮޅަށް ޕީ.ޕީ.އެމް އިން މާދަމާ ބާއްވާ ސުލްހަވެރި ހިގާ ލުމަށް ފުލުހުން ހުއްދަދީފި! ހުރިހާ ރައްޔިތުންނަށް ދައުވަތު އަރުވަން.#HaraanHukun #FreePresidentYameen #RY2023 pic.twitter.com/yW904rqXWs
— KEVIN (@kevincosna) December 29, 2022
ރައީސް ޔާމީން ޖަލަށްލުމަށް ހުކުމް ކުރުމުން އިދިކޮޅު ފަރާތްތަކުން ދަނީ އާދިއްތަ ދުވަހުގެ ރެ އިން ފެށިގެން ކޮންމެ ރެޔަކު މާލޭގައި މުޒާހަރާ ކުރަމުންނެވެ.
ކޮމެންޓު ފޮނުވާ