ގދ. ފަރެސްމާތޮޑާ އެއަރޕޯޓް ތަރައްޤީ ކުރުމުގެ މަޝްރޫޢުގެ މަސައްކަތުގެ 85 ޕަސެންޓް ނިމިއްޖެކަމަށާ، އަދި ރަންވޭއާއި ޓެކްސީވޭއާއި އޭޕްރަން މަސައްކަތްތަކުގެ 93 ޕަސެންޓް ވަނީ ނިމިފައިކަމަށް އެމްޓީސީސީން ބުނެފިއެވެ.
އެއާޕޯޓްގެ މަސައްކަތް ކުރަނީ އެމްޓީސީސީންނެވެ. މިއީ ދެކުނުގެ އަތޮޅުތަުގެ ތެރެއިން ހުވަދު އަތޮޅުގެ ވަރަށްގިނަ ރައްޔިތުންގެ އުންމީދުތަކާ ގުޅިފައިވާ އެއަރޕޯޓެކެވެ. މި އެއަރޕޯޓުގެ މަސައްކަތް ވަރަށްބޮޑަށް ލަސްވެފައިވާކަމަށް ދެކުނުގެ ރައްޔިތުން ބުނެއެވެ. އެހެންނަމަވެސް ފަހަކަށް އައިސް މަސައްކަތުގެ ސްޕީޑް ހަލުވިވެ އެދެވޭ ކުރިއެރުންތަކެއް އަންނަނީ ލިބެމުންނެވެ. ދާދިއަވަކަށް މަސައްކަތް މުޅިން ނިމި އެއަރޕޯޓު ހުޅުވޭނެކަމުގެ އުންމީދު ބޮޑެވެ.
ގދ. ފަރެސްމާތޮޑާ އެއަރޕޯޓް ތަރައްޤީ ކުރުމުގެ މަޝްރޫޢުގެ މަސައްކަތުގެ 85 ޕަސެންޓް ނިމިއްޖެ. އަދި ރަންވޭ، ޓެކްސީވޭ، އޭޕްރަން މަސައްކަތްތަކުގެ 93 ޕަސެންޓް ވަނީ ނިމިފައި. #MTCCProjects #RayyithungeKunfuni pic.twitter.com/qDjasBeh1e
— MTCC Plc (@MTCCPlc) December 27, 2022
ފަރެސްމާތޮޑާ އެއަރޕޯޓްގެ ޢަމަލީ މަސައްކަތް ފަށާފައިވަނީ މިދިޔަ އަހަރުގެ ޖެނުއަރީ މަހުއެވެ. މި އެއަރޕޯޓް ތަރައްޤީކުރަނީ ކައިރީގައި ހުރި ކުދި ރަށްތަކެއް ހިއްކައިގެންނެވެ. އެއީ 19.9 ހެކްޓަރުގެ ބިމުގެ ސަރަޙައްދެކެވެ. ބިން ހިއްކުމުގެ މަސައްކަތް 2019ވަނަ އަހަރު ނިންމި ނަމަވެސް، ދިގު މުއްދަތެއްވަންދެން އެއަރޕޯޓްގެ ޢަމަލީ މަސައްކަތް އޮތީ ނުފެށިއެވެ. އެއަރޕޯޓްގެ ޢަމަލީ މަސައްކަތް ކުރުމަށް އެމްޓީސީސީއާ ހަވާލުކުރީ މިދިޔަ އަހަރުގެ ނޮވެމްބަރުމަހުއެވެ.
އެއާޕޯޓްގެ މަސައްކަތް ކުރިއަށް ގޮސްފައިވާ ހިސާބާއި ގުޅޭގޮތުން އެމްޓީސީސީން ބުނެފައިވަނީ ގދ.ފަރެސްމާތޮޑާ އެއަރޕޯޓް ތަރައްޤީ ކުރުމުގެ މަޝްރޫޢުގެ މަސައްކަތުގެ 85 ޕަސެންޓް ނިމިއްޖެކަމަށެވެ. އަދި ރަންވޭ، ޓެކްސީވޭ، އޭޕްރަން މަސައްކަތްތަކުގެ 93 ޕަސެންޓް ވަނީ ނިމިފައިކަމަށެވެ.
އެމްޓީސީސީން ޢަމާޒު ހިފާފައިވަނީ އެއަރޕޯޓްގެ ޢަމަލީ މަސައްކަތްތައް މުޅިން ނިންމާ، ޖުލައި މަސް ތެރޭގައި ސަރުކާރާއި އެއަރޕޯޓް ހަވާލުކުރުމަށެވެ. އެއަރޕޯޓް ތަރައްޤީކުރަނީ އެތެރޭގެ އުދުހުންތަކަށް ޚާއްސަކޮށްގެންނެވެ. ރަންވޭއަކީ 1200 މީޓަރުގެ ދިގު ރަންވޭއެކެވެ. ފަރެސްމާތޮޑާ އެއަރޕޯޓްގެ ޓަރމިނަލްވެސް ތަރައްޤީކުރަނީ ތަފާތު ސްޓްރަކްޗަރއަކަށެވެ. މިއީ ޕްރީ ފެބްރިކޭޓެޑް އިމާރާތަކެވެ.
މި ޕްރޮޖެކްޓަކީ ސަރުކާރުން 144.8 މިލިއަން ޚަރަދުކޮށްގެން ކުރިއަށްގެންދާ މަޝްރޫޢެކެވެ.
ކޮމެންޓު ފޮނުވާ