މީގެ 34 އަހަރު ކުރިން ސްކޮޓްލޭންޑްގެ ލޮކަބީ މަތިން ދަތުރު ކުރަނިކޮށް، ބޮމެއް ގޮއްވާލާ ވައްޓާލި ޕޭން އޭމް ފްލައިޓް 103ގައި ހަރުކޮށްފައިވާ ބޮން ތައްޔާރު ކުރިކަމަށް ތުހުމަތު ކުރެވޭ ލީބިޔާގެ ރައްޔިތަކު އިނގިރޭސިވިލާތުގެ ސްކޮޓިޝް އޮތޯރިޓިތަކުން ހައްޔަރު އޭނާ އެމެރިކާގެ ތަހުގީގީ އިދާރާއާއި ހަވާލު ކޮށްފިއެވެ.
ލީބިޔާގެ ރައްޔިތެއް ކަމުގައިވާ އަބޫ އަގްލިއާ މަސްއޫދުގެ މައްޗަށް ދައުވާ އުފުލާފައިވާކަން އެމެރިކާއިން ހާމަކޮށްފައިވަނީ މީގެ 2 އަހަރު ކުރިންނެވެ. އޭނާގެ މައްޗަށް އެމެރިކާއިން ތުހުމަތުކުރަނީ ލޮކަބީ ބޮމުގެ ހާދިސާގައި، 1988 ވަނަ އަހަރުގެ ޑިސެމްބަރުމަހުގެ 21 ވަނަ ދުވަހު، ޕޭން އޭމް ފްލައިޓް 103ގައި ގޮއްވާލި ބޮން ތައްޔާރު ކުރުމުގައި އޭނާ މުހިންމު ދައުރެއް އަދާ ކޮށްފައިވާ ކަމުގެ ތުހުމަތެވެ.
މި ހާދިސާއަކީ އިނގިރޭސިވިލާތުގެ ތާރީޚުގައި ހިންގާފައިވާ ޓެރަރިޒަމްގެ މިފަދަ އެންމެ ބޮޑު ހާދިސާއެވެ. މި ހާދިސާގައި ބޮއިން 747 މަރުކާގެ ބޯޓުން ދަތުރު ކުރަމުންދިޔަ 259 މީހަކު ހިމެނޭ ގޮތުން ޖުމްލަ 270 މީހުން މަރުވެފައިވެއެވެ.
މީގެ ތެރޭގައި ހިމެނެނީ ބޯޓުގައި ދަތުރު ކުރަމުންދިޔަ ޕަސެންޖަރުންގެ އިތުރުން ބޯޓުގެ ކުރޫންނާއި، އިގިރޭސިވިލާތުގެ ލޮކަބީމަތިން އުދުހެމުން ދަނިކޮށް ބޯޓު ގޮވާ، ބިމަށް ވެއްޓުނު ބޯޓުގެ ބައިތަކުން ޖެހި ހަލާކުވި ގެތަކުގައި ދިރިއުޅެމުންދިޔަ 11 މީހެކެވެ.
ލީބިއާގެ ހަގުރާމަވެރި ޖަމާއަތަކުންވަނީ، މިމައްސަލާގައި މިހާރު އެމެރިކާގެ ތަހުގީގީ އިދާރާތަކުގެ ބެލުމުގެ ދަށަށް ގެންވިފައިވާ މަސްއޫދު ފާއިތުވެދިޔަމަހު ކިޑްނެޕް ކޮށްފައެވެ. އޭރުވެސް މި ގުރޫޕުން އޭނާ އެމެރިކާއާއި ހަވާލު ކުރާނެކަމަށް އަޑުތައް ފެތުރިފައި ވެއެވެ.
އެމެރިކާގެ ޖަސްޓިސް ޑިޕާޓްމަންޓާއި ހަވާލާދީ ރޮއިޓާސްއިން ރިޕޯޓު ކޮށްފައިވާ ގޮތުގައި މަސްއޫދު އެންމެ ފުރަތަމަ ހާޒިރު ކުރުމަށް ހަމަޖެހިފައިވަނީއެމެރިކާގެ ވޮޝިންގޓަންގައި ހުންނަ ފެޑެރަލް ކޯޓަކަށެވެ.
މީގެ 5 އަހަރު ކުރިންވެސް މަސްއޫދުވަނީ ބޮން އުފެއްދުމުގެ ކުށުގައި ލީބިޔާގައި ޖަލަށް ލާފައެވެ.
ލޮކަބީ ބޮމުގެ ހާދިސާގައި މިހާތަނަށް ޖަލަށް ލާފައިވަނީ އެންމެ މީހެކެވެ. އެއީ 2001 ވަނަ އަހަރު، ނެދަރލޭންޑުގެ ކޯޓެއްގައި ހިންގުނު ޝަރީއަތަކަށްފަހު، ޕޭން އޭމް ފްލައިޓް 103 ބޮން ގޮވި ހާދިސާގައި ޝާމިލްވާކަމަށް ސާބިތުވެ، ލީބިޔާގެ އަބުދުލްބާސިތު އަލް މެގްރާހީ އުމުރަށް ޖަލަށް ލާން އެކޯޓުން ހުކުމް ކުރުމާއި ގުޅިގެންނެވެ.
މެގްރާހީ އުމުރަށް ޖަލަށް ލާން ނެދަރލޭންޑްގެ ކޯޓަކުން ހުކުމް ކުރިނަމަވެސް، ސްކޮޓިޝް ސަރުކާރުން އޭނާ ޖަލުން މިނިވަން ކުރުމަށް ނިންމާފައިވަނީ 2009 ވަނަ އަހަރު، އޭނާއަށް ކެންސަރު ޖެހުމާއި ގުޅިގެންނެވެ. އޭރު މަދު މަސްތަކެއްގެ ތެރޭ އޭނާ މަރުވާނެކަމަށް ޑޮކްޓަރުން ބުނި ނަމަވެސް އޭނާ މަރުވެފައިވަނީ 2012 ވަނަ އަހަރުއެވެ.
ބުނެވެ ގޮތުގައި، އެމެރިކާއިން މިހާރު ހައްޔަރު ކޮށްފައިވާ މަސްއުދުވަނީ މެގްރާހީއާއެކު ޕޭން އޭމް ފްލައިޓް 103 ގޮއްވާލުމުގައި ބައިވެރިވެފައިވާކަމަށް، އޭނާ ލީބިޔާގެ ޖަލުގައި ބަންދު ކޮށްފައިވަނިކޮށް އެއްބަސް ވެފައެވެ.
