އަނޫރާގް ބާސޫ ޑައިރެކްޓުކޮށް 2007 ވަނަ އަހަރު ރިލީޒްކޮށްފައިވާ ފިލްމު "ލައިފް އިން އެ މެޓްރޯ" ގެ ދެވަނަ ބައެއް ހަދަން ނިންމާފައިވާ ކަމަށް މުނިފޫހި ފިލުވުމުގެ ހަބަރުތަށް ގެނެސްދޭ ނޫސްތަކުން ރިޕޯޓްކޮށްފިއެވެ.
އެ ފިލްމުގެ ސީކުއެލްއެއް އުފައްދަން އުޅޭ ކަމަށް ވާހަކަ ދެކެވޭތާ ދުވަސްތަކެއް ފަހުން، ޑައިރެކްޓަރު އަނޫރާގު މިހާރު އަންނަނީ ބާރު ސްޕީޑުގައި އެމަސްކަތް ކުރަމުން ކަމަށް ހަބަރުތަށް ބުނެއެވެ. އެ މަސައްކަތް އޭނާ ކުރާތާ ދުވަސްތަކެއް ވެއްޖެ ކަމަށާއި ވާހަކަ ލިޔެ ނިމުނުތަނާ ކޮވިޑްގެ ބަލިމަޑުކަން އައިސްގެން މަސައްކަތް މަޑުޖެހުނީ ކަމަށް ވެސް ވެ އެވެ. މީގެ އިތުރުން މި ފިލްމްގެ ރޯލަކަށް އެކްޓަރު އަލީ ފަޒާލް ސޮއި ކޮށްފައި ވާކަމަށްވެސް ވެއެވެ.
"ލައިފް އިން އަ މެޓްރޯ" އާއި ވަރަށް ތަފާތު ގޮތަކަށް އުފައްދާ މި ފިލްމު ޕްރޮޑިއުސްކުރަނީ ޓީ ސީރީޒް އިންނެވެ. މީގެ 15 އަހަރު ކުރިން ރިލީޒްކުރި އޮރިޖިނަލް ފިލްމުގައި ދައްކަނީ އިންޑިއާގެ މުމްބާއީގައި ދިރިއުޅޭ ތަފާތު 9 މީހެއްގެ ދިރިއުޅުމެވެ.
"ލައިފް އިން އަ…މެޓްރޯ" ގެ ކާސްޓްގައި ކަންގަނާ ރަނާވަތު، އިރުފާން ޚާން، ޝައިނީ އަހޫޖާ، ކޮންކޮނާ ސެން ޝަރުމާ، ޝިލްޕާ ޝެޓީ، ކޭކޭ މެނަން، ދަރުމެންދުރާ، ނަފީސާ އަލީ އަދި ޝަރުމަން ޖޯޝީ ހިމެނެ އެވެ.
