ރާއްޖޭގެ އިޤްތިސާދު ކުރިއަރަމުން އަންނަނީ ދުނިޔޭގެ އިޤްތިސާދީ ދުވެއްޔަށްވުރެ ހަލުވި މިނެއްގައި ކަމުގައި ފިނޭންސް މިނިސްޓަރު އިބުރާހިމް އަމީރު ވިދާޅުވެއްޖެއެވެ.

2023 އަށް ލަފާކޮށް ދައުލަތުން ހުށަހަޅާ ބަޖެޓް މިއަދު ރައްޔިތުންގެ މަޖިލީހަށް ހުށަހަޅުއްވަމުން ފިނޭންސް މިނިސްޓަރު އިބުރާހިމް އަމީރު ވިދާޅުވި ގޮތުގައި އިންޓަނޭޝަނަލް މަނިޓަރީ ފަންޑުން ދުނިޔޭގެ އިޤްތިސާދާމެދު ދެކެނީ ބަނަކޮށް އަދި ޔަޤީންކަން ކުޑަކޮށް ކަމަށެވެ.

އޭނާ ވިދާޅުވި ގޮތުގައ އައި.އެމް.އެފް އިން ދެކޭ ގޮތުގައި ދުނިޔޭގެ އިޤްތިސާދު އަންނަ އަހަރު ކުރިއަރާނީ 2.7 އިންސައްތައިންނެވެ. މީގެ އިތުރުން، އެކި ގައުމުތަކުގައި އިންފްލޭޝަން ރޭޓް އަންނަނީ މަތިވަމުން ކަމަށާއި، އެމެރިކާގެ އިންފްލޭޝަން ރޭޓް ވަނީ ވޭތުވެދިޔަ 40 އަހަރު ނުދާހާ މައްޗަށް ގޮސް، 8.2 އިންސައްތައަށް މަތިވެފައި ވާއިރު، ވިލާތުގެ ގައުމުތަކުގެ އިންފްލޭޝަން ރޭޓުހުރީ 9.9 އިންސައްތައިގައި ކަމުގައިވެސް ރައްޔިތުންގެ މަޖިލީހަށް ބަޖެޓް ހުށަހަޅުއްވަމުން ފިނޭންސް މިނިސްޓަރު ވިދާޅުވެފައި ވެއެވެ.

ކަންމިހެންހުރުމާއިއެކު، އެމެރިކާއާ، ވިލާތުގެ ޤައުމުތަކުން ދަނީ އިންފްލޭޝަން ކޮންޓްރޯލްކުރުމަށް ފަހުގެ ތާރީޚެއްގައި އިންޓަރެސްޓް ރޭޓް މަތިނުކުރާ މިންވަރަކަށް މަތިކުރަމުން ކަމަށާއި، ތަރައްޤީވެފައިވާ ޤައުމުތަކުން މި ފަދައިން އަމަލުކުރުމުގެ ސަބަބުން ތަރައްޤީވަމުން އަންނަ ޤައުމުތަކަށް ކުރިމަތިވެފައިވާ ގޮންޖެހުންތައް ބޮޑުކަމުގައި އޭނާ ވިދާޅުވެފައިވެއެވެ.

މީގޮތުން، ތެލާއި ހަކަތައިގެ އަގު މައްޗަށް ދިއުމުގެ ސަބަބުން ތެލާއި ހަކަތަ އިމްޕޯޓްކުރާ ޤައުމުތަކަށްވަނީ އިތުރު ހިރާސްތަކެއް ކުރިމަތިވެފައިކަމަށް ވިދާޅުވަމުން ފިނޭންސް މިނިސްޓަރު ވިދާޅުވި ގޮތުގައި މީގެ ސަބަބުން ދުނިޔޭގެ އިޤްތިސާދަށް ކޮވިޑް-19ގެ ކުރީގެ ލެވެލްއަށް ދިއުމަށް އޮތް ރާސްތާ ދިގުވެފައި ވާކަމުގައެވެ. ދުނިޔޭގެ އިޤްތިސާދުގައި ހުރި ގޮންޖެހުންތަކާއި، އެކި ޤައުމުތަކުގެ މާލީ ހާލަތަށްހުރި ހިރާސްތަކުގެ އަސަރު އަޅުގަނޑުމެންނާ އަވަށްޓެރި ބައެއް ޤައުމުތަކުންވެސް ފެނިއްޖެ ކަމުގައިވެސް ބަޖެޓް ބަޔާނުގައި ފިނޭންސް މިނިސްޓަރު ވިދާޅުވެފައި ވެއެވެ.

މިއަދު މަޖިލިސް ޖަލްސާގައި ފިނޭންސް މިނިސްޓަރު އަމީރު ވިދާޅުވީ ކަން މިހެން ހުރިނަމަވެސް، ރާއްޖޭގެ އިޤްތިސާދުގެ ވާހަކަ ތަފާތު ކަމުގައެވެ. މިގޮތުން ރާއްޖޭގެ އިޤްތިސާދީ ކަންކަން މެނޭޖްކުރުމުގައި ރާއްޖޭގެ އިޤްތިސާދުގެ ވިންދު ދަމަހައްޓައި، ފަތުރުވެރިކަމާއި އެހެނިހެން ސިނާއަތްތަކުގެ ދިރުން މަތިކުރުމަށް ކުރެވޭ މަސައްކަތތަކުގެ ނަތީޖާއެއްގެ ގޮތުން، ރާއްޖެއަށް ފަތުރުވެރިން ޒިޔާރަތްކުރުމާއި، ސިނާއަތްތަކުގެ ކުރިއެރުން 2021 ވަނަ އަހަރު ބޮޑުތަނުން އިތުރުވެފައިވާކަން ފާހަގަ ކުރައްވަމުން ފިނޭންސް މިނިސްޓަރު ވިދާޅުވި ގޮތުގައި 2022 ވަނަ އަހަރުވެސް މި ފަތުރުވެރިން ރާއްޖެއަށް ޒިޔާރަތްކުރާ ނިސްބަތް ދަނީ އެއްވާނެއްގައި މައްޗަށް ކަމުގައެވެ.

އެހެންކަމުން، ރާއްޖޭގެ އިޤްތިސާދަށް ހުރި ހިރާސްތައް މެނޭޖްކުރަމުން، އިޤްތިސާދުގެ ކުރިއެރުން ދެމެހެއްޓޭނަމަ، ރާއްޖޭގެ އިޤްތިސާދީ ހަމަޖެހުމާއި ސިނާއަތްތަކުގެ ކުރިއެރުމާއި، ރައްޔިތުންގެ ފާގަތިކަން ދެމެހެއްޓޭނެކަމާމެދު ޔަގީންކަން އޮތްކަމުގައިވެސް އޭނާ ވިދާޅުވިއެވެ.