ޤަވާއިދާ ޚިލާފަށް ރާއްޖެއިން ބޭރުކުރަން ނުވަތަ ރާއްޖެއަށް އެތެރެކުރަން އުޅުނު 9 މިލިޔަނަށްވުރެ ފައިސާ މިދިޔަ 4 އަހަރުދުވަހުގެ ތެރޭގައި ހިފަހައްޓާފައިވާނެކަމަށް މޯލްޑިވްސް ކަސްޓަމްސްއިން ބުނެފިއެވެ.
ސަރުކާރަށް 4 އަހަރު ފުރުމާ ގުޅިގެން މި 4 އަހަރުދުވަހުގެ ތެރޭގައި އެކި މުއައްސަސާތަކަށް ޙާސިލްކުރެވުނު ކަންކަމާއި ކާމިޔާބީތަކުގެ ވާހަކަތައް އަންނަނީ ހާމަކުރަމުންނެވެ. އެގޮތުން މޯލްޑިވްސް ކަސްޓަމްސްއިންވަނީ އެ މުއައްސަސާއަށް ޙާސިލްކުރެވުނު ބައެއް ކަންކަން ހާމަކޮށްފައެވެ.
އޭގެތެރޭގައި މި ވޭތުވެދިޔަ 4 އަހަރުގެ ތެރޭގައި ޤަވާއިދާ ޚިލާފަށް ރާއްޖެއަށް އެތެރެ ނުވަތަ ބޭރުކުރަން އުޅުނު 9 މިލިޔަނަށްވުރެ ގިނަ ފައިސާ ހިފަހައްޓާފައިވާކަމަށް ކަސްޓަމްސްއިން ބުނެފިއެވެ. މިފައިސާތަކުގެ ތެރޭގައި އެންމެ ގިނައީ ދިވެހި ރުފިޔާކަމަށް ކަސްޓަމްސްއިން ބުނެއެވެ. ކަސްޓަމްސްގެ ތަފާސްހިސާބުތަކަށް ބަލާއިރު 2019 ވަނަ އަހަރު ދިވެހި ރުފިޔާއާއި ޔޫރޯއާއި އެމެރިކާ ޑޮލަރުވެސް ޤަވާއިދާ ޚިލާފަށް ރާއްޖެއަށް އެތެރެކުރަން ނުވަތަ ބޭރުކުރަން އުޅެފައިވެއެވެ. 2019ވަނަ އަހަރު 3،411،129 ރުފިޔާ، 2021ވަނަ އަހަރު 1،148،278 ރުފިޔާ ވަނީ މިގޮތަށް ކުރެވުނު ޤަވާއިދާ ޚިލާފު މުޢާމަލާތްތަކުން ހިފަހައްޓާއެވެ. އަދި 2019ވަނަ އަހަރު 5،415 ޔޫރޯ ކަސްޓަމްސްއިން ހިފެހެއްޓިއެވެ. އެއެއަހަރުގެ ތެރޭގައި 179،287 އެމެރިކާ ޑޮލަރު ހިފަހައްޓާފައިވެއެވެ. އަދި 2020 ވަނަ އަހަރު 139،700 އެމެރިކާ ޑޮލަރު ހިފެހެއްޓާފައިވެއެވެ.
ސަރުކާރަށް 4 އަހަރު؛ 2019 އިން ފެށިގެން 2022 ގެ ސެޕްޓެމްބަރު މަހުގެ ނިޔަލަށް ކަސްޓަމްސްއަށް ޑިކްލެެއަރނުކޮށް ރާއްޖެއަށް ފައިސާ އެތެރެ/ބޭރުކުރަން އުޅެނިކޮށް 9 މިލިއަން ރުފިޔާ އަށްވުރެ ގިނަ ފައިސާ ހިފަހައްޓާ، ޖުމްލަ 9 މައްސަލައެއް ތަހްޤީގްކޮށްފައިވޭ.@AbdullaSh4reef@MariyaDidi pic.twitter.com/300kJUZJYH
— Maldives Customs (@CustomsMv) November 17, 2022
ވޭތުވެދިޔަ 4 އަހަރު ކަސްޓަމްސްއަށް ޑިކްލެެއަރނުކޮށް ރާއްޖެއަށް ފައިސާ އެތެރެކުރުމާއި ބޭރުކުރަން އުޅުނުކަމުގެ 9 މައްސަލައެއް ތަހްޤީގްކޮށްފައިވެއެވެ. މި މައްސަލަތަކުގައި ޖުމުލަ 8 މީހަކު ހިފެހެއްޓިއެވެ. އެއީ 3 ދިވެއްސަކާއި ބަންގްލަދޭޝްގެ 3 މީހަކާއި އިންޑިއާގެ 2 މީހެކެވެ.
10،000 އެމެރިކާ ޑޮލަރުން ފެށިގެން މަތީގެ ޢަދަދެއްގެ ފައިސާ މޯލްޑިވްސް ކަސްޓަމްސްއިން ޑިކްލިއަރ ނުކޮށް ރާއްޖެއަށް އެތެރެކުރުން ނުވަތަ ރާއްޖެއިން ބޭރުކުރުމަކީ ޤާނޫނީ ކުށެކެވެ.
