ރާއްޖޭގެ ސިޔާސީ މަސްރަހުގައި ހޫނުވެފައިވާ، ޗޯގޮސްއާއި ގުޅުންހުރި އެއްވެސް މައުލޫމާތު ރައްޔިތުންގެ މަޖިލީހާއި ހިއްސާ ކޮށްފައި ނުވާކަމަށް ރައްޔިތުންގެ މަޖިލީހުގެ ރައީސާއި އަދި އެމަޖިލީހުގެ ބައެއް މެމްބަރުން ދައްކަވާފައިވާ ވާހަކަތައް ސަރުކާރުން ދޮގު ކޮށްފިއެވެ.
ޗާގޮސް މައްސަލާގައި ސަރުކާރުގެ ވަޒީރުން ފެންވަރުގައި އެއްވެސް މައުލޫމާތެއް ހިއްސާ ކޮށްފައި ނުވާތީ ގިނަބަޔަކު ޝަކުވާ ކުރަމުން ދަނިކޮށް، ރޭ ފޮރިން މިނިސްޓަރ ޝާހިދާއި ބަންޑާރަނައިބު އިބުރާހިމް ރިއްފަތު ބޭއްވެވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ރިއްފަތު ވިދާޅުވީ މޮރިޝަސްއިން ރާއްޖެއާއި ދެކޮޅަށް ހުށަހަޅާފައިވާ މައްސަލައިގެ މައުލޫމާތު މިއަހަރު ރައްޔިތުންގެ މަޖިލީހާ ހިއްސާ ކޮށްފައި ވާނެ ކަމަށެވެ.
ރިއްފަތު ވިދާޅުވި ގޮތުގައި، މިމައްސަލާގެ މައުލޫމާތު ރައްޔިތުންގެ މަޖިލީހާއި ހިއްސާ ކޮށްފައިވަނީ މިއަހަރުގެ ފެބްރުއަރީމަހުގެ 17 ވަނަ ދުވަހު ކަމަށެވެ. އަދި ރިއްފަތުވަނީ މަޖިލީހާއި ހިއްސާކުރެއްވި ލިޔެކުޔުންތަކުގެ ސިއްރު ހިފަހައްޓަވާ ދެއްވުމަށްވެސް އެދިވަޑައިގެންފައެވެ.
ރިއްފަތު ވިދާޅުވީ ޗާގޮސްއަކީ މޮރިޝަސްގެ ބައެއްކަމަށް ރާއްޖެއިން ގަބޫލުކޮށް، އެނިންމުމާ އެއްގޮތަށް ޔޫއެންގައި ރާއްޖެއިން ވޯޓު ދިނުމަކީ މިމައްސަލައާއި ގުޅޭގޮތުން ކޯޓުތަކުގައި ރާއްޖެއާއި މިރޮޝަސްއާއި ދެމެދު ހިގަމުންދާ މައްސަލައަށް އެއްވެސް އަސަރެއް ކުރާނެ ކަމެއް ނޫންކަމުގައެވެ. އަދި ވިދާޅުވީ މިހާތަނަށްވެސް ސަރުކާރުން މަސައްކަތް ކޮށްފައިވާނީ ރާއްޖޭގެ އެންމެ މަތީ މަސްލަހަތުތައް ހިމާޔަތް ކޮށްގެން ކަމަށާއި ކުރިޔަށް އޮތް ތަނުގައިވެސް ސަރުކާރުން މަސައްކަތް ކުރާނީ އެގޮތުގެމަތިން ކަމަށެވެ.
އޭނާ ވިދާޅުވި ގޮތުގައި ރައްޖޭގެ ބޭސްލައިނުން 200 ނޯޓިކަލް މޭލު ބޭރަށް ދަމާލީމަ ދެގައުމުގެ ކަނޑުގެ ސަރަހައްދުން ފުށުއަރާ ކަމުގައެވެ. އޭނާ އިތުރަށް ވިދާޅުވި ގޮތުގައި ދެގައުމަށް އެއްބަސް ނުވެވިގެން އުޅޭ، ފުށުއަރާ ސަރަހައްދުން ޑިސްޕިއުޓު (ޚިޔާލުތަފާތުވުން) އޮތް ސަރަހައްދަކީ 4687 އަކަ ކިލޯ މީޓަރުގެ ސަރަހައްދެއްގެ ކަމުގައެވެ.
މިކަން މިގޮތަށްވާން މިޖެހޭ އެންމެ ބޮޑު އެއް ސަބަބަކީ މޮރިޝަސްއިން މޮރިޝަސްގެ ޚާއްސަ އިގްތިސާދީ ސަރަހައްދުތަކުގެ ބޭސްލައިންތައް މިބަލަނީ މޮރިޝަސްގެ އިގްތިސާދީ ސަރަހައްދުގައި އޮންނަ، ނޫނީ ޗާގޮސް ހިމެނޭގޮތަށް މިއޮންނަ ލޯ ޓައިޑް އިލެވޭޝަނެއް ނުވަތަ ތިލަ ދިޔަވަރުގަ ފެންނަން އޮންނަ ބްލެންހެމް ރީފް ކިޔާ ފަރަކުން އެ ބޭސްލައިންތައް ބަލަން ފަށާތީ.
ރިއްފަތު ވިދާޅުވިއެވެ.
ރިއްފަތު ވިދާޅުވި ގޮތުގައި ރާއްޖޭގެ ސްޓޭންޑަކީ، ނުވަތަ އާރގިއުމެންޓަކީ، ބައިނަލްއަގުވާމީ ކަނޑުގެ މުވާހަދާގެ އަލީގައި، އާބިޓްރޭޝަންގެ ނިންމުންތަކާއި، އަދި އައިސީޖޭގެ ނިންމުންތަކަށް ބަލާއިރުގަ ތިލަދިޔަވަރު ފެންނަން އޮންނަ ތަނެއް ނުވަތަ ލޯ ޓައިޑް އެލިވޭޝަނަކީ ބޭސްލައިން އެކަށައެޅުމަށްޓަކާ ބަލައިގަންނަން ޖެހޭ އެއްޗަކަށް ނުވާކަމަށް ކަމުގައެވެ.
ރިއްފތު ވިދާޅުވި ގޮތުގައި ފުރަތަމަ ދުވަހުވެސް އަދި މައްސަލާގެ އަޑުއެހުންތައް ނިމިގެން ދިޔައިރުވެސް ރާއްޖެއިން ތަކުރާރުކޮށް ދަށްކަމުން ދިޔަ ވާހަކަކައަކީ މޮރިޝަސްއިން އެބުނާ ގޮތަށް ބްލެންހެމް ރީފުން މޮރިޝަސްގެ ބޭސްލައިން ބެލުމަކީ އެއީ ބައިނަލްއަގުވާމީ ގާނޫނީ ހަމަތަކަށް ބަލާއިރުގަ އަދި ބައިނަލްއަގުވާމި ކޯޓުތަކުން ނިންމާފައިހުރި ނިންމުންތަކަށް ބަލާއިރުވެސް ހަމަޖެހޭކަމަށް ނުފެންނަ ވާހަކަ ކަމަށެވެ.
