އެމްއައިބީގެ 'އުޖާލާ ދިރިއުޅުން' ފެސިލިޓީ މެދުވެރިކޮށް ސްޓެލްކޯގެ ސޭލްސް ސެންޓަރުން ކަސްޓަމަރުންނަށް ވިޔަފާރި ކުރެވޭނެގޮތް ސްޓެލްކޯއިން ހަދައިފިއެވެ.
ސްޓެލްކޯއިން ބުނީ، ކަރަންޓުލުމަށް ބޭނުންވާ ހުރިހާ ސާމާނައި، ކަރަންޓު ވައިރުކުރުމަށް ބޭނުންވާ އާލާތްތަކާއި، މިނޫނަސް ކަރަންޓާއިގުޅޭ ތަފާތު ބްރޭންޑު ތަކުގެ އުފެއްދުންތައް ކަސްޓަމަރުންނަށް އުޖާލާ ދިރިއުޅުން ސްކީމްގެ ދަށޫން ނެގޭނެކަމަށެވެ.
އުޖާލާ ދިރިއުޅުން ސްކީމަކީ އާންމު ދިރިއުޅުމުގައި ބޭނުންކުރާ މުދާ ހެޔޮއަގުގައި މަހުން މަހަށް ބަހާލައިގެން ފައިސާ ދައްކާގޮތަށް އިސްލާމީ ޝަރީއަތުގެ ހަމަތަކުގެމަތިން ދޭ ފެސިލިޓީއެކެވެ. މިފެސިލިޓީގެ ދަށުން ފަރުނީޗަރު، އިލެކްޓްރޯނިކްސް، ފޯނުފަދަ މުދާ ކްރެޑިޓް އުސޫލަށް ނެގޭނެއެވެ.
މިސްކީމްގެ ދަށުން އެމްއައިބީން ގަބޫލުކުރާ ތަނެއްގައި ވަޒީފާ އަދާކުރާ 18 އަހަރުން މަތީގެ ކޮންމެ ދިވެއްސަކަށް މުދާ ގަނެވޭނެކަމަށް އެބޭންކުން ބުނެއެވެ. މި ސްކީމުގެ ދަށުން ގިނަވެގެން ނެގޭނީ 400000 ރުފިޔާގެ މުދަލެވެ. މިފަދަ ސްކީމްތަކުގެ ސަބަބުން ކަސްޓަމަރުންގެ ތެރެއިން އެއްފަހަރާ ފައިސާދައްކަން ދަތިވާ ފަރާތްތަކަށް ގިނަ ފަސޭހަތައް ލިބިގެންދާނެކަމަށް އެބޭންކުން ޤަބޫލުކުރެއެވެ.
އެމްއައިބީން މަޢުލޫމާތުދޭ ގޮތުގައި ފައިނޭންސިން އެހެން ސްކީމްތަކާ ޚިލާފަށް މި ސްކީމުގައި ފައިސާ ދައްކަން ބޭނުންވާ މުއްދަތު 18 މަހާއި 48 މަހާ ދެމެދުގެ މުއްދަތެއްގެ ތެރެއިން ކަސްޓަމަރު ބޭނުންވާ މުއްދަތެއް ޚިޔާރުކުރެވޭނެކަމަށެވެ. އަދި މި ސްކީމުގެ ދަށުން ލިބޭ ފައިސާގެ ލިމިޓް 6 މަސް ވަންދެން ބޭނުންކުރެވޭނެ ކަމަށާއި، މުދާ ދޫކުރާ މުއްދަތުގައި ބޭންކަށް ހަމައެކަނި ކޯޓޭޝަން ހުށަހެޅުމުން ދުވަހުން ދުވަހަށް މުދާ ލިބޭނެކަމަށްވެސް އެމްއައިބީން ބުންޏެވެ.
