ފްރާންސްގެ ކުރޯގެ ރައީސް ނިކޮލަސް ޝަޒޯކީގެ ކޮރަޕްޝަންގެ ޝަރީއަތް ފްރާސްގައި ފެށިއްޖެއެވެ.
ޝަޒޯކީގެ މައްޗަށް ތުހުމަތު ކުރެވިފައިވަނީ، ރިޝްވަތު ހިފުމާއި އަދި ތަހުގީގަށް މައުލޫމާތު ސިއްރު ކުރުމަށާއި ސިއްރު މުއާމަލާތު ކުރުމަށް ސިއްރު ފޯނެއް ގެންގުޅެފައިވާ ކަމުގެ ތުހުމަތެވެ. މިއީ 2012 ވަނަ އަހަރު ފްރާސްގެ ރައީސް ކަމުން ވަކިވެ ވަޑައިގަތުމަށްފަހު، އުމުރުން 65 އަހަރުގެ ޝަޒޯކީގެ މައްޗަށް ކުރެވިފައިވާ އެތަކެއް ތަހުގީގުތަކުގެ ތެރެއިން އެންމެ މައްސަލައަކާ ގުޅޭ ޝަރީއަތެކެވެ.
ޝަޒޯކީގެ މައްޗަށް ތުހުމަތު ކުރެވިފައިވަނީ، 2014 ވަނައަހަރު އެނާގެ މައްޗަށް ހިގަމުންދިޔަ ތަހުގީގަކާ ގުޅޭ މައުލޫމާތު ހިމެނޭ ކަރުދާސްތަކެއް، ގަވާއިދާ ޚިލާފަށް އެގައުމުގެ ގާޒީއެއްގެ އަތުން ހޯދުމަށް މަސައްކަތް ކުރިކަމުގެ ތުހުމަތުތަކެވެ. ޝަޒޯކީމައްޗަށް މިކުރެވޭ ޝަރީއަތަށް، އޭރު ޝަޒޯކީގެ ގާނޫނީ ވަކީލެއްގެ ގޮތުގައި މަސައްކަތް ކުރި، ތިއެރީ ހަޒޯގް، 65، އާއި، މައްސަލާގައި ޝާމިލްވާ ގާޒީ ގިލްބާޓް އަޒިބާޓް، 73، ވެސް ހާޒިރު ކުރެވުނެވެ.
މިތުހުމަތުތައް ޝަރީއަތަށް ސާބިތުވެއްޖެނަމަ، އެންމެންގެ މައްޗަށްވެސް މަދުވެގެން 10 އަހަރުގެ ހުކުމެއް އަންނާނެއެވެ. އަދި މީގެ އިތުރުން މަދުވެގެން 1.2 މިލިއަން ޑޮލަރުގެ ޖޫރިމާނާއެއް އަންނާނެއެވެ.
ޑިސެމްބަރު 10 ވަނަ ދުވަހާހަމައަށް މިޝަރީއަތްތައް ކުރިޔަށް ގެންދާގޮތަށް ވަނީ ހަމަޖެހިފައެވެ.
ޝަޒޯކީއާ އޭނާގެ ލޯޔަރު ހާޒޯގްގެ މައްޗަށް ތުހުމަތު ކުރެވެނީ، 2007 ވަނައަހަރުގެ ފްރާންސްގެ ރިޔާސީ އިންތިޚާބުގެ ކެމްޕޭންއަށް، ފްރާންސްގެ އެންމެ މުއްސަދި އަންހެން މީހާ ކަމުގައިވާ އޯރެލް ހެއިރެސް ލިލިއާން ބެޓެންކޯގެ އަތުން ގަވާއިދާ ޚިލާފަށް ފައިސާ ހޯއްދެވިކަމަށް ކުރެވުނު ތަހުމަތުތަކާ ގުޅޭ ސިއްރު ލިޔުންތަކެއް ހޯއްދެވިކަމުގެ ތުހުމަތުގައެވެ. އަދި ގާޒީ އަޒިބާޓްގެ މައްޗަށް ކުރެވޭ ދައުވާއަކީ، ޝަޒޯސްކީ ވަޒީފާގެ ކަށްވަރުކަން ދެއްވުމުން މިމައުލޫމާތު ލީކް ކޮއްލާފައިވާ ކަމުގެ ދައުވާއެވެ.
2014 ވަނަ އަހަރު، ޝަޒޯސްކީއާއި އޭނާގެ ލޯޔަރު ހާޒޯގް ވަނީ، "ޕައުން ބިސްމަތު" ގެ ނަމުގައި ސިއްރު މޯބައިން ނަމްބަރެއް ބޭނުންކޮށްގެން ގާޒީއާއި މުއާމަލާތު ކޮށްފައެވެ. ނުބައި ނަމެއްގަ ސިއްރުން ވާހަކަދައްކަން ޖެހުނީ ޝަޒޯކީގެ ފޯންކޯލްތައް ސިއްރުން އަޑުއަހާނެކަމުގެ ބިރަށްޓަކައެވެ.
ތަހުގީގުގައި ޝަޒޯކީއާއި އޭނާގެ ގާނޫނީ ވަކީލު ބުނެފައިވަނީ، ސިއްރު ފޯނެއް ގެންގުޅެން މަޖުބޫރުވީ، ގަވާއިދާ ޚިލާފަށް ފޯންކޯލްތައް އަޑުއަހާ މީހުންގެ ކިބައިން ސަލާމަތް ވުމަށް ކަމަށެވެ. އަދި އެހެންނަމަވެސް، މައްސަލަ ތަހުގީގުކުރާ ޓީމުން ތުހުމަތު ކުރަނީ، ޝަޒޯކީގެ ހަގީގީ މަގުސަދަކީ އިންވެސްޓިގޭޓަރުން އޭނާގެ ފޯންކޯލްތައް އަޑުއަހާފާނެތީ އޭގެއިން ސަލާމަތްވުން ކަމުގައެވެ.
އިންވެސްޓިގޭޓަރުން ޝަޒޯކީއާއި އޭނާގެ ގާނޫނީ ވަކީލު ކޮށްފައިވާ މުއާމަލާތްތަކުން، އިންވެސްޓިގޭޓަރުން އެދެމީހުންގެ ފޯންކޯލްތައް އަޑުއަހާފާނެކަމަށް ބަލާ ދައްކާފައި ހުރި ވާހަކަތައް، މިމައްސަލައިގެ ތަހުގީގު ޓީމުން ކޮށްފައިވާ ތަހުގީގުތަކަށް ވަނީ ހާމަވެފައެވެ.
ޝަޒޯކީ އޭނާގެ އަމިއްލަ ދިފާއުގައި ވިދާޅުވެފައިވަނީ، މިމައްސަލާގެ ތަހުގީގަށް ހުރަސްއެޅޭފަދަ އެއްވެސް އަމަލެއް އޭނާ ހިންގާފައި ނުވާނެ ކަމަށެވެ. އަދި ތަހުގީގު ޓީމުން ތުހުމަތު ކުރާގޮތަށް، މިމައްސަލަ އޭރު ބަލަމުންދިޔަ ގާޒީއަށް އޭނާގެ ފަރާތުން ވަޒީފާއެއްވެސް ލިބިފައި ނުވާ ކަމަށާއި އަދި 2014 ވަނަ އަހަރު އެގާޒީ ރިޓަޔަރވެސް ކުރައްވާފައި ނުވާކަމަށެވެ.
ޝަޒޯކީއަކީ އަދިވެސް ފްރާސްގައި ގިނަބައެއް ތާއީދު އޮންނަ ފަރާތަކަށްވެފައި އަދި، ކޮންޒަވޭޓިވް ޕާޓީގެ ތެރޭގަވެސް އަދިވެސް ނުފޫޒު ގަދަ މީހަކަ ވުމާއިއެކު، މި ޝަރީއަތަށް ގިނަބައެއްގެ ސަމާލުކަން ފްރާންސްގައި ވަނީ ހުއްޓިފައެވެ. ޝަޒޯކީ ވަނީ ފްރާންސްގެ ފާއިތުވެދިޔަ އިންތިޚާބުގައިވެސް ވާދަކުރެއްވުމަށް މަސައްކަތް ކުރައްވާފައެވެ.
ޝަޒޯކީ އަބަދުވެސް ވިދާޅުވަމުން ގެންދެވީ އޭނާ އެއްވެސް ކުށެއް ނުކުރާ ކަމަށާއި އަދި، މިއީ ސިޔާސީ މަގުސަދުތަކެއް ހާސިލް ކުރުމަށް ކުރިޔަށް ގެންދެވޭ ޝަރީއަތެއް ކަމުގައެވެ.
