ސައުދީ ރަސްގެފާނު ކިންގ ސަލްމާންގެ ދައުވަތަކަށް ޗައިނާގެ ރައީސް ޝީ ޖިންގޕިންގ ރަސްމީ ދަތުރުފުޅެއްގައި މި ހަފްތާފެ ބުދަ ދުވަހު ސައުދީ އަރަބިއާއަށް ވަޑައިގަންނަވާނެކަމަށް އެގައުމުގެ ރަސްމީ ނޫސް އޭޖެންސީ ސައުދީ ޕްރެސް އޭޖެންސީން ރިޕޯޓު ކޮށްފިއެވެ.
މި ދަތުރުފުޅުގައި މިމަހުގެ 9 ވަނަ ދުވަހު ސައުދީ އަރަބިއާގައި ބޭއްވުމަށް ހަމަޖެހިފައިވާ، ކިންގ ސަލްމާންއާއި ޝީ ޖިންޕިންގ ރިޔާސަތު ބެލެހެއްޓުމަށް ހަމަޖެހިފައިވާ ސައުދީ-ޗައިނީސް ސަމިޓްގައި ޝީ ބައިވެރިވެ ވަޑައިގަންނަވާނެއެވެ. މި ސަމިޓްގައި ސައުދީ އަރަބިއާގެ ވަލީއަހުދު މުހައްމަދު ބިން ސަލްމާންވެސް ބައިވެރިވެވަޑައިގަތުމަށް ވަނީ ހަމަޖެހިފައެވެ.
ސައުދީ ޕްރެސް އޭޖެންސީން ހާމަ ކޮށްފައިވާ ގޮތުގައި، މި ސަމިޓްގެ އެޖެންޑާގައި، ގުޅުން ބަދަހި ކުރުމާއި ތަރައްގީއަށް އަމާޒުކޮށް ބޭއްވޭ ގަލްފް-ޗައިނީސް ސަމިޓުގެ އިތުރުން ތަރައްގީއާއި ގުޅުން ބަދަހިކުރުމުގެ މަސަދުގައި ބޭއްވޭ ރިޔާދު އަރަބި-ޗައިނީސް ސަމިޓްވެސް ހިމެނެއެވެ. މި ސަމިޓްތަކުގެ މަގުސަދަކީ ގަލްފް ކޯޕަރޭޝަން ކައުންސިލް ގައުމުތަކާއި އަރަބި އެހެން ގައުމުތަކާއި ޗައިނާއާ ދެމެދު އޮތް ގުޅުން އިތުރަށް ބަދަހި ކުރުން ކަމަށްވެސް ސައުދީ ޕްރެސް އޭޖެންސީން ރިޕޯޓު ކޮށްފައި ވެއެވެ.
ކޮމެންޓު ފޮނުވާ