ޕޮލިސް ބޯޑުން ހުސްވެފައިވާ ގޮނޑިއަށް ކުރީގެ ކޮމިޝަނާ އޮފް ޕޮލިސް އަހުމަދު ފަސީހު އައްޔަނުކުރައްވައިފިއެވެ.
ފަސީހުވަނީ ކުރީގެ ރައީސް މުހައްމަދު ނަޝީދުގެ ސަރުކާރުގައި ކޮމިޝަނަރ އޮފް ޕޮލިސްގެ މަޤާމު ފުރުއްވާފައެވެ. އޭގެފަހުން ފަސީހުވަނީ އެމްޓީސީސީގެ ޑެޕިއުޓީ ސީއީއޯގެ މަޤާމުވެސް ފުރުއްވާފައެވެ.
ޕޮލިސް ބޯޑަށް ފަސީހު އައްޔަން ކުރެއްވާފައިވަނީ އެބޯޑުގެ މެމްބަރު އަދި ބޯޑުގެ ރައީސް އަލީ ފާއިޒުގެ ބަދަލުގައެވެ. ފާއިޒު ވަނީ ލަންކާގައި ހުންނަވާ ދިވެހިރާއްޖޭގެ ސަފީރުކަމުގެ މަޤާމަށް ހަމަޖައްސަވާފައެވެ. ފާއިޒަކީ ޕޮލިސް ބޯޑުގެ ރައީސަށްވުމުން، ރައީސަކު އައްޔަން ކުރުމަށްޓަކައި ޕޮލިސް ބޯޑުގެ ބައްދަލުވުމެއް ބާއްވައި ވަރަށް އަވަހަށް ބޯޑުގެ ރައީސަކު އައްޔަން ކުރުމަށްވެސް ވަނީ ހަމަޖެހިފައެވެ.
ފުލުހުންގެ ގާނޫނުގެ 78 ވަނަ މާއްދާ ބުނާ ގޮތުން ބޯޑުގެ ރައީސް އަކީ ބޯޑުގެ މެންބަރުންގެ މެދުގައި ވޯޓު ނަގައިގެން ހޮވޭ މަގާމެކެވެ. ނަމަވެސް ރައީސްގެ މަގާމު ހުސްވުމުން އެ މަގާމަށް ބޭފުޅަކު އިންތިހާބުކުރަންޖެހޭ މުއްދަތެއް އެ ގާނޫނުގައި ބަޔާންކޮށްފައެއް ނުވެއެވެ.
"ޕޮލިސް ބޯޑު"ގައި ހިމެނިވަޑައިގަންނަވަނީ ރައީސުލްޖުމްހޫރިއްޔާ ޢައްޔަންކުރާ ދެ މެންބަރުންނާއި، ފަންނީ ދާއިރާއަކުން ތަޢުލީމާއި ތަޖުރިބާ ލިބިފައިވާ ތިން މެންބަރުންނާއި، ޢާންމުކޮށް ހުޅުވާލައިގެން ޢާންމު ރައްޔިތުންގެ ތެރެއިން، ކުރިމަތިލާ 2 މެންބަރުންނެވެ.
