އަންހެން ނޫސްވެރިއަކަށް ޖިންސީ ފުރައްސާރަ ކުރި މޯލްޑިވްސް މީޑިއާ ކައުންސިލް (އެމްއެމްސީ)ގެ މެންބަރު މުހައްމަދު ޝާފިއު، އެމްއެމްސީން ސަސްޕެންޑް ކޮށްފިއެވެ.
ޝާފިއު ސަސްޕެންޑް ކޮށްފައިވަނީ ނޫސްވެރިންނަށް ހާއްސަ ކޮށްގެން އިންޑިއާގައި މި ފަހުން ބޭއްވި ތަމްރީން ޕްރޮގްރާމްގައި ކައުންސިލުގެ ފަރާތުން ބައިވެރިވި ޝާފިއު، އެ ދަތުރުގައި އަދި އޭގެ ފަހުން "ވަގުތު" ނޫހުގެ ނޫސްވެރިޔަކަށް ޖިންސީ ފުރައްސާރަ ކުރި ކަމަށް ތުހުމަތުކުރާ މައްސަލައެއްގައެވެ.
ވަގުތު ނޫހުން ހުށަހެޅި މައްސަލަ ވަކި ގޮތަކަށް ނިމެންދެން ކައުންސިލްގެ މަސްއޫލިއްޔަތުތަކުން އޭނާ އެކަހެރި ކުރުމަށް ވަނީ ފާސްކޮށްފައެވެ. ކައުންސިލްގެ މަސްއޫލިއްޔަތުތަކުގެ އިތުރުން އެމްއެމްސީގައި ޝާފިއު ހަރަކާތްތެރިވާ ދެ ކޮމިޓީއެއްގެ މަސްއޫލިއްޔަތުތަކުން އޭނާ ވަގުތީ ގޮތުން ދުރުކުރަން ވެސް ފާސްކޮށްފައެވެ. އެއީ އިނާމު ކޮމިޓީ އާއި ޝަކުވާ ބަލާ ކޮމިޓީއެވެ.
އެމްއެމްސީން ވަނީ އެ މައްސަލަ ބެލުމަށް ފަސް މެމްބަރުންގެ ކޮމިޓީއެއް ނަގައި، މައްސަލަ ހަތް ދުވަހުގެ ތެރޭގައި ބެލުމަށް ނިންމައިފައެވެ.
މިމައްސަލާގައި އިއްޔެ "ވަގުތު" އިން ނެރުނު ބަޔާނެއްގައި ބުނީ މީޑިއާ ކައުންސިލްގެ މެންބަރު ޝާފިއު ތަކުރާރުކޮށް އަންހެން ނޫސްވެރިޔަކަށް މެސެޖުކޮށް އެ މުވައްޒަފުގެ ޒާތީ މައުލޫމާތުތަކާއި ގުޅޭގޮތުން ސުވާލުކުރަމުން އަންނަ ކަމަށެވެ. އަދި މިއީ ކަންބޮޑުވުން އޮތް މައްސަލައަކަށްވާތީ މިމައްސަލަ ވަގުތުން ވަނީ ފުލުހުންނަށްވެސް ހުށަހަޅާފައެވެ.
