މިދިޔަ އޯގަސްޓްމަހު ރަޙުމްކުޑަގޮތަކަށް މަރާލި އުމުރުން 22 އަހަރުގެ ޝިއާއު މުހައްމަދު ސައީދު (ޝިއާ) މަރާލި މައްސަލާގައި ފ. ނިލަންދޫ, ފިނިފެންމާގެ, ޢަލީ ސާހިލްގެ މައްޗަށް ދައުވާ ކޮށްފިއެވެ.
ޕީޖީ އޮފީހުން ވިދާޅުވީ ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނުގެ 5 ވަނަ މާއްދާގެ ދަށުން ތޫނު އެއްޗެއް ބޭނުންކޮށްގެން ޤަޞްދުގައި މީހަކު މެރުމުގެ ކުށުގެ ދަޢުވާ, އަދި އިތުރު 4 ދަޢުވާއާއެކު, އެކު ޖުމްލަ 5 ދަޢުވާ ކުރުމަށް މިއަދު ކްރިމިނަލް ކޯޓަށް ހުށަހަޅައިފައިވާކަމަށެވެ.
ތޫނު އެއްޗެއް ބޭނުންކޮށްގެން ޤަޞްދުގައި މީހަކު މެރުމުގެ ކުށުގެ ދަޢުވާގެ އިތުރުން ދެން ކޮށްފައިވާ ދައުވާތަކަކީ އޮރިޔާން ކާޑު ގެންގުޅުނު ދައުވާއާއި، ކެނެބިސް ބޭނުންކުރުމުގެ ދައުވާއެެވެ. އަނެއް ދެދައުވާގެ ތަފްސީލް ޕީޖީ އޮފީހުން ހާމައެއް ނުކުރެއެވެ. އެއޮފީހުން ބުނެފައިވަނީ މީގެ އިތުރަށް ހުރި ދަޢުވާތަކުގެ ތަފްޞީލު މިވަގުތަށް ހާމަކުރެވޭކަށް ނެތްކަމަށެވެ.
އޯގަސްޓު މަހުގެ 7 ވަނަ ދުވަހު ހ. ޝީރީންވިލާގައި މަރާލާފައި އޮއްވާ ފެނުނު ޝިއާއުގެ ހަށިގަނޑު ފެނުނު އިރު އޭނާގެ ހަށިގަނޑުން ބޮޑެތި އަނިޔާތަކެއް ދީފައިވާކަމަށް ފުލުހުން ވިދާޅުވެފައިވެއެވެ.އެ ރޭ އެތަނުން އޭނާގެ ހަށިގަނޑު ބޮޑީ ބޭގުގައި ފުލުހުން ގެންދިޔައީ ދެ ކޮތަޅަކަށް އަޅައިގެންނެވެ.
ފުލުހުން މީގެ ކުރިން ވެސް ބުނިގޮތުގައި މި މައްސަލާގައި ޝާހިލް، ޝިއާއު މަރާލިކަން ސާބިތުވާ ވަރަށް ހެކި އެބަހުއްޓެވެ. އެކަމަކު މައްސަލާގައި ދައުވާ ނުކޮށް މަޑުކުރަމުން އަންނަނީ އޭނާ އެވަރުގެ ލާއިންސާނީ އަމަލެއް ހިންގި މޯޓިވް ދެނެގަތުމަށެވެ.
މި މައްސަލާގައި ފުލުހުން މިހާތަނަށް ބެލި ބެލުމުން މިކަމުގައި އިތުރު އެއްވެސް މީހެއްގެ ބައިވެރިވުމެއް އޮތްކަން އަދި ތަހުގީގަށް އެނގިފައި ނުވާކަމަށާ، މިއީ ކުރިން ރޭވިގެން ހިންގާފައިވާ އަމަލެއްކަމަށް ނުބެލެވޭ ކަމަށްވެސް ފުލުހުން ވިދާޅުވެއެވެ.
މި މައްސަލާގައި މިހާތަނަށް 45އަށްވުރެ ގިނަ މީހުންނާ ސުވާލުކޮށް، މައްސަލައާ ގުޅުން ހުރި އެކިއެކި ތަންތަނުގެ ސީސީޓީވީ ފުޓޭޖު ބަލައި ދިރާސާކޮށްފައިވާ ކަމަށް ފުލުހުން ވިދާޅުވެފައިވެއެވެ. އަދި ފޮރެންސިކް ތަހުލީލަށް ބޭނުންވާ އެކިއެކި ޑިޖިޓަލް ވަސީލަތްތަކުގެ މައުލޫމާތު ހޯދައި އެނަލައިޒް ކުރުމުގެ މަސައްކަތް މިމައްސަލައިގެ ތަހުގީގުގައި ކޮށްފައިވެއެވެ.
