މިއަހަރުގެ ފެބްރުއަރީމަހުން ފެށިގެން ކުރިޔަށްދާ ޔޫކުރެއިން ހަގުރާމާގައި މިހާތަނަށް މަރުވެފައިވަނީ ޔޫކުރެއިންގެ 13،000 ސިފައިންކަމުގައި ޔޫކުރެއިން ސަރުކާރުން ހާމަ ކޮށްފިއެވެ.
ޔޫކުރެއިންގެ ރައީސް ޒެލެންސްކީގެ އެޑްވަޒަރެއް ކަމުގައިވާ މިޚައިލޯ ޕޮޑޮލްޔަކް އާންމު ކުރައްވާފައިވާ ރަސްމީ މި އަދަދަކީ ފާއިތުވެދިޔަ އޮގަސްޓް މަހަށްފަހު، ފުރަތަމަ ފަހަރަށްފަހު އެގައުމުން ހާކޮށްފައިވާ ރަސްމީ އަދަދެވެ. ޔޫކުރެއިންގެ އަސްކަރިއްޔާގެ އެންމެ މަތީ ވެރިޔާ އެފަހަރު އާންމު ކޮށްފައިވާ އަދަދަކީ އެހާތަނާއި ހަމައަށް ޔޫކުރެއިންގެ 9،000 ސިފައިން މަރުވެފައިވާ ކަމުގައެވެ.
ޖެނެރަލް ސްޓާފުގެ ފަރާތުން އެބަހުރި ރަސްމީ އަދަދުތަކެއް، އެންމެ މަތީ ކޮމާންޑުން އެބަހުރި ރަސްމީ ހިސާބުތަކެއް. އެ އަދަދު ތަކަކީ، މަރުވެފައިވަނީ 10،000 ސިފައިންނާއި 12،500 ސިފައިންނާއި އަދި 13،000 ސިފައިންނާ ދެމެދުގެ އަދަދުތަކެއް ކަމަށް.
ޔޫކުރެއިންގެ ރައީސް ޒެލެންސްކީގެ އެޑްވައިޒަރު މިޚައިލޯ ޕޮޑޮލްޔަކް ވިދާޅުވެފައި ވެއެވެ.
މި ހަގުރާމާގައި އަސްކަރިއްޔާއަށް ލިބިފައިވާ ގެއްލުންތަކެއް އެގައުމުގެ އަސްކަރިއްޔާއިން އަދި މިހާތަނަށް ހާމަ ކޮށްފައެއް ނުވެއެވެ. މިޚައިލޯ ޕޮޑޮލްޔަކް ވިދާޅުވި ގޮތުގައި އެ ހިސާބުތައް ވަގުތު ޖެހުމުން އެގައުމުގެ ރައީސް ޒެލެންސްކީ ހާމަ ކުރައްވާނެއެވެ.
މިއަހަރުގެ ސެޕްޓެމްބަރުމަހު ޔޫކުރެއިންގެ އަސްކަރައްޔާއިން ފެއްޓި ކައުންޓަރ އެޓޭކްތަކުގައި އަސްކަރިއްޔާއިން ވަނީ ރަޝިއާ ސިފައިން ހިފާފައިވާ އެގައުމުގެ ބޮޑުބައެއް މިނިވަން ކޮށްފައެވެ. މީގެ ތެރޭގައި މުހިންމު ސިޓީއެއް ކަމުގައިވާ ޚާސޮން ސިޓީވެސް ހިމެނެއެވެ. މިސިޓީއަކީ ރަޝިއާއިން ޔޫކުރެއިންއަށް ހަމަލާ ދޭންފެށިތާ މަދު ދުވަސްކޮޅެއްގެ ތެރޭގައި އެގައުމުން ހިފި ސިޓީއެކެވެ.
މިހާރު ޔޫކުރެއިންއަށް ފިނި މޫސުން އައިސްފައިވާތީ، އެންމެ ބޮޑަށް ހަގުރާމަ ހިގަމުން ދަނީ އެގައުމުގެ އިރުމަތީގެ ޑޮނެސްކް ސަރަހައްދުގައެވެ.
އެމެރިކާއާއި ހުޅަގުގެ ބާރުތަކުންވަނީ، ހަގުރާމަ ކުރިޔަށް ދާހާ ހިދަކު ޔޫކުރެއިންއަށް އަސްކަރީ އެހީތެރިކަން ފޯރުކޮށްދެމުން ދާނެކަމަށް ބުނެފައެވެ.
