ދާދިފަހުން އިރާނުގެ އެކި ކަންކޮޅުތަކުގައި ކުރިޔަށްދިޔަ މުޒާހިރާތަކުގައި ބައިވެރިވި 3 މީހެއްގެ މައްޗަށް މަރުގެ ހުކުމް އިއްވައިފިކަމަށް އެގައުމުގެ ގައުމީ ޓީވީން ރިޕޯޓު ކޮށްފިއެވެ.
އިރާނުގެ ގައުމީ ޓީވީން ރިޕޯޓު ކޮށްފައިވާ ގޮތުގައި މި އެންމެންގެ މައްޗަށްވެސް ބުދަދުވަހު މަރުގެ ހުކުމް އިއްވާފައިވަނީ "ބިން ފަސާދަ ކުރުމާއި" އަދި "ދީނާ ދެކޮޅަށް ހަގުރާމަ އިއުލާން" ކުރުމުގެ ކުށް އެމީހުންގެ މައްޗަށް ސާބިތު ވުމާއި ގުޅިގެންނެވެ. އަދި މި އެންމެންނަށްވެސް އެމީހުންގެ މައްޗަށް ކޮށްފައިވާ ހުކުމް އިސްތިއުނާފް ކުރެވޭނެކަމަށްވެސް ރިޕޯޓު ކޮށްފައި ވެއެވެ.
އިރާންގެ ފުލުހުންގެ ބެލުމުގެ ދަށުގައި ހުއްޓާ ނިޔާވި މާޝާ އަމިނިގެ މަރާއި ދެކޮޅަށް، ވެރިރަށް ތެހެރާންއާއި ކަރާޖް ސިޓީން ހައްޔަރު ކޮށްފައިވާ އެތައް ހާސް މީހުންގެ ތެރެއިން 19 މީހަކަށް މަރުގެ ހުކުމާއި ކުރިމަތިލާން ޖެހޭކަމަށްވެސް ގައުމީ ޓީވީން ރިޕޯޓު ކޮށްފައި ވެއެވެ.
