ކުރީގެ ރައީސް އަދި އިދިކޮޅު ރިޔާސީ ކެންޑިޑޭޓު ޢަބްދުﷲ ޔާމީން ޢަބްދުލްޤައްޔޫމުގެ މައްޗަށް ދަޢުލަތުން ކުރި ޚިޔާނާތުގެ 2 ދަޢުވާ ސާބިތުވެ 11 އަހަރަށް ޖަލަށް ލާން މިއަދު ކުރިމިނަލ ކޯޓުން ހުކުމް ކުރުމާއި ގުޅިގެން، ހުކުމް ތަންފީޒުކުރުމަށް މިރޭ މާފުށި ޖަލަށް ގެންގޮސްފިއެވެ.

ޔާމިނުގެ މައްޗަށް ސާބިތުވި ޚިޔާނާތާއި މަނީ ލޯންޑަރ ކުރުމުގެ ކުށުގައި، ދެ ހުކުމެއް ކޮށްފައި ވެއެވެ. އެއީ ރިޝްވަތު ގަބޫލުކުރުމާއި މަނީ ލޯންޑަރ ކުރުމުގެ ދައުވާއެވެ. ފުރަތަމަ ދައުވާގައި ކުށް ސާބިތު ވުމާއި ގުޅިގެން ކުރިމިނަލް ކޯޓުން ހުކުމް ކުރީ ޔާމިން 4 އަހަރަށް ޖަލަށް ލާށެވެ. މިހުކުމް އިއްވާފައިވަނީ އަސާސީ މިންގަޑަށްވުރެ އެއްދަރަޖަ މަތިކޮށްފައެވެ. އެއް ދަރަޖަ މަތިކުރި ސަބަބައެއް ކަމުގައި ހުކުމް އިއްވަމުން ގާޒީ ވިދާޅުވެފައިވަނީ، ރައީސް ޔާމިންއަކީ ދައުލަތުގެ ވެރިއެއްގެ ހައިސިއްޔަތުން ރައްޔިތުންނަށް ޖަވާބުދާރީ ވާންޖެހޭ ޒިންމާދާރު މަގާމެއްގައި ހުރި މީހަކަށް ވުމެވެ.

ދެވަނަ ދައުވާ ސާބިތުވެ، ކުރިމިނަލް ކޯޓުން ޔާމިންގެ މައްޗަށް އިއްވާފައިވަނީ 11 އަހަރުގެ ޖަލު ހުކުމެކެވެ. އޭގެ އިތުރުން 5 މިލިއަން ޑޮލަރުން ޖޫރިމާނާކޮށް، އެފައިސާ ކުރިޔަށް އޮތް 6 މަސްދުވަހުގެ ތެރޭގައި މީރާއަށް ދެއްކުމަށްވެސް ކުރިމިނަލް ކޯޓުން ޔާމިންގެ މައްޗަށް ހުކުމް ކޮށްފައިވެއެވެ.

ޔާމިން ޖަލަށް ލުމަށް ކުރިމިނަލް ކޯޓުން ހުކުމް ކުރުމާއި ގުޅިގެން ޖަލަށް ދިއުމަށް ޔާމިން މާލެއިން ފުރާފައިވަނީ 7:45 ހާއިރުއެވެ. އެއަށްފަހު ކަރެކްޝަންސްއިން ކުރި ޓުވީޓެއްގައި ބުނެފައިވަނީ ރައީސް ޔާމީނަށް ހުކުމް ކުރުމާއި ގުޅިގެން މިހާރު ހުރީ އެ ސާވިސްގެ ބެލުމުގެ ދަށަށް ގެނުވި މާފުށި ޖަލުގައި ބަންދު ކުރެވިފައި ކަމަށެވެ.

މިއަދު ކްރިމިނަލް ކޯޓުން ކުރީގެ ރައީސް ޢަބްދުﷲ ޔާމީން ޢަބްދުލް ޤައްޔޫމް އަށާއި ކުރީގެ މަޖްލިސް މެންބަރު ޔޫސުފް ނައީމް ގެ މައްޗަށް ޖަލު ހުކުމެއް ކުރުމާ ގުޅިގެން، މިހާރު ވަނީ މި ސަރވިސްގެ ބެލުމުގެ ދަށަށް ގެނެވި މާފުށީ ޖަލުގައި ބަންދުކުރެވިފައެވެ.

— Maldives Correctional Service (@CorrectionsMv) December 25, 2022

ހުކުމަށްފަހު ޔާމިންގެ ވަކީލުން ވިދާޅުވެފައިވަނީ ކޯޓުން އިއްވާފައިވަނީ އިންސާފްވެރި ހުކުމެއް ނޫންކަމަށާއި، ހުކުމް އިސްތިއުނާފް ކުރުމުގެ މަސައްކަތް މިހާރުން މިހާރަށް ފަށާފައިވާ ކަމުގައެވެ.

ޔާމިންއާއެކު މިމައްސަލާގައި ދައުވާކުރި ޔޫސުފް ނައީމަށްވެސް، ރިޝްވަތު ދިންކަމުގެ ދައުވާ ސާބިތުވެ 3 އަހަރާއި 2 މަހާއި 12 ދުވަހަށް ޖަލަށްލާން ކުރިމިނަލް ކޯޓުންވަނީ ހުކުމް ކޮށްފައެވެ.

ޔޫސުފް ނައީމްގެ މައްޗަށް ހުކުމް އިއްވަމުން ގާޒީ ވިދާޅުވެފައިވަނީ، އަސާސީ މިންގަޑަށްވުރެ އަދަބު ލުއިކުރަންޖެހޭ ސަބަބެއްވެސް އަދި މަތިކުރަންޖެހޭ ސަބަބެއްވެސް ނެތްކަމުގައެވެ. މިގޮތުން ރިޝްވަތު ދިނުމުގެ ކުށުގައި، ކުރީގެ ރައްޔިތުންގެ މަޖިލިހުގެ މެމްބަރުކަންވެސް ކުރައްވާފައިވާ ޔޫސުފް ނައީމް 3 އަހަރާއި 2 މަހާއި 12 ދުވަހަކަށް ޖަލަށްލާން ގާޒީވަނީ ހުކުމް ކުރައްވާފައެވެ.