ޢަރަބިއްޔާ ސްކޫލުގެ އައު ޢިމާރާތުގެ މަޝްރޫޢު އަންނަ އަހަރުގެ ބަޖެޓުގައި ހިމެނިފައި ނެތީ، އިދާރީ އޮޅުމަކުންކަމަށް އެޑިއުކޭޝަން މިނިސްޓަރ ޑރ.އާއިޝަތު ޢަލީ ވިދާޅުވެއްޖެއެވެ.
އަންނަ އަހަރަށް ލަފާކޮށް ފިނޭންސް މިނިސްޓަރ ރައްޔިތުންގެ މަޖިލީހަށް ހުށައެޅުއްވި 42.68 ބިލިއަން ރުފިޔާގެ ބެޖެޓުގައި ޢަރަބިއްޔާ ސްކޫލުގެ އައު ޢިމާރާތުގެ މަސައްކަތަށް ފައިސާ ހިމަނާފައިނެތުމުން އެކަމުގެ ކަންބޮޑުވުމާއެކު އާންމުގެ ސަމާލުކަމަށް ފުރަތަމަ ގެނައީ މަހިބަދޫ ދާއިރާގެ މެންބަރު އަޙްމަދު ޠާރިޤްއެވެ. މިއާއެކު ގިނަ ބަޔަކު އަންނަނީ ސަރުކާރުން ޢަރަބި ތަޢުލީމަށް އިސްކަން ނުދޭކަމަށް ބުނެ ފާޑުކިޔަމުންނެވެ.
މިކަމާއި ގުޅިގެން އެޑިއުކޭޝަން މިނިސްޓަރ ޑރ.އާއިޝަތު ޢަލީ ރާއްޖޭގެ މީޑިއާތަކާއި ވާހަކަ ދައްކަމުން ވިދާޅުވެފައިވަނީ ބަޖެޓުގައި ޢަރަބިއްޔާގެ އައު ޢިމާރާތް ހިމެނިފައި ނެތީ އިދާރީ އޮޅުމަކުންކަމަށެވެ. ބަޖެޓުގައި ހިމެނުމަށް ޢަރަބިއްޔާގެ ފައިސާގެ ޚަރަދުތައް ފިނޭންސް މިނިސްޓްރީއަށް ފޮނުވާފައިވާކަން މިނިސްޓަރ ފާހަގަކުރެއްވިއެވެ. އަދި ބަޖެޓުގައި ޢަރަބިއްޔާ ސްކޫލުގެ މަސައްކަތް ނެތުމުން، އެކަމާއި ފިނޭންސް މިނިސްޓްރީއާއި މަޝްވަރާ ކުރަމުން އަންނަކަަމަށްވެސް މިނިސްޓަރ ވިދާޅުވެފައިވެއެވެ.
އަންނަ އަހަރުގެ ބަޖެޓުގައި އަލްމަދަރުސަތުލް އަރަބިއްޔަތުލް އިސްލާމިއްޔާގެ އައު އިމާރާތ ހިމެނިފައި ނެތްނަމަވެސް އެ މަސައްކަތް މިހާރު ވަނީ އަމީން ކޮންސްޓްރަކްޝަނާއި ހަވާލުކޮށްފައެވެ. 40 ކްލާސް ރޫމާއި، މަލްޓިޕާޕަސް ހޯލަކާއި 4 ލިފްޓުގެ އިތުރުން ސްކޫލެއްގައި ހުންނަންޖެހޭ ހުރިހާ ވަސީލަތް ޤާއިމްކުރާ ގޮތަށް އެ މަސައްކަތް 420 ދުވަހުގެތެރޭގައި ނިންމަން ޖެހެއެވެ. އެއީ ޖަމާލުއްދީން ސުކޫލަށް އިތުރު ކުރާ އައު ޢިމާރާތާއެކުއެވެ.
އަރަބިއްޔާ ސްކޫލް އައު އިމާރާތުގެ މަސައްކަތާއި، ޖަމާލުއްދީން ސްކޫލް އެނެކްސް އިމާރާތުގެ ޑިޒައިން އެންޑް ބިލްޓްގެ މަސައްކަތް އެކުންފުންޏާ ހަވާލުކުރީ 168 މިލިއަން ރުފިޔާއަށެވެ.
ޢަރަބިއްޔާ ހިންގަމުން އައި ޢިމާރާތުގައި ރެނދުލައި ރައްކާތެރި ނޫންކަމަށް ނިންމައި، އެ ސްކޫލުގެ ދަރިވަރުން މިހާރު ކިޔަވަމުން އަންނަނީ ފޮރިން މިނިސްޓްރީ ކުރިން ހިންގަމުން އައި ޢިމާރާތުގައެވެ.
