މިއަދު އިދިކޮޅު ފަރާތްތަކުން ބައްދަލުކުރަން ދިއުމުން ޕީއެސްއެމްގެ މެނޭޖިން ޑިރެކްޓަރ ޢަލީ ޚާލިދު ވަނީ ވަލު ދޮރުން ނުކުމެ ފިލާފައިކަމަށް ޕީޕީއެމްއިން ބުނެފިއެވެ.
ދައުލަތުގެ މީޑިއާ، ޕަބްލިކް ސަރވިސް މީޑިއާ (ޕީއެސްއެމް) ސިޔާސީ ވެފައިވާކަމަށްބުނެ އިދިކޮޅު ޕީޕީއެމްއާއި ޕީއެންސީގެ ލީޑަޝިޕުން ޕީއެސްއެމްދޮށަށް އެއްވެފައެވެ. އިދިކޮޅު ލީޑަރޝިޕުން ދިޔައީ ޕީއެސްއެމްގެ އިސްވެރިންނާ ބައްދަލުކުރުމަށެވެ. އެހެންނަމަވެސް ޕީއެސްއެމްގެ ވެރިން އެބޭފުޅުންނާ ބައްދަލުކުރައްވާފައެއް ނުވެއެވެ.
ޕީޕީއެމްއިން ބުނީ ދައުލަތުގެ މީޑިއާ ސިޔާސީކޮށް، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ޕްރޮމޯޝަން ޖައްސައި އިދިކޮޅަށް އެއްވެސް ފުރުސަތެއް ނުދޭކަމަށެވެ. އެއީ ޕަބްލިކް ސަރވިސް މީޑިއާގެ ޤާނޫނާ ޚިލާފަށް ޕީއެސްއެމްގެ މެނޭޖުމަންޓުން ކުރަމުންދާ ޢަމަލެއްކަމަށްވެސް ޕީޕީއެމްއިން ބުނެއެވެ. އެހެންކަމުން ޕީއެސްއެމް ހިންގާގޮތާމެދު ރައްޔިތުންގެ ހުރި ކަންބޮޑުވުންތަކާއި ޕީއެސްއެމްގެ މުވައްޒަފުންނަށް ބިރުދައްކައި މުވައްޒަފުން ނިކަމެތި ކުރަމުންދާތީއާއި، ރިޔާސީ އިންތިޚާބު ބޯމަތިވާއިރު އެމްޑީޕީ ބޭނުންވާގޮތަށް ޕީއެސްއެމް ހިންގަމުންދާތީ، މިކަންކަމުގެ ކަންބޮޑުވުން ފާޅުކުރުމަށް ޕްރޮގްރެސިވް ކޮންގްރެސް ކޯލިޝަންގެ ލީޑަރޝިޕުން ޕީއެސްއެމްގެ ސީއީއޯއާއި ބައްދަލުކުރެއްވުމަށް މިއަދު ދިޔަކަމަށެވެ.
ދައުލަތުގެ މީޑިއާ ސިޔާސީކޮށް، އިބްރާހީމް މުހައްމަދު ސޯލިހުގެ ޕްރޮމޯޝަން ޖައްސާ، އިދިކޮޅަށް އެއްވެސް ފުރުސަތެއް ނުދީ ޕަބްލިކް ސަރވިސް މީޑިއާގެ ޤާނޫނާ ޚިލާފަށް ޢަމަލުކުރަމުންދާތީއާއި، ޕީއެސްއެމް ހިންގާގޮތާމެދު ރައްޔިތުންގެ ހުރި ކަންބޮޑުވުންތަކާއި މުވައްޒަފުންނަށް ބިރުދައްކާ 1/3 pic.twitter.com/AxHUEM0iKa
— Progressive Party of Maldives (@ProgressPartyMV) December 18, 2022
އެހެންނަމަވެސް އިދިކޮޅު ފަރާތްތަކަށް ވަގުތުނުދެއްވައި ޕީއެސްއެމްގެ މެނޭޖިން ޑިރެކްޓަރ ޢަލީ ޚާލިދު ވަލު ދޮރާށިން ފިއްލަވައިގެން ބޭރަށް ވަޑައިގެންފައިވާކަމަށް ޕީޕީއެމްއިން ބުނެއެވެ. އެހެންނަމަވެސް ޕީއެސްއެމް ޒިންމާދާރު ކުރުމަށްޓަކައި އިދިކޮޅު ކޯލިޝަނުން އަދިވެސް ޕީއެސްއެމްއަށް ދާނެކަމަށް ޕީޕީއެމްއިން ބުނެއެވެ.
ކޮމެންޓު ފޮނުވާ