ދިރާސީ އަހަރުގެ ފުރަތަމަ ޓާމުގެ ކިޔެވުން ނިމި މިއަދު ޗުއްޓީ ފެށުމާއެކު ތަންތަނަށް ފުރާއިރު ސަމާލުވުމަށް ފުލުހުން އިލްތިމާސްކޮށްފިއެވެ.
ފުލުހުން ބުނީ އަމާން ރައްކާތެރި އުފާވެރި ޗުއްޓީއަކަށް މި ޗުއްޓީ ހެދުމަށްޓަކައި ރަށުން ބޭރަށް ފުރަންދިއުމަށް ގެއިން ނުކުތުމުގެ ކުރިން ސަމާލުކަން ދޭންޖެހޭ ކަންކަން ހުންނާނެކަން ހަނދާންކުރަން ޖެހޭކަމަށެވެ. އެގޮތުން މުދަލާއި ގެދޮރުގެ ސަލާމަތާއި ރައްކާތެރިކަމަށާއި ހިނގާފާނެ ހާދިސާއަކުން ރައްކާތެރިވުމަށް ފުލުހުން ވަނީ އިލްތިމާސްކޮށްފައެވެ.
ފުލުހުން އެދެނީ ޗުއްޓީއަށް ދިއުމަށް ރަށުން ބޭރަށް ފުރަންދާން ގެއިން ނުކުތުމުގެ ކުރިން ގެދޮރު ރަނގަޅަށް ތަޅުލެވުނުތޯ ޔަގީންކޮށްލުމަށެވެ. ފެންލައިޓް، ވައިގޮޅި، ގޭގެ ކުޑަދޮރުތައް އަދި ބެލްކަނި ދޮރުވެސް ތަޅުލެވުނުތޯ ޔަގީންކޮށްލުމަށެވެ. ގޭ ދޮރުމަތީގައި އޮންނަ ފައިފުހި ދަށުގައި ނުވަތަ ފައިވާން ހަރުގައި ހުންނަ ބޫޓު ތެރެއަށް ލާފައި ތަޅުދަނޑި ނުބޭއްވުމަށެވެ. ދުވާލަކު އެއްފަހަރު، ގެދޮރު ބެލޭނެ އިންތިޒާމު ހަމަޖައްސާފައި ދިއުމާއި ގެ ތަޅުލާފައިދާނަމަ ގޭގައި އަލިކަމެއް ހުންނާނެހެން ބެހެއްޓުމަށެވެ. ނުވަތަ ރޭގަނޑުގެ ވަގުތުގައި ގެ ދިއްލައި، ބެލެހެއްޓޭނެ އިންތިޒާމު ހަމަޖެއްސުމަށް ޒިންމާދާރު ކޮންމެވެސް މީހަކާ ހަވާލުކުރާށެވެ. އެއީ މުދަލާއި ގެދޮރުގެ ސަލާމަތާއި ރައްކާތެރިކަމަށް އެޅޭނެ ވަރަށް މުހިންމު ފިޔަވަޅެއްކަމަށް ފުލުހުން ބުނެއެވެ.
އަދި ގޭގައި ހުންނަ އަގުބޮޑެތި އުފުލޭ މުދާ ރައްކާތެރިކުރުމަށް ސަމާލުކަން ދިނުމަށްވެސް ފުލުހުން އިލްތިމާސްކުރެއެވެ. އެގޮތުން ލެޕްޓޮޕް، އައިޕެޑް، ޓެބްލެޓް، ގަހަނާ އަދި އެހެނިހެން ތަކެތި، ތަޅުލެވޭ ތަނެއްގައި ރައްކާކުރުމަކީ މުދަލުގެ ރައްކާތެރިކަމަށް އެޅޭނެ މުހިންމު ފިޔަވަޅެއްކަމަށާ، ގޭގައި ގިނަ އަދަދެއްގެ ފައިސާ ނުބެހެއްޓުމަށްވެސް ފުލުހުން އިލްތިމާސްކުރެއެވެ.
މީގެއިތުރުން ޗުއްޓީއަށް ފުރަންދިއުމަށް ގެއިން ނުކުތުމުގެ ކުރިން، ގޭތެރޭގައި ހިނގާފާނެ އަލިފާނުގެ ހާދިސާއަކުން ރައްކާތެރިވުމުުގެ ފިޔަވަޅުއަޅުމަށްވެސް ފުލުހުން އެދެއެވެ. ގޭސް ލީކުވާގޮތަށް ހުރިނަމަ އެކަން ރަނގަޅުކޮށްލުމާއި ނުވަތަ ގޭސްފުޅި ރެގިއުލޭޓަރ ނައްޓައިލުން ނުވަތަ ގޭތެރޭގެ ކަރަންޓުގެ ހާލަތު ރަނގަޅުތޯ ކަށަވަރުކުރުމާއެކު ކަރަންޓު ޝޯޓޭޖެއް އައިސްގެން ނުވަތަ އެނޫންވެސް ގޮތަކުން ވިޔަސް އަލިފާނުގެ ހަދިސާއެއް ނުހިނގާނެ ފަދަ ގޮތަކަށް ގޭތެރޭގެ ކަންކަން ހަމަޖައްސުމުގެ މުހިންމުކަން ވަނީ ފާހަގަކޮށްފައެވެ.
ކޮންމެ އަހަރެއްގެވެސް ޗުއްޓީ ދުވަސްވަރު މީހުން ތަންތަނަށް ފުރައިގެން ދިއުމުން ގޭގެއިން ވައްކަންކުރުމުގެ މައްސަލަތައް އިތުވެއެވެ. އެހެންވެ މިކަން ހުއްޓުވުމަށް ފުލުހުން އަންނަނީ އެކިކަހަލަ ފިޔަވަޅުތައް އަޅަމުންނެވެ.
