ހައި ކޯޓުގެ ތާރީހުގައި ފުރަތަމަ ފަހަރަށް އެންމެ ފަނޑިޔާރަކު ބެންޗުގައި އިންނަވައިގެން މިއަދު ޝަރީއަތެއް ބާއްވައިފިއެވެ.
ހައިކޯޓުން މިހާތަނަށް ޝަރީޢަތްތައް ހިންގަމުންއައީ ތިން ފަނޑިޔާރުން ނުވަތަ ފަސް ފަނޑިޔާރުން ބެންޗުގައި ތިއްބަވައިގެންނެވެ. ޤާނޫނުއަސާސީއާއި ކޯޓުތަކުގެ ގާނޫނުގައި ބަޔާންކުރަނީ ކޯޓުން މައްސަލަތައް ބަލަން ޖެހޭނީ އޮނަހިރި އަދަދެއްގެ ފަނޑިޔާރުންގެ މަޖިލީހަކުންކަމަށެވެ.
ޖިނާއީ އިޖުރައާތުގެ ގާނޫނަށް ގެނައި އިސްލާހުގެ ދަށުން އެންމެ ފަނޑިޔާރު އިންނަވައިގެން ހައި ކޯޓުގައި ބެލެނީ ޝަރީއަތުގެ ކުރީގެ ހުށަހެޅުންތަކާއި މަދަނީ މިންގަނޑުން މައްސަލަ ކުރިއަށް ގެންދިއުމާ މެދު ދަށު ކޯޓުތަކުން ނިންމާ ނިންމުންތަކުގެ އިސްތިއުނާފު މައްސަލަތަކެވެ. މިއަދު ފުރަތަމަ ފަހަރަށް އެގޮތަށް މައްސަލައެއް ބެއްލެވީ ފަނޑިޔާރު މުހައްމަދު ނިޔާޒެވެ.
ޖިނާއީ އިޖުރާއަތުގެ ގާނޫނަށް ގެނެވުނު އިސްލާހާއެކު ފުރަތަމަ ފަހަރަށް ހައިކޯޓުގައި 1 ފަނޑިޔާރު މައްސަލައެއް ކުރިއަށް ގެންގޮސްފިއެވެ. ހައިކޯޓުގެ ތާރީހުގައި ފުރަތަމަ ފަހަރަށް 1 ފަނޑިޔާރު ބައްލަވާ މައްސަލަ ކުރިއަށް ގެންދެވީ ފަނޑިޔާރު މުހައްމަދު ނިޔާޒްއެވެ. pic.twitter.com/poN3qul5gQ
— Ameen Faisal, Information Officer (High Court) (@HighCourtMedia) December 6, 2022
އެ ޝަފރީޢަތަކީ ދައުލަތުން މަސްތުވާތަކެތި ޓްރެފިކް ކުރުމުގެ ދައުވާ އުފުލާފައިވާ ގދ. ހޯނޑެއްދޫ އަލޯރާ، އަހުމަދު މުޖާހިދު ބަންދުން ދޫކޮށްލުމަށް ކްރިމިނަލް ކޯޓުން ނިންމާފައިވާ ނިންމުން ދައުލަތުން އިސްތިއުނާފްކޮށްފައިވާ މައްސަލައެކެވެ.
ގާނޫނުއަސާސީ އާއި ކޯޓުތަކުގެ ގާނޫނު އޮންނަ ގޮތުން ވެސް، ހައި ކޯޓުން މައްސަލަތައް ބަލަން ޖެހޭނީ އޮނަހިރި އަދަދެއްގެ ފަނޑިޔާރުންގެ މަޖިލީހަކުންނެވެ. އެކަމަކު މިގޮތަށް ޖިނާއީ އިޖްރައާތުގެ ގާނޫނު އިސްލާހު ކުރީ އެޓާނީ ޖެނެރަލްގެ އޮފީހުގެ ހުށަހެޅުމަކަށެވެ.
