ރައްޔިތުންގެ މަޖިލީހުގެ އިއްޔެގެ ޖަލްސާގައި، ވާހަކަދައްކަވަމުން، އިސްލާމިކް މިނިސްޓްރީގެ ބޭފުޅުންނާ ބެހޭގޮތުން، މާފަންމު މެދު ދާއިރާގެ މެމްބަރު އިބްރާހީމް ރަޝީދު (ބޮންޑެ) ދެއްކެވި ވާހަކަތަކަކީ ހައްދު ފަހަނައަޅާފައިވާ ހަރުކަށި ވާހަކަތަކެއްކަމަށް ސަރުކާރު އިންގާ ކޯލިޝަނުގައި ހިމެނޭ ޢަދާލަތު ޕާޓީން ބުނެފިއެވެ.
އެޕާޓީން މިހެން ބުނީ ބޮންޑެގެ ވާހަކަތަކާމެދު ނުރުހުން ފާޅުކޮށް ކުރި ޓްވީޓެއްގައެވެ. ޢަދާލަތުން ބުނީ ސިޔާސީ ވާދަވެރިކަމުގައި ދިވެހި ރާއްޖޭގެ އިސްލާމިކް މިނިސްޓަރަށާއި އެ މިނިސްޓްރީގެ މުވައްޒަފުން ކާފަރުކުރުމަކީ ބަލައިގަނެވޭނެކަމެއް ނޫންކަމަށެވެ. އަދި އެއީ ރާއްޖޭގެ ރައްޔިތުންގެ މަޖިލީހުގައި ޢިއްޒަތާއި ކަރާމަތާ އެކަށީގެންވާ ކަމެއްވެސްނޫންކަމަށެވެ. އަދި ކޮންމެ މީހަކު ކުރިޔަސް މުސްލިމުން ކާފަރުކުރުމަކީ ހަރުކަށި ހައްދުފަހަނައަޅާފައިވާ އަމަލެއްކަމަށާ، ރައްޔިތުންގެ މަޖިލީހުގެ މެންބަރުންނަށް ދީފައިވާ ޚާއްސަ އިމްތިޔާޒުގެ ނިވަލުގައި ތިބެގެން މިފަދަ ހަރުކަށި ހައްދުފަހަނައަޅާފައިވާ ފިކުރު ފެތުރުމަކީ ޢަދާލަތު ޕާޓީން ކުށްވެރިކުރާކަމެއްކަމަށްވެސް އެޕާޓީން ބުނެފައިވެއެވެ.
ސިޔާސީ ވާދަވެރިކަމުގައި ދިވެހި ރާއްޖޭގެ އިސްލާމިކް މިނިސްޓަރަށާއި އެ މިނިސްޓްރީގެ މުވައްޒަފުން ކާފަރުކުރުމަކީ ބަލައިގަނެވޭނެކަމެއް ނޫން. އެއީ ރާއްޖޭގެ ރައްޔިތުންގެ މަޖިލީހުގައި ޢިއްޒަތާއި ކަރާމަތާ އެކަށީގެންވާ ކަމެއްވެސްނޫން.
— Adhaalath Party (@AdhaalathOffice) November 22, 2022
އިއްޔެގެ ރައްޔިތުންގެ މަޖިލީހުގެ ޖަލްސާގައި ވާހަކަ ދައްކަވަމުން މާފަންނު މެދު ދާއިރާގެ މެންބަރު އިބްރާހީމް ރަޝީދު (ބޮންޑެ)ވަނީ އިސްލާމިކް މިނިސްޓްރީގެ އިސްވެރިންގެ ގޮތުގައި ތިއްބެވި ޢަދާލަތު ޕާޓީއަށް ނިސްބަތްވާ ބޭފުޅުންނަށް ވަރަށްބޮޑަށް ފާޑުވިދާޅުވެފައެވެ. އެގޮތުން އިސްލާމިކް މިނިސްޓްރީގައި ތިބީ ބަޣާވާތާއި ކުފުރުގެ ބައެއް ކަމަށް ބޮންޑެ ވިދާޅުވެފައިވެއެވެ. އިސްލާމިކް މިނިސްޓްރީ ހިސާރުކޮށްގެން މިތިބެނީ ބަޣާވާތުގެ ބައެއްކަމަށާ، އެއީ ބޮޑު ބަޣާވާތުގެ ބައެއްކަމަށާ، އެއީ ކުފުރުގެ ބައެއްކަމަށް ބޮންޑެ ތަކުރާރުކޮށް ވިދާޅުވިއެވެ.
