މާލެ، ވިލިމާލެ، ތިލަފުށި އަދި ގުޅިފަޅު ގުޅާލާ ތިލަމާލެ ބްރިޖުގެ މަސައްކަތަށް ބޭނުން ކުރަމުން ދަނިކޮށް މޫދަށް ވެއްޓުނު ކޭރޭންގެ ބައި ނަގައިފިއެވެ.
އިއްޔެ ވަގުތެއްގައި މި ކެރޭނުގެ ބައެއް މޫދަށް ވެއްޓުނުއިރު، މިއީ ވިލިމާލޭ ކޮޅުގައި ބްރިޖްގެ ތަނބު ޖަހަން ބޭނުންވާ ހޮޅިތައް މޫދަށް ޖެހުމުގެ މަސައްކަތުގައި ބޭނުންކުރާ ކެރޭނެއްގެ ބައެކެވެ.
މީޑިއާތަކަށް މަޢުލޫމާތު ދެއްވަމުން ހައުސިންގ މިނިސްޓްރީން ވިދާޅުވީ އިއްޔެ މެންދުރުފަހު ހިނގި މިޙާދިސާގައި ކެރޭންގެ ބޮޑު ބައެއް ވެއްޓިފައިވަނީ ކެރޭން ބަހައްޓާފައިވާ ޕްލެޓްފޯމް ތެރެއަށްކަމަށެވެ. އަދި މިޙާދިސާގައި މީހަކަށް ގެއްލުން ނުވާކަމަށް ހައުސިންގ މިނިސްޓްރީއިން ވިދާޅުވެއެވެ.
މިނިސްްޓްރީން ވިދާޅުވީ ކެރޭނު ވެއްޓެން ދިމާވި ސަބަބު ދެނެގަތުމަށް މަސައްކަތްކުރަމުންދާކަމަށެވެ. އަދި ކެރޭނު ވެއްޓުނުނަމަވެސް ބްރިޖްގެ ޢަމަލީ މަސައްކަތަށް ހުއްޓުމެއް ނާންނާނެކަމަށް މިނިސްޓްރީން ވިދާޅުވެއެވެ.
އެމިނިސްޓްރީން ވިދާޅުވީ މޫދަށް ވެއްޓުނު ކެރޭންގެ ބައި މިއަދު ފަތިހުގެ ވަގުތެއްގައި ނަގާފައިވާ ކަމަށެވެ. އިންޑިއާގެ އެފްކޮންސް އިންފްރާސްޓްރަކްޗާއާ ހަވާލުކޮށްފައިވާ ތިލަމާލެ ބްރިޖު މަޝްރޫއަކީ ރާއްޖޭގައި މި ސަރުކާރުން ކުރިއަށް ގެންދާ އުމްރާނީ އެންމެ ބޮޑު މަޝްރޫއެވެ. މިއީ އިންޑިއާގެ އެގްޒިމް ބޭންކުން 400 މިލިއަން ޑޮލަރުގެ ލޯނަކާއި، 100 މިލިއަން ޑޮލަރުގެ ހިލޭ އެހީގައި ކުރިއަށް ގެންދާ މަޝްރޫއެކެވެ.
