މިފްކޯއިން މަސްވެރިންނަށް ވިއްކާ ޑީސަލްގެ އަގު، ލިޓަރަކުން 28 ލާރި ބޮޑުކޮށްފިއެވެ.
މިފްކޯ ޗީފް އެގްޒެކެޓިވް އޮފިސަރ އިސްމާޢީލް ފައުޒީ ސޮއި ކުރައްވާ ނެރެފައިވާ މެމޯއެއް ގައި ވާގޮތުން މިއަދުން ފެށިގެން އެކުންފުނީގެ ސައިޓްތަކާއި ބޯޓުފަހުން މަސްވެނިންނަށް ޑީސަލް ލީޓަރެއް ވިއްކާނީ 7 ރުފިޔާ 17 ލާރިއަށެވެ. މިއީ ކުރިން ވިއްކަމުން ދިޔަ އަގަށްވުރެ ލިޓަރަކުން 28 ލާރި ވަނީ ބޮޑު އަގެކެވެ. މިދިޔަ އޮކްޓޫބަރު މަހުގެ 1 ވަނަ ދުވަހުން ފެށިގެން މިފްކޯއިން މަސްވެރިންނަށް ޑީސަލް ލިޓަރެއް ވިއްކަމުން ދިޔައީ 6 ރުފިޔާ 89 ލާރިއަށެވެ.
ޑީސަލްގެ އަގަށް މި ގެނައި ބަދަލާއެކު ފަހި ހަކަތަ ޕްރޮގްރާމްގައި ބައިވެރިވެފައިވާ ދޯނިފަހަރަށް ޑީސަލް ލިޓަރެއް ވިއްކާނީ 6 ރުފިޔާ 92 ލާރިއަށް ކަމަށް މެމޯގައި ބުނެފައި ވެއެވެ. މީގެއިތުރުން އާންމު ފަރާތްތަކަށް އެކުންފުނިން ޑީސަލް ވިއްކުމަށް ކަނޑައަޅާފައިވާ އަގަކީ ލިޓަރެއް 13 ރުފިޔާ އަށެވެ. މިއީ އެކުންފުނިން ކުރިންވެސް މަސްވެރި ނޫން އުޅަނދުފަހަރަށް ޑީސަލް ވިއްކަމުން ގެންދިޔަ އަގެވެ.
މިފްކޯ އިން ވިއްކާ ޑީސަލްގެ އަގު އޮކްޓޫބަރު މަހުގެ 1 ވަނަ ދުވަހު ހެޔޮކުރި އިރު އެކުންފުނިން ޑީސަލް ލިޓަރެއް ވިއްކަމުން އައީ 7 ރުފިޔާ 33 ލާރިއަށެވެ.
