ޔޫކުރެއިން ހަނގުރާމާގައި ރަޝިއާ ސިފައިން ހިފައިގެން ތިބި، ޔޫކުރެއިން ސަރަހައްދީ ހަމައެކަނި ވެރިރަށް ކަމުގައިވާ ޚާސޮން ސިޓީ ދޫކޮށް ރަޝިއާ ސިފައިން ފަހަތަށް ޖެހުމާއި ގުޅިގެން އެ ސިޓީ ޔޫކުރެއިންގެ އަސްކަރިއްޔާގެ ބާރުގެދަށަށް ގެނެސް، ޚާސޮން ސިޓީގައި ޔޫކުރެއިން ރައްޔިތުންނާއި ސިފައިން އުފާ ފާޅުކޮށްފިއެވެ.

ޚާސޮން ސިޓީ ދޫކޮށްދިއުމަށް އަމުރުކުރިކަން ހާމަ ކުރަމުން ރަޝިއާގެ ކޮމާންޑަރުން ވިދާޅުވެފައިވަނީ ޔޫކުރެއިން ދެކުނުގައި އޮންނަ ޙާސަން ސިީޓީއަށް ސަޕްލައި ކޮށްދިނުން ރަޝިއާއަށް ދަތިކަމަށް ވެގެންގޮސްފައިވާ ކަމުގައެވެ.

ރަޝިއާއިން 2014ވަނަ އަހަރު އަމިއްލަ ކޮށްފައިވާ ޔޫކުރެއިންގެ ކްރައިމިއާއި ގުޅުވައިދޭ މުހިންމު މި ސިޓީއިން ރަޝިއާ ސިފައިން ފައިބައިގެން ދިޔަނަމަވެސް، ޔޫކުރެއިންއިން އެންމެ ފުރަތަމަ ބުނެފައިވަނީ މި ސިޓީއަށް އެގައުމުގެ ސިފައިން އަރާނީ ވަރަށް ވިސްނުންތެރިކަމާއެކު ކަމަށެވެ. ސަބަބަކީ މި މުހިންމު ސިޓީ ދޫކޮށް ރަޝިއާ ސިފައިން ދިޔަދިއުން އެއީ ރަޝިއާ ސިފައިން ޖަހާ ދަންތުރައަކަށް ވެދާނެކަމަށް ގަބޫލު ކުރެވޭތީކަމުގައެވެ.

އެހެންނަމަވެސް ޔޫކުރެއިން ސިފައިން މިހާރުވަނީ ޚާސޮން ސިޓީ އެގައުމުގެ އަސްކަރިއްޔާގެ ބާރުގެދަށަށް ގެނެސް، އެސިޓީގައި ޔޫކުރެއިންގެ ދިދަ ނަގާފައެވެ.

އެމެރިކާއިން ބުނެފައިވަނީ ޚާސޮން ސިޓީ ޔޫކުރެއިންގެ އަސްކަރިއްޔާގެ ބާރުގެދަށަށް ގެނައުން ވެގެންދާނީ މި ހަނގުރާމާއިގަ ޔޫކުރެއިންއަށް ލިބިގެންދިޔަ އާދަޔާ ޚިލާފު ބޮޑު ކާމިޔާބީއަކަށް ކަމުގައެވެ. އަދި އިނގިރޭސިވިލާތުގެ ދިފާޢީ ވަޒީރު ބެން ވަލަސް ވިދާޅުވެފައިވަނީ ޚާސޮން ސިޓީ ދޫކޮށް ދާންޖެހުމަކީ ރަޝިއާއަށް މިހަނގުރާމާގައި ކުރިމަތިލާންޖެހުނު ވަރަށްބޮޑު ސްޓެރަޓީޖިކް ފެއިލިއަރއެއް ކަމުގައެވެ.

ޔޫކުރެއިންގެ ޚާރިޖީ ވަޒީރު ޑީމިޓްރޯ ކުލެބަރ ވިދާޅުވެފައިވަނީ ޔޫކުރެއިންއަށް ހަނގުރާމަ ކާމިޔާބުވަމުން ދާކަމަށާއި، އެހެންނަމަވެސް ހަނގުރާމަ އަދި އޮތީ ކުރިޔަށް ކަމަށެވެ.

މޮސްކޯއިން ފާއިތުވެދިޔަަހު އެގައުމުގެ ބައެއްގެ ގޮތުގައި އިއުލާން ކޮށްފައިވާ ޚާސަން ސިޓީގެ އިރުމަތީގެ ބައެއް ސަރަހައްދުތައް އަދިވެސް ވަނީ ރަޝިއާގެ އަސްކަރިއްޔާގެ ބާރުގެ ދަށުގައެވެ.