ތިމަލާގެ ބްރިޖްގެ މަސައްކަތްތައް ކުރިއަށް ދިއުމުގައި ތަފާތު އެކި ތާރީޚުތައް ދެމުންދާތީ ބްރިޖުގެ މަސައްކަތާއިމެދު ގިނަބައެއްގެ ހިތުގައި އުފެދޭ ސުވާލުތައް ގިނަ ވެފައިވާކަމަށް ދީނީ އިލްމުވެރިޔާ ޑރ.މުހައްމަދު އިޔާޒު ވިދާޅުވެއްޖެއެވެ.
ޑރ.އިޔާޒު މިހެން ވިދާޅުވީ އެނާއާއި އެކުވެރި ޝައިޚު އަލީ ޒައިދު ބްރިޖާއިމެދު އުފެއްދި ސުވާލުތަކާއި ގުޅިގެން ކުރެއްވި ޓުވީޓުގައެވެ. ޝައިޚު ޒައިދު ވިދާޅުވީ ބްރިޖާއިމެދު ރައްޔިތުން ކުރަމުންދިޔަ އިތުބާރު ދުވަހެއް ދުވަހަކަށް ދަނީ ދަށަށް ކަމުގައެވެ. އެފްކޯއިން މަސައްކަތް ކުރާ ގޮތާއި، އެކުންފުނީގެ ގާބިލްކަމާއިމެދު ގިނަބައެއްގެ ހިތުގައި ސުވާލު އުފެދޭކަމަށް ޝައިޚު ޒައިދު ވިދާޅުވިއެވެ.
އަލިފާނުގެ ޙާދިސާ ހިނގައި ބްރިޖް އަޅަން މަސައްކަތްކުރާމުންދާ އެފްކޮން މުވައްޒަފުންނަށް އަވަސް ޝިފާއަކަށް އެދެން! އަދި ކެތްތެރިކަމަށް އެދެން! ނަމަވެސް ބްރިޖާމެދު އޮތް އިތުބާރު މިދަނީދުވަހެއް ދުވަހަކަށް ދަށަށް! އެފްކޮންގެ ގާބިލިއްޔަތާމެދު ސުވާލު ޢާންމުންގެ ހިތްތަކުގައި ވަރަށް އެބައޮތް!
– ޝައިޚު އަލީ ޒައިދު ވިދާޅުވިއެވެ.
މިވާހަކަތަކާއި ގުޅިގެން ޑރ.އިޔާޒު ވިދާޅުވީ މިބްރިޖަކީ ރައްޔިތުންގެ ވިންދާއި އިހުސާސާއި ގުޅިފައިވާ ބްރިޖަކަށް ވީނަމަވެސް ބްރިޖުގެ މަސައްކަތް ކުރިއަށްދާ ގޮތާއި، ތަފާތު އެކި ދުވަސްތަކުގައި ދީފައިވާ ތާރީހުތަކުގެ ސަބަބުން ރައްޔިތުންގެ ހިތުގައި މިކަމުގައި ގިނަ ސުވާލުތަކެއް އުފެދިފައިވާކަމަށެވެ.
ތިލަމާލެ ބްރިޖަކީ ދިވެހިންގެ ވިންދާއި ގުޅިފައިވާ ތަނަކަށްވިޔަސް އެކި ފަހަރު އެކި ތާރީޚް ދޭތީ ވަރަށް ސުވާލު އުފެދޭ. 2023 ޖުލައި 26 އަށް ނިމޭނެކަމަށް ބުނި ބައި 2023 ޑިސެމްބަރަށް ލަސްވެއްޖެ. އެކަމު މަސައްކަތް ދަނީ ޝެޑިއުލާއި އެއްގޮތަށޯ.
– ޑރ.އިޔާޒު ވިދާޅުވިއެވެ.
ބްރިޖުގެ މަސައްކަތްތައް ކުރިއަށްދާ ގޮތާއިމެދު ގިނަ ބައެއްގެ ފާޑުކިޔުން އަމާޒުވަމުންދަނީ، އެކުންފުނީގެ މަސައްކަތްތަކުގައި ދިމާވާ އެކި ކަންކަމާއި ގުޅިގެންނެވެ. ބްރިޖް ޕްލެޓްފޯމް އެކިފަހަރު މަތީން ފަރަށް އެރުމާއި، ބްރިޖުގެ ކެރޭން ކަނޑައިގެން ދިޔަ ދިއުމާއި، ބްރިޖްގެ ތަނބުތައް ޖެހުމަށް މަސައްކަތް ކުރަމުންދާ ގޮތާއިމެދުވެސް ގިނަ ބައެއްގެ ހިތުގައި ދަނީ ސުވާލު އުފެދެމުންނެވެ.
ބްރިޖްގެ މަސައްކަތް ކުރިއަށްގެންދަނީ އިންޑިއާގެ އެފްކޮންސް އިންފްރާސްޓްރަކްޗާރ ލިމިޓެޑުންނެވެ. ޕްލޭނިންގ މިނިސްޓްރީން ވިދާޅުވީ، އެއްބަސްވުމުގައިވާ ޓައިމްލައިނާ އެއްގޮތަށް މަސައްކަތްތައް ކުރިއަށްދާނެކަމަށެވެ. ފުރަތަމަ ބައިގައި ހިމެނޭ މާލެއިން ގުޅީފަޅާ ހަމައަށް ގުޅާލުމުގެ ހުރިހާ މަސައްކަތެއް 2023 ވަނަ އަހަރުގެ ޑިސެމްބަރަށް ނިންމާނެއެވެ. މާލެއިން ވިލިމާލެއަށް ބްރިޖްގެ މަސައްކަތް އަންނަ އަހަރުގެ ޖުލައި މަހަށް ނިންމުމަށްވަނީ އެއްބަސްވުމުގައި ހިމަނާފައެވެ.
ތިލަމާލެ ބްރިޖްގެ ދިގުމިނަކީ 6.7 ކިލޯ މީޓަރެވެ. މި މަޝްރޫޢުގައި ހިމެނެނީ ބްރިޖް އަދި ލިންކިން ރޯޑް ތަކެކެވެ. މުޅި މި މަޝްރޫޢުއަށް 500 މިލިއަން ޑޮލަރު ހޭދަވާނެއެވެ. އެއީ 7 ބިލިއަނަށްވުރެ ގިނަ ރުފިޔާއެވެ. މި މަޝްރޫޢު ކުރިއަށް ގެންދަނީ އިންޑިއާ ސަރުކާރުން ދޭ 100 މިލިއަން ޑޮލަރުގެ ގްރާންޓާއި 400 މިލިއަން ޑޮލަރުގެ ލައިން އޮފް ކްރެޑިޓްގެ ދަށުންނެވެ. އަދި ދަޢުލަތުން ޚަރަދުކުރުމަށްވެސް ވަނީ ހަމަޖެހިފައެވެ. ތިލަމާލެ ބްރިޖްގެ މުޅި މަޝްރޫޢު ނިމޭނެކަމަށް ސަރުކާރުން ހާމަކޮށްފައިވަނީ 2024 ވަނަ އަހަރުއެވެ.
