ރަޝިއާ ސިފައިންގެ އަތްދަށުން އެންމެ ފަހުން މިނިވަންކުރި ޔޫކުރެއިންގެ ޚާސޮން ސިޓީއަށް ޔޫކުރެއިންގެ ރައީސް ޒެލެންސްކީ ޒިޔާރަތް ކުރައްވައިފިއެވެ.
ހަނގުރާމަގެ ކުރީކޮޅު ރަޝިއާއިން ހިފާ، އަދި ފަހުން އެއީ އެގައުމުގެ ބައެއްގެ ގޮތުގައި ރަޝިއާއިން ކަނޑައަޅާފައިވާ ޚާސޮން ސީޓީ އެގައުމަށް ގެއްލިގެން ދިއުން ވެގެން ގޮސްފައިވަނީ 9 މަސްވީ މި ހަނގުރާމާގައި ރަޝިއާއަށް ލިބިގެންދިޔަ އެންމެ ބޮޑު ނާކާމިޔާބީ ކަމުގައެވެ.
ޚާސޮން ސިޓީއަކީ ރަޝިއާގެ ބާރުގެ ދަށުގައިވާ ޔޫކުރެއިންގެ ހަަމެކަނި ރީޖަނަލް ކެޕިޓަލްވެސްމެއެވެ. މި ސިޓީ ދޫކޮށް ރަޝިއާގެ 30،000 ސިފައިން ހުރިހާ ބަރު ހަތިޔާރަކާއެކު ފައިބައިގެން ދިއުމަށްފަހު، ފާއިތުވެދިޔަ ދުވަސްތަކުގައި އެ ސިޓީގެ ރައްޔިތުންދިޔައީ އުފާ ފާޅުކޮށް ހަދަމުންނެވެ.
ރޮއިޓާރަސް ނިއުސް އޭޖެންސީން ޒެލެންސްކީއާއި ހަވާލާދީ ރިޕޯޓު ކޮށްފައިވާ ގޮތުގައި، ޔޫކުރެއިންގެ ހުރިހާ ސަރަހައްދަކުން ފައިބައިގެން ދިއުމަށް ރަޝިއާއެކު ސުލްހަވުމަށް އެގައުމުން އޮތީ ތައްޔާރަށެވެ.
ޒެލެންސްކީވަނީ ރަޝިއާއާއި ދެކޮޅަށް އެގައުމުން ކުރަމުން އަންނަ ހަނގުރާމާގައި ނޭޓޯގެ ގައުމުތުކުން ފޯރުކޮށްދެމުންދާ އެހީތެރިކަމަށް ޝުކުރު އަދާ ކޮށްފައެވެ. އޭނާ ވިދާޅުވެފައިވާ ގޮތުގައި އެމެރިކާއިން އެގައުމަށް ފޯރުކޮށްދިން ހައި މޮބިލިޓީ އާޓިލަރީ ރޮކެޓް ސިސްޓަމް (Himars) އަކީ ހަގުރާމާގައި ތަފާތު ދައުވަދިން އެއް ސަބަބު ކަމުގައެވެ.
ޒެލެންސްކީ މީގެ ކުރިން ވިދާޅުވެފައިވާ ގޮތުގައ ރަޝިއާ ސިފައިން ދޫކޮށް ދިޔަ ސަރަަހައްދުތަކުން އިންސާނިއްޔަތާއި ޚިލާފް 400 އަށްވުރެ ގިނަ ޖަރީމާ ހިންގާފައިވާކަމުގެ ހެކި ތަހުގީގުކުރާ ފަރާތްތަކަށް ވަނީ ފެނިފައެވެ.
އެމެރިކާއިން ބުނެފައިވަނީ ޚާސޮން ސިޓީ ޔޫކުރެއިންގެ އަސްކަރިއްޔާގެ ބާރުގެދަށަށް ގެނައުން ވެގެންދާނީ މި ހަނގުރާމާއިގަ ޔޫކުރެއިންއަށް ލިބިގެންދިޔަ އާދަޔާ ޚިލާފު ބޮޑު ކާމިޔާބީއަކަށް ކަމުގައެވެ. އަދި އިނގިރޭސިވިލާތުގެ ދިފާޢީ ވަޒީރު ބެން ވަލަސް ވިދާޅުވެފައިވަނީ ޚާސޮން ސިޓީ ދޫކޮށް ދާންޖެހުމަކީ ރަޝިއާއަށް މިހަނގުރާމާގައި ކުރިމަތިލާންޖެހުނު ވަރަށްބޮޑު ސްޓެރަޓީޖިކް ފެއިލިއަރއެއް ކަމުގައެވެ.
ޔޫކުރެއިންގެ ޚާރިޖީ ވަޒީރު ޑީމިޓްރޯ ކުލެބަރ ވިދާޅުވެފައިވަނީ ޔޫކުރެއިންއަށް ހަނގުރާމަ ކާމިޔާބުވަމުން ދާކަމަށާއި، އެހެންނަމަވެސް ހަނގުރާމަ އަދި އޮތީ ކުރިޔަށް ކަމަށެވެ.
މޮސްކޯއިން ފާއިތުވެދިޔަަހު އެގައުމުގެ ބައެއްގެ ގޮތުގައި އިއުލާން ކޮށްފައިވާ ޚާސަން ސިޓީގެ އިރުމަތީގެ ބައެއް ސަރަހައްދުތައް އަދިވެސް ވަނީ ރަޝިއާގެ އަސްކަރިއްޔާގެ ބާރުގެ ދަށުގައެވެ.
ޔޫކުރެއިންގެ ޚާސަން ސިޓީއަކީ ހަނގުރާމައިގެ ކުރިން 350،000 އެއްހާ މީހުންގެ އާބާދީއެއް އޮތް ސިޓީއެކެވެ. އަދި މިއީ ރަޝިއާއިން ހިފާފައިވާ ކްރައިމިއާއާއި ޔޫކުރެއިން ގުޅުވައިދޭ މުހިންމު ސިޓީއަކަށް ވުމާއެކު، މިސިޓީ ވެގެންދަނީ ރަޝިއާއަށް ވަރަށް މުހިންމު ސިޓީއަކަށެވެ.
