ފާއިތުވި 7 އަހަރު ދުވަހުގެ ތެރޭގައި ސަރުކާރު ހިއްސާވާ ކުންފުނިތަކާއި ގުލުންހުރި 1400އަށް ވުރެ ގިނަ ޝަކުވާ ހުށައަޅަފައިވާކަމަށް އެންޓި-ކޮރަޕްޝަން ކޮމިޝަންގެ ރައީސް އާދަމް ޝާމިލް ވިދާޅުވެއްޖެއެވެ.
ދެ ދުވަހުގެ މުއްތަކަށް ބަނޑޮސް މޯލްޑިވްސްގައި ކުރިއަށްގެންދާ އެންޓި-ކޮރަޕްޝަން ކޮންފަރެންސް ފެށުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން އޭސީސީގެ ރައީސް ޝާމިލް ވިދާޅުވީ 7 އަހަރު ދުވަހުގެ ތެރޭގައި ކުންފުނިތަކާއި ގުޅުންހުރި 1465 ޝަކުވާ އެ ކޮމިޝަނަށް ހުށައަޅާފައިވާކަމަށެވެ. އެ ޝަކުވާތަކާއި ގުޅިގެން 234 ރިކޮމެންޑޭޝަން ނުވަތަ އެންގުން އޭސީސީން ކުންފުނިތަކަށް އަންގާފައިވާކަމަށް ޝާމިލް ވިދާޅުވިއެވެ.
އޭސީސީން ދިން ލަފާތަކަށް ކުންފުނިތަކުން އަމަލުކުރޭތޯ ބެލި ބެލުމުން އެނގުނީ އެންމެ ބޮޑު ގޮންޖެހުމަކީ އެކަން ބެލޭނެ ނިޒާމެއް މީގެ ކުރިން ނެތުންކަން ފާހަގަކުރައްވާ ޝަމިލް ވިދާޅުވީ، އޭސީސީއަށް އައު މެންބަރުން ވަޑައިގެން އެންމެ ފުރަތަމަ ކުރެއްވި އެއް މަސައްކަތަކީމޮނިޓަރިން އެންޑް އިވެލުއޭޝަން ނިޒާމެއް ޤާއިމްކޮށް އެކަމަށް މުވައްޒަފުން އައްޔަންކުރުންކަމަށެވެ.
އެހެންކަމުން އަޅުގަނޑުމެން މިމަސައްކަތާއި ހަވާލުވެ އެންމެ ފުރަތަމަވެސް ކުރި އެއްކަމަކީ އޭސީސީގައި މޮނިޓަރިން އެންޑް އިވޮލުއޭޝަން ޑިޕާޓްމަންޓެއް އުފެއްދުން. މިހާރު މިޑިޕާޓްމަންޓުގައި ވަކި މުވައްޒިފުން ތިއްބަވައިގެން އެމަސައްކަތް ފައްޓަވައިފި.
ޝާމިލް ވިދާޅުވީ، ކުންފުނިތަކާއި ގުޅޭ މައިގަނޑު 3 މައްސަލައެއް ފާހަގަވާކަމަށެވެ. އޭގެ ތެރޭގައި، މުވައްޒިފުން ނަގާ ގޮތާއި، މަސައްކަތްތަކާއި ޚިދުމަތްތައް ހޯދުމުގައި އަމަލު ކުރާގޮތާއި، ސީއެސްއާރުގެ މަސައްކަތްތައް ހިންގާ ގޮތުގައި ކޮރަޕްޝަން އެކުލެވޭކަން ފާހަގަކުރެއްވިއެވެ.
އެންޓި ކޮރަޕްޝަން ކޮންފަރެންސް 2022ގެ މައުޟޫއެއްގެ ގޮތުގައި މިފަހަރު އޭ.ސީ.ސީން ކަނޑައަޅާފައިވަނީ "ސަރުކާރު ހިއްސާވާ ކުންފުނިތަކުގެ ނަޒާހާތްތެރިކަން"އެވެ. މި ކޮންފަރެންސްގެ މައިގަނޑު މަޤްޞަދަކީ ސަރުކާރު ހިއްސާވާ ކުންފުނިތަކާ، އެސް.އޯ.އީތަކާގުޅުންހުރި އެކި މުއައްސަސާތައް އެއް ތަނަކުން ބައްދަލުވެ، އެސް.އޯ.އީތަކުގެ ހިންގުމުގެ އޮނިގަނޑުގައި ހުރި މައްސަލަތަކާ، އެސް.އޯ.އީތަކާގުޅޭގޮތުން ހުރި ޤާނޫނާއި ޤަވާއިދުތައް ތަންފީޒުކުރުމަށް ދިމާވާ ގޮންޖެހުންތަކާ ގުޅޭގޮތުން މަޝްވަރާކުރުންކަމަށް އޭ.ސީ.ސީން ބުންޏެވެ.
