އިންޑިއާއަށް ދުނިޔޭގެ 5 ގައުމަކުން އެތެރެވާ މީހުން ނެގެޓިވް ކޯވިޑް ޓެސްޓެއް އޮންނަން ޖެހޭގޮތަށް އެގައުމުން ހަމަޖައްސައިފިއެވެ. އޭގެ ތެރޭގައި ހިމެނެނީ ޗައިނާ، ޖަޕާން، ސައުތު ކޮރެއާ، ހޮންގ ކޮންގ އަދި ތައިލޭން ކަމަށް އިންޑިއާއިން ފެޑެރަލް ހެލްތު މިނިސްޓަރ ވިދާޅުވެފައި ވެއެވެ.
އިންޑިއާގެ ހެލްތު މިނިސްޓަރ ކަންސުޚު މަންޑަވިޔާ ކުރެއްވި ޓުވީޓެއްގައި ވިދާޅުވެފައިވަނީ މިގައުމުތަކުން އެގައުމަށް އެތެރެވާ މީހުންގެ ކިބައިން ކޯވިޑްގެ އަލާމާތެއް ނުވަތަ ކޯވިޑް ޓެސްޓް ޕޮޒިޓިވް ވެއްޖެނަމަ އެމީހުން ކަރަންޓީނުގައި ތިބެން ޖެހޭނެ ކަމުގައެވެ.
44 މިލިއަން މީހުން ކޯވިޑަށް ޕޮޒިޓިވްވެ، އެމެރިކާއާއި ޖެހިގެން، މިހާތަނަށް ދުނިޔެއިން 2 ވަނައަށް އެންމެ ގިނަ އަދަދެއްގެ މީހުން ކޯވިޑަަށް ޕޮޒިޓިވް ވެފައިވާ އިންޑިއާއިންވަނީ އެގައުމަށް ދަތުރުކުރާ ޕަސެންޖަރުންގެ 2 އިންސަތައް މީހުން ޓެސްޓު ކުރަން ފަށާފައެވެ.
ހެލްތު މިނިސްޓްރު މަންޑަވިޔާ އިންޔާގެ ގާނޫނުހަދާ މަޖިލިހުގައި ވާހަކަ ދައްކަވަމުން ވިދާޅެވެފައިވަނީ މި އާ އުސޫލު ހަމަޖައްސަން ޖެހުނީ އަވައްޓެރި ޗައިނާގައި އާދަޔާ ޚިލާފަށް ކޯވިޑް19 ފެތުރެން ފެށުމާއި ގުޅިގެން ކަމުގައެވެ.
އިންޑިއާއިން ކޯވިޑާއި ދެކޮޅަށް އަޅާފައިވާ ފިޔަވަޅުތަކުގެ ތެރެއިން މާސްކު އެޅުންފަދަ ފިޔަވަޅުތަކަށް ލުއިދީފައިވަނީ މިއަހަރު ކުރީކޮޅުއެވެ. އެއީ ބައްޔަށް ޕޮޒިޓިވް ވަމުންދާ މީހުން އަދަދު މަދުވުމާއި ގުޅިގެންނެވެ. އިންޑިއާގެ ހެލްތު މިނިސްޓްރީން ބުނެފައިވާ ގޮތުގައި އެގައުމުގައި މިހާރުތިބި ކޯވިޑަށް ޕޮޒިޓިވް ވެފައިވާ މީހުންގެ އަދަދަކީ 3,400 މީހުންނެވެ.
މަންޑަވިޔާ ވިދާޅުވެފައިވަނީ އާ ކޭސެތައް ފެންނަމުންދާ ގައުމުތަކުން ފްލައިޓްތައް ދަތުރުކުރުން މާނާކުރުމުގެ ވިސްނުމެއް ސަރުކާރުން ނުގެންގުޅޭ ކަމުގައެވެ.
