އަންނަ އަހަރު ބާއްވާ ރިޔާސީ އިންތިޚާބު ކާމިޔާބުކުރެވިއްޖެ ނަމަ ރައްޔިތުންގެ އަތުން ނަގާ ޓެކްސް ކުޑަކޮށް ރައްޔިތުންނަށް ލުޔެއް ހޯދައި ދެއްވާނެކަމަށް އެމްޑީޕީގެ ރައީސް މުޙައްމަދު ނަޝީދު ވިދާޅުވެއްޖެއެވެ.

ނަޝީދުގެ ކެމްޕެއިން ފެށުމަށް ރޭ ސަލްޓަންޕާކުގައި ފިކުރެއްގެ ދިރުން ނަމުގައި. ބޭއްވި ކެމްޕެއިން ހަރަކާތުގައި ވާހަކަފުޅު ދައްކަވަމުން ނަޝީދު ވިދާޅުވީ، ފައިސާއަށް ވާގޮތްނުބަލައި ރާއްޖޭޣެ ވެރިއަކަށް ވެރިކަމެއް ނުކުރެވޭނެކަމަށެވެ. ދައުލަތުގެ ފައިސާ ޚަރަދުވާގޮތް ކޮންމެ ދުވަހަކުވެސް ބަލަންޖެހޭނެކަމަށާއި، އެ މަޢުލޫމާތު ފިނޭންސް މިނިސްޓްރީން ކޮންމެ ދުވަހަކުވެސް ލިބެންޖެހޭކަމަށް ނަޝީދު ވިދާޅުވިއެވެ.

މިސަރުކާރުން ދައުލަތިގެ ދަރަނި ރީސްޓްރަކްޗަރ ނުކުރުން އެކަމުގެ ކަންބޮޑުވުން ފާޅުކުރައްވާ ނަޝީދު ވިދާޅުވީ، އެމަނިކުފާނުގެ އެދިވަޑައިގަތުމަށްވެސް ދަރަންޏަށްވާގޮތް ނުބެލިކަމަށެވެ. ދަރަނި ރިސްޓްރަކްޗަރ ކުރުން މެނިފެސްޓޯގައި އޮންނާނެކަމަށާއި، ނަމަވެސް އެކަން މިސަރުކާރުން ނުކުރިކަމަށް ނަޝީދު ވިދާޅުވިއެވެ.

މިސަރުކާރުން އިންތިހާއަށް ދަރަނި ނަގަމުން އަންނަކަމަށް ވިދާޅުވެ އެކަމަށް ފާޑުވިދާޅުވަމުން ނަޝީދު ވިދާޅުވީ، އަނެއްކާ ޓެކްސް ބޮޑުކުރަން ސަރުކާރުން ނިންމާފައިވާކަމަށެވެ. އެކަމުގެ ސަބަބުން ތަކެތީގެ އަގު އުފުލޭނެކަން ފާހަގަކުރައްވާ ނަޝީދު ވިދާޅުވީ، ތަކެތީގެ އަގު އުފުލި ހާސްކަމެއްގެ ތެރެއަށް ދާންޖެހިފައިވާކަމަށެވެ.

އެމްޑީޕީގެ މަދު އަދަދެއްގެ މެމްބަރުން ހާޒިރު، އާންމުކޮށް ހުޅުވާލައިގެން ބޭއްވި އިވެންޓުގައި ޕާޓީގެ މެމްބަރުންނާ މުޚާތަބުކޮށް ވާހަކަ ދައްކަވަމުން ނަޝީދު ވިދާޅުވެފައިވަނީ ކުރިޔަށް އޮތް ރިޔާސީ އިންތިޚާބުގައި ރައީސް އިބުރާހިމް މުހައްމަދު ސާލިހުއަށް 20 ޕަސެންޓް ވޯޓްވެސް ލިބިވަޑައިނުގަންނަވާނެ ކަމަށާ ޕްރައިމަރީއަށް ނިކުމެވަޑައިގެންނެވީ އެ މަންޒަރު ދެކެވަޑައިގަންނަވަން ބޭނުންފުޅު ނުވާތީ ކަމުގައެވެ.

ނަޝީދު މިހެން ވިދާޅުވެފައިވާއިރު، އެމްޑީޕީގެ ރައީސް މުހައްމަދު ނަޝީދާއި، ޚިޔާލު ތަފާތުވުން އޮތީ ވެރިކަމުގައި އެމަނިކުފާނު ހުންނެވުމުން ކަމުގައި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު އިއްޔެ ވަނީ ވިދާޅުވެފައެވެ.

ރައީސް ނަޝީދަކީ އަބަދުވެސް ވެރިކަމުގެ ހުވަފެން ދެކޭ ވެރިކަމަށް އައުމަށް މަސައްކަތް ކުރައްވަމުންދާ ބޭފުޅެއްކަމަށާއި، ވެރިކަމުގައި އެމަނިކުފާނު ނޫން އެހެން ކޮންމެ މީހަކު ހުރިނަމަވެސް ރައީސް ނަޝީދުގެ އެހިތްހަމަ ނުޖެހުން އެމީހަކާއި އޮންނާނެކަމަށެވެ. ނަމަވެސް ރައީސް ޞާލިހު ވަނީ ރައީސް ނަޝީދު ވެރިކަން ހޯދުމަށް ކުރައްވާ މަސައްކަތުގައި އަމަލުކުރާ ބައެއް ގޮތްތަކާއިމެދު ހިތްހަމަނުޖެހުން ފާޅު ކުރައްވާފައެވެ.