އިންތިޙާބުތަކާއި ދިމާކޮށް ދޮގު ވައުދުތަަށްވާ ފަރާތްތަކުގެ ވާހަކަ ހުކުރު ޚުތުބާތަކުގައި އަންނާނެ ނަމޭ ހިތަށްއަރާ ކަމުގައި ރައްޔިތުންގެ މަޖިލީހުގެ ކުޑަހުވަދޫ ދާއިރާގެ މެމްބަރު އަހުމަދު އާމިރު ވިދާޅުވެއްޖެއެވެ.

ކޮންމެ ހުކުރު ދުވަހަކުވެސް އަންނަ ޚުތުބާތަކުގައި އެކި މައުޟޫތަކަށް އާންމުންނަށް ގިނަ މެސެޖްތައް ދެމުންދާއިރު ޚުތުބާތަކަކީ އެއިރެއްގައި ފާހަގަކޮށްލެވޭ ކަންކަމަށް ބަލައި ގެނެދޭ މުހިންމު ނަސޭހަތެއްވެސް މެއެވެ.

ހުކުރު ހުތުބާގެ މައުޟޫތަކުގެ ތެރެއިން ރާއްޖޭގެ ސިޔާސީ ކަންކަމުގައި ހިނގާ ބައެއް ކަންކަމަށް އިޝާރާތް ކުރައްވައި އާމިރު ވިދާޅުވީ ހުކުރު ހުތުބާތަކުގައި އިންތިޚާބު ތަކާއި ދިމާކޮށް ދޮގު ވައުދުތައްވާ މީހުންގެ ވާހަކަ ގެނައުމީ މުހިންމު ކަމެއްކަމުގައި ދެކޭކަމަށެވެ. އެއީވެސް މަކަރާއި ހީލަތުގެ ތެރެއިން ނޫނީ ނުވާނެ ކަމެއްކަމަށްވެސް އާމިރު ވިދާޅުވިއެވެ.

އިންތިޙާބުތަށް ކާމިޔާ ކުރުމަށް ދޮގު ވައުދުތަަށްވާ ފަރާތްތަކުގެ ވާހަކަވެސް ހުކުރު ޚުތުބާތަކުގަ ލިޔެލަދޭނެ ދުވަހެއް އަންނާނެނަމައޭ ހިތައްއަރާ. އެއީ މަކަރާއި ހީލަތުގެ ތެރެއިން ވާކަމަކަށް ނުވަނީބާ؟؟

– އިސްލާމިކް މިނިސްޓްރީ ޓެގްކޮށް އާމިރު ކުރެއްވި ޓުވީޓުގައި ވިދާޅުވިއެވެ.

އިންތިޙާބުތަށް ކާމިޔާ ކުރުމަށް ދޮގުވައުދުތަަށްވާ ފަރާތްތަކުގެ ވާހަކަވެސް ހުކުރު ޚުތުބާތަކުގަ ލިޔެލަދޭނެދުވަހެއް އަންނާާނެނަމައޭ ހިތައްއަރާާ.. އެއީ މަކަރާއި ހީލަތުގެ ތެރެއިން ވާކަމަކަށް ނުވަނީބާ؟؟ @MVIaffairs @Dr_AhmedZiyad @AhmedZahirAli @sunbrk @Mihaarunews

— Ahmed Amir (AIM) (@AhmedAmirAim) November 4, 2022

ތަފާތު އެކި އިންތިޚާބުތަކާއި ދިމާކޮށް ސިޔާސީ ފަރާތްތަކުން ވަމުންދާ ވައުދުތައް ނުފެއްދި، އެކަންކަން އޮޅުވާލަމުން ދިއުމަކީ މިފަހުން ރާއްޖޭގައި އާންމު ކަމަކަށްވަނީ ވެފައެވެ. ޚާއްސަކޮށް ރިޔާސީ އިންތިޚާބާއި، މަޖިލިސް އިންތިޚާބުތަކުގައި ހުސްވައުދުވެ ދައުރު ހަމަވާއިރުވެސް ވައުދުތައް ނުފެއްދޭކަމީ ގިނަބަޔަކު ފާހަގަކުރާ ކަމެކެވެ.

އާމިރު މިހެން ވިދާޅުވެފައިވާއިރު މިއަދުގެ ހުކުރު ހުތުބާ ޚާއްސަކޮށްފައިވަނީ މަކަރާއި ހީލަތުން މުދާ ވިއްކުމާއި ގުޅޭގޮތުންނެވެ. މިއަދުގެ ޚުތުބާގައި ބުނެފައިވަނީ އިސްލާމް ދީނުގައި މީސްތަކުންނަށް ގެއްލުން ލިބޭ ރިބާގެ ދޮރުތައް ބަންދުކޮށް، ވިޔަފާރިގެ ދޮރުތައް ހުޅުއްވައިދެއްވާފައި ވަނީ ޙަލާލު ގޮތުގައި ވިޔަފާރިކޮށްގެން އާމްދަނީ ހޯދުމަށް ޓަކައެވެ. ވިޔަފާރި ކުރާނެ އުސޫލުތަކާއި، ވިޔަފާރީގެ ގޮތުގައި ކަންކަން ކޮށްގެން ނުވާނެ ގޮތްތައް އިސްލާމްދީނުގައި ބަޔާން ކުރައްވާފައިކަން ޚުތުބާގައި ފާހަގަ ކޮށްފައި ވެއެވެ. އަދި މަކަރާއި ހީލަތް ހެދުމާއި، އޮޅުވާލުން ވަނީ ހަރާމް ކުރައްވާފައި ކަން ޚުޠުބާގައި ބަޔާން ކޮށްފައި ވެއެވެ.