އިންޑޮނޭޝިއާގައި ކައިވެނިން ބޭރުން ޖިންސީ ގުޅުން ހިންގުމަކީ ކުށަކަށް ހަދާ، ނަހަމަ ގޮތުގައި ޖިންސީގުޅުން ހިންގާ މީހުންނަށް އެއް އަހަރުދުވަހުގެ ޖަލު ހުކުމެއް އަންނަ ގޮތަށް ގާނޫނުލް އުގޫބާތު އިސްލާހުކޮށް، އެ އިސްލާހު އިންޑޮނޭޝިއާގެ ގާނޫނުހަދާ މަޖިލިހުން ފާސް ކޮށްފިއެވެ. އެހެންނަމަވެސް މި އިސްލާހަށް އަމަލުކުރަން ފަށާގޮތަށް ހަމަޖެހިފައިވަނީ 3 އަހަރު ފަހުންނެވެ.
މިއަދު އިންޑޮނޭޝިއާގެ ގާނޫނުލް އުގޫބާތަށް އިސްލާހު ގެނެސްފައިވާއިރު، ފާސްކޮށްފައިވާ އިސްލާހުތަކުގެ ތެރޭގައި، އެގައުމުގައި އޮތް ސިޔާސީ މިނިވަންކަން ހަނިކުރުމަށްވެސް ވަނީ ގާނޫނުތަކަށް އިސްލާހު ގެނެސްފައެވެ.
ގާނޫނުލް އުގޫބާތަށް އިސްލާހުގެނެސް މިއަދު ފާސްކޮށްފައިވާ މި އިސްލާހުތަކަށް ފާޑުކިޔާ ފަރާތްތަކުން ބުނެފައިވަނީ މިއީ އެގައުމުގައި އޮތް އިންސާނީ ހައްގުތަކަށް ކުރިމަތިވެގެންދިޔަ ބޮޑު "މުސީބާތެއް" ކަމުގައެވެ. އަދި އޭގެ ނޭދެވޭ އަސަރު އެގައުމުގެ ފަތުރުވެރިކަމަށާއި އިންވެސްޓްމަންޓާއި ގުޅުންހުރި ސިނާއަތްތަކަށްވެސް ކުރާނެކަމަށް ގިނަބަޔަކު ދެކެއެވެ.
މިއިސްލާހުތަކާއި ދެކޮޅަށް، ޖަކާޓާގައި ހުންނަ ގާނޫނުހަދާ މަޖިލިހުގެ ބޭރުގައި ގިނަ އަދަދެއްގެ ޒުވާނުންވަނީ މިހަފްތާގައި މުޒާހިރާވެސް ކޮށްފައެވެ. ބެލެވޭ ގޮތުގައި މިއިސްލާހުތައް ބާތިލް ކުރުމަށް ބައެއް ފަރާތްތަކުން މަތީ ކޯޓުތަކުގައި މައްސަލަ އިސްތިއުނާފް ކުރާނެއެވެ.
ގާނޫނަށް ގެނެވުނު މި އިސްލާހު އިންޑޮނޭޝިއާއަށް ޒިޔާރަތްކުރާ ގައުމުން ބޭރުގެ މީހުންގެ މައްޗަށްވެސް ހިގާނެއެވެ. މީގެ ތެރޭގައި އެގައުމުގެ ބާލީފަދަ މަޝްހޫރު ހޮލިޑޭ ޑެސްޓިނޭޝަންތަކަށް ޒިޔާރަތްކުރާ ގައުމުން ބޭރުގެ މީހުންވެސް ހިމެނެއެވެ. މި އިސްލާހުގައި ވާގޮތުން، ކައިވެނި ނުކޮށް ތިބޭ މީހުން ޖިންސީގުޅުން ހިންގަނިކޮށް ހައްޔަރު ކޮށްފިނަމަ އެމީހަކު ނުވަތަ އެބަޔަކު ގިނަވެގެން އެއް އަހަރުދުވަހުގެ މުއްދަތަކަށް ޖަލަށް ލެވޭނެއެވެ.
މީގެ އިތުރުން ކައިވެނި ނުކޮށް ދެޖިންސުގެ މީހުން އެކީ ދިރިއުޅުންވެސް ގާނޫނުލް އުގޫބާތަށް ގެނެވުނު މި އިސްލާހުންވަނީ މަނާ ކޮށްފައެވެ. މިފަދަ އަމަލެއް ހިންގާ މީހަކުނަމަ އެމީހަކު 6 މަސްދުވަހަށް ޖަލަށް ލެވޭނެއެވެ.
އިންޑޮނޭޝިއާ ގިނަ ވިޔަފާރިވެރިން ވަނީ މި އިސްލާހާއި ދެކޮޅު ހަދާފައެވެ. ސަބަބެއް ކަމުގައި ބުނެފައިވަނީ މި އިސްލާހުގެ ސަބަބުން އެގައުމަށް ޒިޔާރަތްކުރާ މީހުންގެ އަދަދު މަދުވެ އަދި އޭގެ އިތުރުން އިންވެސްޓަރުންގެ ޝައުގުވެރިކަންވެސް ގެއްލިގެން ދާނެއެވެ. އެހެންނަމަވެސް ނި އިސްލާހު ގާނޫނުހަދާ މަޖިލިހުގައި ފާސްވުމާއެކު ގާނޫނުހަދާ މަޖިލިހުގެ މެމްބަރުންވަނީ އުފާ ފާޅުކޮށްފައެވެ.
ގާނޫނުލްއުގޫބާތަށް މިގެނެވޭ އިސްލާހުގައި ވާގޮތުން، ނުހަމަ ގޮތުގައި ޖިންސީ ގުޅުން ހިންގާ ފަރާތްތަކަށް ޖަލު އަދަބު ދިނުމަށް ހަމަޖެހިފައިވަނީ، މިފަދަ ކުށެއް ކޮށްގެން މުވައްސަސާތަކަށް މައްސަލަ ހުށަހަޅައިފިނަމައެވެ.
މި ގާނޫނުގައި ވާގޮތުން، މީހުންނާއި އިދެގެން އުޅޭ މީހުންނަށް އަނބިމީހާ ނުވަތަ ފިރިމީހާ ނުހަމަ ގޮތުގައި ޖިންސީ ގުޅުން ހިންގައިގެން މައްސަލަ ހުށަހެޅޭނެއެވެ. އަދި އޭގެ އިތުރުން މީހުންނާ ނުއިދެ ތިބޭ މީހުންގެ މައިންބަފައިނަށްވެސް ނުހަމަ ގޮތުގައި ޖިންސީ ގުޅުން ހިންގާ މައްސަލަ ކަމާއިބެހޭ މުއައްސަސާތަކަށް ހުށަހެޅުމުގެ ފުރުސަތު ލިބިދީފައި އޮވެއެވެ.
ރޮއިޓާސްއިން ރިޕޯޓު ކޮށްފައިވާ ގޮތުގައި، އެގައުމުގެ ސަރުކާރުން ގާނޫނުލް އުގޫބާތަށް މިގެންނަ އިސްލާހުގެ ސަބަބުން، އެގައުމަކީ ޗުއްޓީ ހޭދަކުރުމަށް މަޝްހޫރު މަންޒިލެއްގެ ގޮތުގައި އޮންނަ އޮތުމަށާއި އޭގެ އިތުރުން އިންވެސްޓްމަންޓް ޑެސްޓިނޭޝަނެއްގެ ގޮތުގައި އޮންނަ އޮތުމަށް ނޭދެވޭ އަސަރު ކޮށްފާނެކަމުގެ ކަންބޮޑުވުން ވިޔަފާރި ގުރޫޕުތަކުން ވަނީ ފާޅު ކޮށްފައެވެ.
އިންޑޮނޭޝިއާއިން 2019ވަނަ އަހަރުވެސް ގާނޫނުލްއުގޫބާތަށް އިސްލާހު ގެނައުމަށް މަސައްކަތް ކޮށްފައިވެއެވެ. އެހެންނަމަވެސް އެފަހަރު އިސްލާހު މަޑުޖައްސަލަންޖެހުނީ އެތައްހާސް ބަޔަކު އެގައުމުގެ އެކި ހިސާބުތަކުގައި ފެށި މުޒާހިރާތަކުގެ ސަބަބުންނެވެ.
