އޮޑިޓާ ޖެނަރަލް އޮފީހުގެ އަންނަ އަހަރުގެ ބަޖެޓުގެ ގޮތުގައި 93.4 މިލިއަން ރުފިޔާގެ ބަޖެޓެއް ރައްޔިތުންގެ މަޖިލީހުން ފާސްކޮށްފިއެވެ.
އޮޑިޓް އޮފީހުން އަންނަ އަހަރަށް ހުށަހެޅީ 95 މިލިއަން ރުފިޔާގެ ބަޖެޓެކެވެ. މާލިއްޔަތު ކޮމިޓީން އޮޑިޓް އޮފީހުގެ ބަޖެޓު ކުޑަކުރީ ފިނޭންސް މިނިސްޓަރު އިބްރާހީމް އަމީރުއާ މަޝްވަރާ ކުރެއްވުމަށްފަހު މިނިސްޓްރީއާއި އޮޑިޓާ ޖެނަރަލްގެ އޮފީހުން އެއްބަސްވާ ގޮތަށް ފަހުން ބަދަލުތައް ގެނެސްގެންނެވެ.
އޮޑިޓް އޮފީހުން ހުށަހެޅި ބަޖެޓްގެ 62 މިލިޔަން ރުފިޔާއަކީ ރިކަރެންޓް ޚަރަދަށް ހިނގާނެކަމަށް ބެލެވޭ ފައިސާއެވެ. އަދި 32 މިލިޔަން ރުފިޔާއަކީ ކެޕިޓަލް ޚަރަދުތަކެވެ. މިދިޔަ އަހަރަށް އޮޑިޓް އޮފީހަށް ފާސްކޮށްފައިވަނީ 90 މިލިޔަން ރުފިޔާގެ ބަޖެޓެކެވެ. މިއަދު ނެގުނު ވޯޓުގައި އަންނަ އަހަރުގެ ބަޖެޓުގެ ގޮތުގައި 93.4 މިލިއަން ރުފިޔާގެ ބަޖެޓެއް ފާސް ކުރުމަށް 44 މެމްބަރުން ވަނީ ވޯޓު ދެއްވާފައެވެ.
ރައްޔިތުންގެ މަޖިލީހުގެ މާލިއްޔަތު ކޮމިޓީން ދިރާސާކުރަމުން އަންނަ އޮޑިޓަރ ޖެނެރަލްގެ އޮފީހުގެ ބަޖެޓަކީ ދައުލަތުގެ ބަޖެޓާއި ވަކިން މަޖިލީހަށް ހުށަހަޅައި ފާސްކުރަންޖެހޭ ބަޖެޓެކެވެ. ނަމަވެސް ދައުލަތުގެ ބަޖެޓް މަޖިލީހުން ފާސްކުރާއިރު އޮޑިޓް އޮފީހުގެ ބަޖެޓުވެސް ފާސްކޮށް ދައުލަތުގެ ބަޖެޓްގައި ހިމަނަންޖެހެއެވެ.
