ތިލަމާލެ ބްރިޖު މަޝްރޫޢު ކުރިއަށް ގެންދިއުމަށް ބޭނުންކުރަމުންދިޔަ ކްރޭނެއްގެ ބައެއް ކަނޑަށް ވެއްޓިއްޖެއެވެ. އެގޮތުން ކްރޭންގެ ބޫމް ވަނީ ކަނޑަށް ވެއްޓިފައެވެ.

ކްރެއިންގެ އެބައި ކަނޑަށް ވެއްޓުނު ސަބަބު އޮޅުންފިލުވައި އެބައި ކަނޑުން ނެގުމުގެ މަސައްކަތް ކުރަމުން އަންނަކަމަށް ޕްލޭނިން މިނިސްޓްރީން ބުންޏެވެ. އެ މިނިސްޓްރީން ބުނީ ކްރެއިންގެ އެބައި ވެއްޓުނުނަމަވެސް މަޝްރޫޢުގެ މަސައްކަތަށް އެއްވެސް ހުރަހެއް ނެތްކަމަށެވެ.

ބްރިޖު މަޝްރޫޢު ކުރަމުން އަންނަ ކްރެއިންގެ ބައެއް ކަނޑަށް ވެއްޓިފައި މިވަނީ، މީގެ ކުރިން އެ މަޝްރޫޢުގެ ސާރވޭއަށް ބޭނުންކުރަމުން އައި ޕްލެޓްފޯމެއް ވިލިމާލެ ފަރަށް އަރައި ބޮޑެތި ގެއްލުންތަކެއް ވެފައި ވަނިކޮށެވެ.

ފަރަށް ލިބިފައިހުރ ބޮޑތި ގެއްލުންތައް ހާމަވެގެން ގޮސްފައިވަނީ، މި ޕްލެޓްފޯމް ފާއިތުވި އޮގަސްޓްމަހުގެ 28ވަނަ ދުވަހު ފަރުމަތިން ނަގެމާއެކު، ފަރަށް ލިބިފަހުރި ގެއްލުންތައް ދިރާސާ ކުރުމަށް، އެންވަޔަރަންމަންޓަލް ޕްރޮޓެކްޝަން އެޖެންސީ (އީޕީއޭ)ގެ ޓީމެއް އެސަރަހައްދަށް ފީނައިގެން ނަގާފައިވާ ފޮޓޯތައް އާންމު ކުރުމާއެކުއެވެ. ދެ ހަފްތާއެއްހާ ދުވަހު ޕްލެޓްފޯމް އެސަރަހައްދުގައި ފުން ނުކުރެވި އޮތުމަށްފަހު ފުންކޮށް ހެދި ދިރާސާއިން ދައްކާގޮތުގައި އެ ސަރަހައްދުގައި 10 ފޫޓުގެ ބޮޑެތި ވަޅުގަނޑުތަކެއް ވަނީ ހެދިފައެވެ. މިއީ އެސަރަހައްދަށް ލިބިފައިވާ އިއާދަނުކުރެވޭވަރުގެ ގެއްލުމެއްކަމަށް ތިމާވެށީގެ މާހިރުން ވިދާޅުވެއެވެ.

އީޕީއޭއިން ބުނީ، ވިލިމާލެ ފަރަށް ލިބިފައިވާ ގެއްލުންތައް ސާރވޭކޮށް އެފްކޮންސްއަށް ރިޕޯޓް ފޮނުވުމުން އޭގައި ހުރި ބައެއްކަންކަން ޤަބޫލު ނުކޮށް، އެދުނީ އަލުން ސާރވޭ ކުރުމަށްކަމަށެވެ.

ޕްލެޓްފޯމް ފަރަށް އެރި މައްސަލައާއި ގުލިގެން އެފްކޯން 69 މިލިއަން ރުފިޔާއިން ވަނީ ޖޫރިމަނާކުރުމަށް ނިންމާފައެވެ. ނަމަވެސް އީޕީއޭއިން އެކަން ރަސްމީކޮށް ހާމައެއް ނުކުރެއެވެ. އަދި އެކަން އެފްކޮންސްއަށްވެސް އަންގާފައެއް ނުވެއެވެ.

ފޮޓޯތަކުން ފެންނާން ހުރިގޮތުގައި، ހެދިފައިވާ ވަޅުގަޑުތަކުގެ ހެދިފައި ހުރީ، މިވަޅުގަޑުތަކަށް އެރިތިބި ޑައިވަރުންގެ އިސްކޮޅަށްވުރެވެސް ފުންކޮށެވެ. އަދި ފެންނަ ފެނުމަށް ބަލާއިރު މި ސަރަހައްދުގެ ފަރުގައި މާބޮޑު ދިރުންތަކެއްވެސް ނެތެވެ.

އީޕީއޭއިން އާންމު ކޮށްފައިވާ ފޮޓޯޓަކަކީ ޕްލެޓްފޯމް ފަރަށް އެރުމާއި ގުޅިގެން އެފަރަށް ލިބިފައިވާ ގެއްލުންތައް ބެލުމަށް އިއްޔެ ފަރަށް ފީނުމަށްފަހު ނަގާފާއިވާ ފޮޓޯތަކެކެވެ. ފޮޓޯތައް އާންމު ކުރުމުން ކޮށްފައިވާ ޓުވީޓުގައި ބުނެފައިވަނީ ފަރަށް ލިބިފައިވާ ގެއްލުންތައް އަދިވެސް އެ އޭޖެންސީން ދަނީ ދިރާސާ ކުރަމުން ކަމުގައެވެ.

ލަފާކުރެވޭ ގޮތުގައި ފަރުމަތީގައި ހެދިފައިވާ ބޮޑެތި ވަޅުގަޑުތައް ހެދިފައިވަނީ ޕްލެޓްފޯމުގެ ފައިތަށް މުރަކަތަކުގެ އެތެރެއަށް ވަދެގެންނެވެ. އީޕީއޭއިން ހާމަ ކޮށްފައިވާ ގޮތުގައި މިދިރާސާތައް ކުރިޔަށް އޮތް ދެ ދުވަހެއްގެ ތެރޭގައި ނިންމާލެވޭނެއެވެ.

ބްރިޖް ޕްލެޓްފޯމް ފަރުމަތިން ނުނެގި ގިނަ ދުވަސް ވަމުގެ ސަބަބުން މީގެކުރިން އީޕީއެއަށާއި އަދި ބްރިޖް އެޅުމުގެ މަސައްކަތް ކުރަމުންދާ އެފްކޮންސްއަށްވެސް ގިނަބައެއްގެ ފާޑުކިޔުންތައް އަމާޒުވެގެން ދިޔައެވެ.

އިހުމާލުން ރާއްޖޭގެ ފަރުތަކަށް ލިބޭ ގެއްލުންތަކަކަކީ، އިހުމާލުވާ ފަރާތްތަކުން ބޮޑު އަދަދުތަކުން ޖުރިމާނާ ދައްކާން ޖެހޭ ސީރިއަސް މައްސަލައެއް ކަމެވެ. އިހުމާލުން ރާއްޖޭގެ ނާޒުކު ފަރުތަކަށް ލިބޭ ގެއްލުމުގެ ބަދަލުގެ ގޮތުގައި ނަގާންޖެހޭގޮތަށް ގާނޫނުގައި ކަނޑައަޅާފައި އޮންނަނީ ވަރަށް ބޮޑެތި ޖުރިމާނާ ތަކެވެ.