ރައީސުލްޖުމްހޫރިއްޔާގެ މަޤާމުގައި މިހާތަނަށް ހޭދަކުރި ކޮންމެ ދުވަހަކީވެސް ދިވެހި ރައްޔިތުންގެ އެއްބައިވަންތަކަން ދެމެހެއްޓުމަށް މަސައްކަތްކުރި ދުވަހެއްކަމަށް ރައީސް އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ދިވެހިންގެ އެއްބައިވަންތަކަމުގެ ދުވަސް ފާހަގަކުރުމަށް މ.ކޮޅުފުށީގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ، ސުނާމީ ކާރިސާގެ އެ އިޙްސާސްތަކަކީ، މިއަދު އެހާ ފަސޭހައިން އެކަކަށްވެސް ހިތަށްގެނެވޭވަރަށްވުރެ ހިތާމަވެރި، ދަތި ކަންތައްތަކެއްކަމަށެވެ.
ކަން ދިމާކުރި ގޮތުން، އަޅުގަނޑަށްވެސް އެ ދުވަހު ހުރެވުނީ ޢާއިލާއާ އެކުގައި އަޅުގަނޑުގެ އުފަން ރަށުގައި. ލޮނުގަނޑު ރަށުތެރެއަށް އަރައިގެން އައިސް، ގޭތެރެއަށް ވަދެ، އެ ރާޅު ފައިބައިގެން ދިޔައިރުގައި، މުޅި ރަށް އޮޔައިގެން އެދިޔަގޮތް އެއީ، އެ ދުވަހު އެތާހުރި މީހަކަށް ނޫނީވިއްޔާ އިޙްސާސް ކުރެވޭނެ ކަންތައްތަކެއް ނޫން. އަޅުގަނޑުގެ އަންހެނުންނާއި ދެ ކުދިންނާއި، މުޅި ޢާއިލާ އެ ދުވަހު ތިބީ ރަށުގައި. އަޅުގަނޑުގެ ދޮށީ ދަރިފުޅު 9 އަހަރުގެ ސާރާ އިނީ ގޭ ކުރިމަތީގައި ހުރި ގަހެއްގައި. 7 އަހަރުގެ ފިރިހެން ދަރިފުޅު ހުރީ ފާރެއްގެ މަތީގައި. މަންމައާއި ހުރިހާ ކޮއްކޮއިން ރަށުގައި ތިބީ. މުޅި ޢާއިލާ އެކީގައި އޮތް. އަޅުގަނޑު ހިތުން ކޮޅުފުށްޓަށް އެދުވަހު އެ ވެގެންދިޔަގޮތް އެއީ، އަދި އަޅުގަނޑުމި ދުށް މަންޒަރަށްވުރެ މާ ހިތާމަވެރި، މާބިރުވެރި، މާ ދަތި ދުވަހެއް.
– ރައީސް ވިދާޅުވިއެވެ.
އެ ދުވަހަކީ އެތައް ބައެއްގެ ދިރިއުޅުން ބިމާ ހަމަކޮށްލި ހިތާމަވެރިވެސް ދުވަހެއްކަމަށާއި، އެހެން ނަމަވެސް، އެ ހިތާމައާއި އެ ހިތްދަތިކަމުގެ މައްޗަށް ހިތްވަރާއި ސާބިތުކަން ދިވެހިންނަށް އެ ދުވަހު ލިބުނީ، މާތް ﷲގެ ދީލަތިވަންކަމާއި އޯގާވަންތަކަމާއި ދިވެހިންގެ ހިތްތަކުގައި އޮތް، ވަރުގަދަ އީމާންތެރިކަމުންކަމަށް ރައީސް ވިދާޅުވިއެވެ. އަދި އެ ވަރުގަދަ އީމާންތެރިކަމާއެކު، ދިވެހިންގެ މެދުގައި އޮތް އެއްބަނޑުއެއްބަފާ ކަމާއި އެކުވެރިކަންކަމަށްވެސް ރައީސް ވިދާޅުވިއެވެ.
މިއަދު އަޅުގަނޑުމެން މި ފާހަގަކުރަނީ، އެދުވަހުގެ ހިތާމައާއި ކެކުޅުންތަކުން އަރައިގަތުމުގައި، އެންމެހައި ދިވެހިން ސާބިތުކޮށްދިން އެއްބައިވަންތަކަން. ސުނާމީގައި އަޅުގަނޑުމެންނަށް އެކި ގޮތްގޮތުން ލިބުނު ގެއްލުންތައް ފޫބެއްދުމުގައި ވެސް، އަދި ވީރާނާވެގެންދިޔަ ދިރިއުޅުން އަލުން ކޮޅަށްޖެހުމުގައި ވެސް، އަޅުގަނޑުމެންގެ އެންމެ ވަރުގަދަ ވަސީލަތަކަށްވީ، ދިވެހިންގެ އެއްބައިވަންތަކަން. އެ ދުވަހު އަޅުގަނޑުމެން ސާބިތުކޮށްދިނީ، ޒަމާނުއްސުރެ ދިވެހިންގެ މެދުގައި އޮތް އެކުވެރިކަމާއި، ކުލުނާއި ލޯބީގެ ވަރުގަދަ ގުޅުމުން، ކިތަންމެ ބޮޑު ގޮންޖެހުމެއް ވެސް ހުރަސްކުރެވިދާނެކަން.
– ރައީސް ވިދާޅުވިއެވެ.
ރައީސްގެ ވާހަކަފުޅުގައި، މީހުން ދިރިނުއުޅެވޭ ވަރަށް ބައެއް ރަށްރަށް ހަލާކުވެގެންދިޔަކަމަށާއި، އަދި ވަރަށް ގިނަ ރަށްރަށަށް ބޮޑެތި ގެއްލުންތައް ލިބުނުކަން ފާހަގަކުރެއްވިއެވެ. އެހެން ނަމަވެސް، އެ ހިތާމަތައް ތަޙައްމަލުކުރުމުގަޔާއި،އެ ދަތިތައް ފޫބެއްދުމަށް ކުރި މަސައްކަތުގައި، ގެއްލުން ލިބުނު ރަށަކާއި ގެއްލުން ނުލިބޭ ރަށަކާ ދެމެދު ތަފާތެއް ނެތްކަމަށް ވިދާޅުވިއެވެ. ކޮންމެ ބަޔަކުވެސް އެ ބަޔަކަށް ވީވަރަކުން، އެ ބައެއްގެ ކެރިފޯރުންތެރިކަން ހުރިވަރަކުން، އަނެއް ބަޔަކަށް އެހީތެރިކަން ފޯރުކޮށްދެމުންދިޔަކަމަށާއި، ސުނާމީގެ ފުރަތަމަ ވަގުތުން ފެށިގެން ޢާންމު ރައްޔިތުންނަށް އެހީތެރިވުމުގައި، ސަލާމަތީ ޚިދުމަތްތަކާއި ދިފާޢީ ބާރުގެ ފަރާތުން އެ ދެއްކެވި ހިތްވަރާއި، ކުރި ބުރަ މަސައްކަތް، ދިވެހި ތާރީޚުގައި ތާއަބަދަށް ފެވިގެންދާނެކަމަށް ރައީސް ވިދާޅުވިއެވެ. ރާއްޖޭގެ ވިޔަފާރިވެރިންނާއި ފުދުންތެރިން އަދި ހެޔޮއެދޭ ފަރާތްތަކުން ދެއްވި އެހީތެރިކަމާއި އެއްބާރުލުންވެސް އެމަނިކުފާނު ފާހަގަކުރެއްވިއެވެ.
ސުނާމީއާ ގުޅިގެން ދުނިޔޭގެ އެހެން ބައެއް ޤައުމުތަކުގައި، ޙާލުގައި ޖެހުނު މީހުންގެ މެދުގައި ހިނގައިދިޔަ ފަދަ ހަމަނުޖެހުންތަކެއް، އިރާދަކުރެއްވީތީ އަޅުގަނޑުމެންގެ ތެރެއަކު ނުހިނގާ. އެއީ، ހަމަ އެންމެ ސަބަބަކާ ހެދި. އެއީ، ޙާލުގައި ޖެހުނު މީހުންނަށް އެހީތެރިކަން ފޯރުކޮށްދިނުމުގައި، އަޅުގަނޑުމެން ދެއްކި އެއްބައިވަންތަކަން.ސުނާމީ ފަދަ ކާރިސާތަކަކީ، ދުނިޔޭގެ މޫސުމަށް އަންނަ ބަދަލުތަކުން ކުރިމަތިވާ ތިމާވެށީގެ މައްސަލަތަކާ މެދު އަޅުގަނޑުމެން އިތުރަށް ސަމާލުވުމަށް ހަނދާންކޮށްދޭ ކަމެއް. ދުނިޔޭގެ މޫސުމަށް އަންނަ ބޮޑެތި ބަދަލުތަކުގެ ސަބަބުން ރާއްޖެއަށް ވެސް ތިމާވެށީގެ ވަރަށް ބޮޑެތި ގޮންޖެހުންތައް އެބަ ކުރިމަތިވޭ. އެ ގޮންޖެހުންތައް ހުރަސްކުރުމަށްޓަކައި، ރާއްޖޭގެ މާޙައުލީ ނިޒާމު ރައްކާތެރިކުރުމަށް ޚާއްޞަ ސަމާލުކަމެއް މިއަދު މިވަނީ ދޭން ޖެހިފައި.
– ރައީސް ވިދާޅުވިއެވެ.
ރައީސް ވިދާޅުވީ އެމަނިކުފާނު ދިވެހި ރައްޔިތުންނަށް ޚިދުމަތް ކުރުމަށް، ރައީސުލްޖުމްހޫރިއްޔާގެ މަޤާމުގައި މިހާތަނަށް ހޭދަކުރި 1501 ދުވަހުގެ ތެރެއިން ކޮންމެ ދުވަހަކީ، ދިވެހި ރައްޔިތުންގެ އެއްބައިވަންތަކަން ދެމެހެއްޓުމަށް މަސައްކަތްކުރި ދުވަހެއްކަމަށެވެ. ރައްޔިތުންނަށް ޚިދުމަތް ކުރަން ނުކުތްއިރު، އެމަނިކުފާނުގެ ކުރިމަތީގައި އޮތް އެންމެ ބޮޑު އެއް ކަމަކީ، ދިވެހިންގެ ތެރެއިން ހަމަޖެހުމާއި ޞުލްޙަޔާއި އެއްބައިވަންތަކަން ގެއްލި، ބައިބައިވެފައި އޮތް އޮތުންކަމަށާއި، ސިޔާސީ ބޭނުންތަކަށްޓަކައި ވަކި ބަޔަކު ގަސްދުގައި ދިޔައީ ހަމަޖެހުން ނަގައިލަމުންކަމަށް ވިދާޅުވިއެވެ.
އަޅުގަނޑަށް ވިސްނުނީ، އެންމެ ފުރަތަމަ އަޅުގަނޑު ކުރަންޖެހޭނެ ކަމަކީ، މުޖްތަމަޢުގައި ޞުލްޙަވެރިކަން ޤާއިމުކުރުމޭ. އަދި ދިވެހިން އެއްބައިވަންތަކޮށް، އެކުވެރިކަމާއެކު، ހަމަޖެހިގެން ދިރިއުޅުމުގެ ފުރުޞަތު ހޯދައިދިނުމޭ. އެއްބައިވަންތަކުރެވޭނީ، ޚިދުމަތް ދިނުމުގައި، ރައްޔިތުންގެ މެދުގައި ތަފާތުނުކޮށް، ހަމަހަމަކަން ޤާއިމުކޮށްގެން. އަސާސީ ޚިދުމަތްތައް ފޯރުކޮށްދިނުމަށް އަޅުގަނޑުމެން ފެށި ކޮންމެ މަޝްރޫޢެއްގެ އަމާޒަކީ، ވަކި ރަށެއް ތަފާތުނުކޮށް، ރާއްޖޭގެ ހުރިހާ ރައްޔިތުންނަށް އެ ޚިދުމަތްތައް ފޯރުކޮށްދިނުން.
– ރައީސް ވިދާޅުވިއެވެ.
ރައީސް ވިދާޅުވީ، ބޯފެނާއި ނަރުދަމާ ނިޒާމުގެ މަޝްރޫޢު އަޅުގަނޑުމެން ފެށީ، ރާއްޖޭގައި މީހުން ދިރިއުޅޭ ހުރިހާ ރަށެއްގައި، އެ ޚިދުމަތް ޤާއިމުކޮށްދޭން. ލަފާފުރުމުގެ މައްސަލަ ޙައްލުކުރުމަށް ބަނދަރުތައް ހަދަނީވެސް، މުޅި ރާއްޖެއަށް އަމާޒުކޮށްގެން. އަތޮޅުތަކުގައި ދަތުރުފަތުރުގެ ޚިދުމަތް ފުރިހަމަކުރަމުން މި އަންނަނީވެސް މުޅި ރާއްޖޭގައި އެ ޚިދުމަތް ދޭންކަމަށެވެ.
ކޮޅުފުށީގައިވެސް އަދި އެ އަތޮޅުގެ ހުރިހާ ރަށެއްގައިވެސް، މި ދެންނެވި ޚިދުމަތްތައް ފުރިހަމަކުރުމުގެ މަޝްރޫޢުތައް މިހާރު ކުރިއަށްދާކަމަށް ރައީސް ވިދާޅުވިއެވެ.
