ގަތަރުގައި މިހާރު ކުރިއަށްދާ ފީފާ ވޯލްޑް ކަޕް ފުޓްބޯޅަ މުބާރާތުގައި ރޭ ސާބިއާއާ ދެކޮޅަށް ބްރެޒިލުން ކުޅުނު މެޗުގައި އަނިޔާވި ބްރެޒިލްގެ ތަރި ނޭމާ އަށް ކުރިއަށް އޮތް ދެ މެޗު ގެއްލިއްޖެއެވެ.
ވޯލްޑް ކަޕްގައި ބްރެޒިލް ކުޅުނު ފުރަތަމަ މެޗުގައި އެ ޓީމު ކުޅުނީ ސާބިއާއާ ދެކޮޅަަށެވެ. އެ މެޗު 2-0 އިން ބްރެޒިލް ކާމިޔާބުކުރިއިރު، ނޭމާ ވަނީ ރަނގަޅު ކުޅުމެއް ދައްކާފައެވެ.
މެޗުގެ 80 ވަނަ މިނެޓުގައި އަނިޔާގެ ސަބަބުން ނޭމާ ބަދަލުކުރަން ޖެހުނުއިރު، އޭގެ ފަހުން ފެނުނު މަންޒަރަށް ބަލާއިރު އޭނާގެ ކުޑަ ހުޅަށް ފުދޭވަރަކަށް ބޮޑު އަނިޔާއެއްވި ކަމަށް ބެލެވުނެވެ. 80 މިނެޓުގެ ކުރިން ނޭމާގެ ފަޔަށް އެންމެ ބޮޑަށް ތަދުވީ ސާބިއާގެ ޑިފެންޑަރު ނިކޮލާ މިލެންކޮވިޗް ކުރި ފައުލެއްގެ ސަބަބުންނެވެ. މި މެޗުގައި ނޭމާ އަށް ނުވަ ފައުލެއް ސާބިއާގެ ކުޅުންތެރިން ކުރިއިރު، ނޭމާ އަކީ އެއް މެޗެއްގައި މިހާތަނަށް އެންމެ ގިނައިން ފައުލް ކުރަން ޖެހުނު ކުޅުންތެރިޔާއެވެ.
ބްރެޒިލްގެ ޓީމު ޑޮކްޓަރު، ރޮޑްރީގޯ ލަސްމާ ބުނީ ނޭމާ އާއި ޑެނީލޯގެ އެމްއާރުއައި ހެދި އިރު، ކުޑަހުޅުގެ ލިގަމަންޓަށް ގެއްލުން ލިބިފައިވާ ކަމަށެވެ. އަދި މިހާރު ވިސްނުން ހުރީ ބްރެޒިލްގެ މެޗުތަކަށް ދެ ކުޅުންތެރިން ވެސް ފިޓް ކުރުން ކަމަށް އޭނާ ބުންޏެވެ.
ނޭމާގެ އަނިޔާއާ ގުޅޭ ގޮތުން ބްރެެޒިލްގެ ކޯޗު ޓީޓޭއާ އާ ވެސް ސުވާލުތައް އަމާޒުވިއެވެ. އެކަމަކު، ޓިޓޭ ދިން ޔަގީންކަމަކީ މިފަހަރުގެ ވޯލްޑް ކަޕްގައި ނޭމާ ފެންނާނެ ކަމުގެ ޔަގީންކަމެވެ.
ނޭމާ އަށް މި ލިބުނު އަނިޔާގެ ސަބަބުން މިމަހުގެ 28 ވަނަ ދުވަހު ސްވިޒަލެންޑާ ދެކޮޅަށް ކުޅޭ މެޗާއި ޑިސެމްބަރު 3 ވަނަ ދުވަހު ކެމަރޫންއާ ދެކޮޅަށް ކުޅޭ މެޗުގައި އޭނާ އަށް ނުކުޅެވޭނެއެވެ. ނޭމާގެ އިތުރުން ބްރެޒިލްގެ ކަނާތް ފަޅިން ފަހަތަށް ކުޅުނު ޑެނީލޯގެ ކުޑަ ހުޅަށް ލިބުނު އަނިޔާގެ ސަބަބުންވެސް ގްރޫޕްގައި ބާކީ އޮތް ދެ މެޗުގައި ނުކުޅެވޭނެއެވެ.
އޭނާގެ ބަދަލުގައި ކޯޗު ޓިޓޭ ފުރުސަތު ދިނުން ގާތީ އެޓީމުގައި ހުރި އެންމެ ތަޖުރިބާކާރު ކުޅުންތެރިޔާ 39 އަހަރުގެ ޑެނިއެލް އަލްވޭސްއެވެ.
މީގެ ކުރިން ނޭމާ ކުޅުނު 2014 އަދި 2018 ގެ ވޯލްޑް ކަޕްގައި ވެސް އަނިޔާއާ ކުރިމަތިވިއެވެ. އެގޮތުން 2014 ވަނަ އަހަރު ބްރެޒިލްގައި ކުޅުނު ވޯލްޑް ކަޕްގެ ކުއާޓާ ފައިނަލްގައި ނޭމާގެ ބުރަކަށްޓަށް އަނިޔާވެގެން އޭނާ ބަދަލު ކުރަން ޖެހުނެވެ. 2018 ވަނަ އަހަރު ރަޝިއާގައި ކުޅުނު ވޯލްޑް ކަޕަށް ބްރެޒިލް އައިއިރު، ނޭމާ ފިޓްނަސް ރަނގަޅެއް ނޫނެވެ. ނޭމާ އަށް އެ އަހަރު ކުރީކޮޅު އަނިޔާގެ މައްސަލައަކާ ކުރިމަތިވިއެވެ.
