ފްރާންސްގެ ޕެރިސް އެއަރޕޯޓުގައި 18 އަހަރުވަންދެން ދިރިއުޅުނު، އިރާނުގެ ރައްޔިތެއްކަމުގައިވާ މެހުރާން ކަރީމީ ނަސީރީ މަރުވެއްޖެއެވެ.
ޑިޕްލޮމެޓިކް މައްސަލަތަކެއްޖެހި، 1988 އިންފެށިގެން 18 އަހަރު ދުވަހު ޕެރިހުގެ އެއަރޕޯޓުގައި ދިރިއުޅެފައިވާ ނަސީރީ 18 އަހަރުވަންދެން ދިރި އުޅެފައިވަނީ ފްރާންސްގެ ރޮއިއްސީ ޗާރްލްސް ޑީ ގޯލް އެއަރޕޯޓުގެ ކުޑަ ތަންކޮޅެއް އެއީ އޭނާގެ ގެކަމުގައި ބަލައިގެންނެވެ.
އޭނާ އެއަރޕޯޓުގައި ދިރިއުޅުނު އުޅުމުގެ މައްޗަށް 2004 ވަނަ އަހަރު ވަނީ، "ދަ ޓާރމިނަލްގެ"ގެ ނަމުގައި، ޓޮމް ހަންކްސް ބަތަލެއްގެ ރޯލު ކުޅުނު ފިލްމެއްވެސް އުފައްދާފައެވެ.
ނަސީރީއަށް އެންމެ ފަހުންވަނީ ފްރާންސްގައި ދިރިއުޅުމުގެ ހައްގު ދީފައެވެ. އެހެންނަމަވެސް އޭނާވަނީ މީގެ ހަފްތާތަކެއް ކުރިން އަނެއްކާވެސް އެބުރި އެއަރޕޯޓަށް ދިރިއުޅުން ބަދަލު ކޮށްފައެވެ. އެއަރޕޯޓުގެ އޮިޝަލުން އޭއެފްޕީއަށް މައުލޫމާތު ދީފައިވާ ގޮތުގައި އޭނާ މަރުވެފައިވަނީ ގުދުރަތީ މަރެއްގައެވެ.
1945ގައި، އިރާނުގެ ޚުޒެސްތާން ޕްރޮވިންސަށް އުފަންވި، ނަސީރީ އެންމެ ފުރަތަމަ ޔޫރަޕަށް ދަތުރު ކޮށްފައިވަނީ އޭނާގެ މަންމަ ހޯދުމަށެވެ.
އަދި އޭނާވަނީ ބެލްޖިއަމްގައި އަހަރުތަކެއް ވަންދެން ދިރި އުޅެފައެވެ. އެއީ، ސައްޙަ އިމިގްރޭޝަން ޑޮކިއުމަންޓްތައް ނެތިގެން ޔޫކޭ، ނެދަރލޭންޑްސް އަދި ޖާމަނީގެ ފަދަ ގައުމުތަކުން އެނާ ބޭރު ކޮށްލުމާއި ގުޅިގެންނެވެ. މިގޮތުން ދެން އޭނާ ގޮސްފައިވަނީ ފްރާންސަށެވެ. އެއަށްފަހު އޭނާ ދިއުޅެފައިވަނީ އެއަރޕޯޓުގެ 2F ޓާމިނަލްގައެވެ.
މިގޮތުން އެއަރޕޯޓުގައި އޭނާ ބޭނުން ކުރަމުން އައި ގޮޑީގައި، އޭނާ ބޭނުންކުރަމުން އައި ތަކެތި ވަށައިގެން ޓްރޮލީތަކުގައި ބަހައްޓައިގެން އޭނާ ގިނަ ދުވަސްތަކެއް ހޭދަ ކޮށްފައިވަނީ އޭނާގެ ހަޔާތުގެ ދުވަސްތައް ހޭދަކުރަމުންދާ ގޮތް ނޯޓު ފޮތެއްގައި ލިޔުމަށާއި، ފޮތްތަކާއި ނޫސްތައް ކިޔުމުގައެެވެ.
ނަސީރީގެ ދިރިއުޅުން ބައިނަލްއަގުވާމީ މީޑިއާތަކުގެ ސަމާލުކަމަށް އައިސް، އޭނާގެ ދިރިއުޅުމާއި ގުޅޭގޮތުން "ދަ ޓާމިނަލް"ގެ ނަމުގައި ފިލްމެއް ޑައިރެކްޓް ކޮށްފައިވަނީ ސްޓެފަންސް ޕީލްބާރގްއެވެ. މި ފިލްމުގެ ބަތަލެއްގެ ރޯލު އަދާ ކޮށްފައިވަނީ ހަންކްސްއާއި ކެތެރިން ޒެޓާ ޖޯންސްއެވެ.
މި ފިލްމު ރިލީޒް ކުރުމާއެކު އެތައް ނޫސްވެރިންނެއްވަނީ، އޭނާގެ ދިރިއުޅުމުގެ މައްޗަށް ހޮލީވުޑްގެ ފިލްމެ ހެދުމަށް ހިތްވަރު ލިބިގެންދިޔަ ނަސީރީއާއި އިންޓަވިއު ކުރުމަށް އެއަރޕޯޓަށް ޖަމާވެފައެވެ. އެއަށްފަހު އަމިއަލައަށް "އަލްފްރެޑްގެ" ނަމުން މުޚާތަބް ކުރަމުންއައި ނަސީރީވަނީ އެއް ދުވަސްވަރެއްގައި ދުވާލަކަށް 6 މީޑިއާއަށްވެސް އިންޓަރވިއު ދީފައެވެ.
1999 ވަނަ އަހަރު، ރެފިއުޖީއެއްގެ ހައިސިއްޔަތު ދީ، ނަސީރީ ފްރާސްގައި ދިރިއުޅުމުގެ ހުއްދަ އެގައުމުން ދިންނަމަވެސް، ނަސީރީ ވަނީ 2006 ވަނަ އަހަރާއި ހަމައަށް އެއަރޕޯޓުގައި ދިރިއުޅެފައެވެ. 2006 ވަނަ އަހަރު ނަސީރީ އެއަރޕޯޓުން ހޮސްޕިޓަލަކަށް ގެންދެވިފައިވަނީ ބަލިހާލަތު ހުރިގޮތުން ސިއްޙީ ފަރުވާއަށެވެ.
ފްރާންސްގެ ނޫހެއް ކަމުގައިވާ ލިބަރޭޝަންއިން ރިޕޯޓު ކޮށްފައިވާ ގޮތުގައި އެއަށްފަހު އޭނާ ހޮސްޓެލްއެއްގައި ދިރިއުޅެފައިވަނީ އޭނާގެ ދިރިއުޅުމުގެ މައްޗަށް އުފެއްދި ފިލްމުން ލިބެމުންދިޔަ އާމްދަނީންނެވެ.
ނަސީރީ މީގެ ހަފްތާއެއް ކުރިން ވަނީ އެއަރޕޯޓަށް އެބުރި ދިރިއުޅުން ބަދަލު ކޮށްފައެވެ. އެއަށްފަހު މަރުވަންދެން އޭނާ ދިރިއުޅެފައިވަނީ އެއަރޕޯޓުގައެވެ. އޭނާ މަރުވިއިރު އޭނާގެ އަތުން އެތައް ހާސް ޔޫރޯއެއް ފެނިފައިވާކަމަށް އޮފިޝަލުން ވިދާޅުވެފައި ވެއެވެ.
