މިއަހަރު ދައުލަތުގެ ޢާމްދަނީ ކުރިއަރާނެކަމަށް ލާފާކުރި މިންވަރުން، ނިސްބަތުން ބަލާއިރު މިއަހަރުގެ މިހާތަނަށް، %4.98 ޢާމްދަނީ އިތުރުވެފައިވާކަމަށް ފިނޭންސް މިނިސްޓްރީން ހާމަކޮށްފިއެވެ.
އެމިނިސްޓްރީގެ ތަފާސްހިސާބަށް ބަލާއިރު ޖެނުއަރީ 1އިން ޑިސެންބަރު 15އަށް 25.4 ބިލިއަން ރުފިޔާ ޢާމްދަނީގެގޮތުގައި ލިބިފައިވެއެވެ. މިއަހަރުގެ މިހާހިސާބަށް ލިބޭނެކަމަށް ކުރިން އަންދާޒާކުރީ 24.2 ބިލިޔަން ރުފިޔާއެވެ. އެހެންކަމުން މިއީ %4.98 އިތުރުވުމެކެވެ.
ދައުލަތަށް އެންމެބޮޑު ޢާމްދަނީއެއް ލިބެނީ ޓެކްސް ފައިސާއިންނެވެ. މިމުއްދަތުގައި 18.1 ބިލިޔަން ރުފިޔާ ޓެކްސް ޢާމްދަނީގެގޮތުގައި ލިބިފައިވެއެވެ. ޖީއެސްޓީގެ ގޮތުގައި 8.9 ބިލިޔަން ރުފިޔާ ލިބިފައިވެއެވެ. ޓީޖީއެސްޓީގެ ގޮތުގައި 6 ބިލިޔަން ރުފިޔާ ލިބިފައިވެއެވެ. އަދި އިމްޕޯޓް ޑިއުޓީގެ ގޮތުގައި 3،2 ބިލިޔަން ރުފިޔާލިބިފައިވެއެވެ. މީގެއިތުރުން ބީޕީޓީގެ ގޮތުގައި، 2.1 ބިލިޔަން ރުފިޔާ ލިބިފައިވެއެވެ. ޓެކްސް ނޫން އާމްދަނީގެ ގޮތުގައި 7.1 ބިލިޔަން ރުފިޔާ ލިބިފައިވެއެވެ. ޓެކްސް ނޫން އާމްދަނީގެ ތެރޭގައި ހިމެނެނީ އެއަރޕޯޓު ޑިވެލޮޕްމަންޓު ފީ އާއި، ސަރުކާރު ހިއްސާވާ ކުންފުނިތަކުން ލިބޭ ޑިވިޑެންޓާއި ޕްރޮޕަރޓީ އިންކަމް ފަދަ އާމްދަނީއެވެ.
