ޗައިނާގެ ނުފޫޒުގަދަ ރައީސް ޝީ ޖިންގޕިންގ އެގައުމުގެ ރައީސްކަމުގެ 3 ވަނަ ދައުރަކަށް، ވެރިކަންކުރާ ކޮމިއުނިސްޓް ޕާޓީން އައްޔަން ކޮށްފިއެވެ.
ޝީ ޖިންގޕިންގ 3 ވަނަ ދައުރަކަށް އިންތިޚާބުވުމާއެކު، އޭނާގެ ނުފޫޒު ޗައިނާގެ ވެރިކަމުގައި ގަދަވެ، އޭނާ ވެގެންދާނީ އެގައުމުގެ ކުރީގެ ރައީސް މާއޯ ޒެޑޮންގއަށްފަހު ޗައިނާގައި ވެރިކަންކުރާ އެންމެ ނުފޫޒުގަދަ ލީޑަރު ކަމުގައެވެ.
ސެންޓްރަލް ކޮމިޓީ އޮފް ޗައިނީސް ކޮމިއުނިސްޓް ޕާޓީ (CCP)އިން ޝީ އެޕާޓީގެ ކުރިޔަށް އޮތް 5 އަހަރަށް ޖެނެރަލް ސެކެޓްރީގެ މަގާމަށް އިންތިޚާބު ކޮށްފައިވަނީ މިއަދުއެވެ. މި އިންތިޚާބާއެކީ، އެތައް އަހަރެއް ވަންދެން އެކުވެރި ޕާޓީތަކާއެކު ބާރުތައް ހިއްސާ ކޮށްގެން ވެރިކަން ކުރަމުންއައި ޗައިނާގައި އަނެއްކާވެސް ވަނީ އެންމެ މީހެއްގެ މުށުތެރެއަށް ވެރިކަމުގެ ހުރިހާ ބާރެއް ޖަމާވެފައެވެ.
ކޮމިއުނިސްޓް ޕާޓީގެ މި ނިންމުމާއެކު، ޝީ 3 ވަނަ ދައުރަކަށް ޗައިނާގެ ރައީސްކަމާއި ރަސްމީކޮށް ހަވާލުވެވަޑައިގަތުން އޮންނާނީ އަންނަ މާރޗްމަހު އޮންނަ، ސަރުކާރުގެ އެނުއަލް ލެޖިސްލޭޓިވް ސެޝަންތަކުގައެވެ.
ސެންޓްރަލް ކޮމިޓީ އޮފް ޗައިނީސް ކޮމިއުނިސްޓް ޕާޓީ (CCP)އިން މިއަދުވަނީ، ޝީގެ ދަށުން މަސައްކަތް ކުރާނެ، 7 މެމްބަރުންގެ މައްޗަށް އެކުލެވޭ ޕޮލިޓްބިއުރޯ ސްޓޭންޑިން ކޮމިޓީ (PSC)ގެ މެމްބަރުންވެސް އިއުލާން ކޮށްފައެވެ. މި ފަރާތްތަކަކީ ޕާޓީގެ ލީޑަރާއި ގާތްކަން އޮންނަ، ބާރުތައް ހިއްސާކުރާ ފަރާތްތަކެވެ.
މިމީހުން ތައާރަފް ކޮށްފައިވަނީ، ޝީ ކުރީގައި ހުންނަވާއިގެން މި ހަތް މީހުންނާއެކީ ސްޓޭޖް މައްޗަށް ވަޑައިގަތުމަށް ފަހުއެވެ. މީގެ ތެރޭގައި ހިމެނޭ ޝަންހާއި ކޮމިއުނިސްޓް ޕާޓީގެ ލީޑަރު ޗީފް ލީ ޤިއާންއަކީ، ޗައިނާގެ މިހާރުގެ ބޮޑުވަޒީރު ލީ ކެޤިއާން އަންނަ މާރޗްމަހު ރިޓަޔަރ ކުރެއްވުމަށްފަހު ބޮޑުވަޒީރުކަމަށް އައްޔަން ކުރެވޭނެ ބޭފުޅާއެވެ.
މިހާރު ކުރިޔަށްދާ ކޮމިއުނިސްޓް ޕާޓީގެ ކޮންގްރެސްގައި ހޮނިހިރުދުވަހު ވަނީ، ވެރިކަންކުރާ ކޮމިއުނިސްޓް ޕާޓީގެ ސެންޓްރަލް ކޮމިޓީގެ 205 ސީނިއަރ އޮފިޝަލުން އިންތިޚާބު ކޮށްފައެވެ. އަދި މި ކޮންގްރެސްގެ ޑެލިގޭޓުންވަނީ، ޕާޓީގެ އަސާސީ ގަވައިދަށް ގެނެވެނު ބަދަލުތަކުގައި ރަބަރ ސްޓޭޕްޖަހާ އަސާސީ ގަވާއިދު ފާސްކޮށްފައެވެ. ޕާޓީގެ އަސާސީ ގަވާއިދަށް ބަދަލު ގެނެސްފައިވަނީ އެގައުމުގެ ރައީސް ޝީގެ ވިސްނުންފުޅަކީ މި އަސާސީ ގަވާއިދުގެ އަސާސްތައްކަމަށް ބަލައިގެންނެވެ.
ކޮމިއުނިސްޓް ޕާޓީގެ ޖެނެރަލް ސެކެޓްރީގެ އިތުރުން، އެގައުމުގެ ރައީސްކަމާއި އަދި އަސްކަރިއްޔާގެ އެންމެ އިސް ވެރިޔާގެ މަގާމުވެސް ފުރުއްވަމުން ގެންދަވަނީ ރައީސް ޝީއެވެ. އަދި އޭނާ މިހާރު އެގައުމުގައި ނިސްބަތް ކުރަނީ ޗައިނާގެ ރޫހާނީ ލީޑަރުގެ ގޮތުގައެވެ.
ޝީ ވަނީ 2018ވަނަ އަހަރު، ޗައިނާގެ ގާނޫނު އަސާސީގައި، ޖެހިޖެހިގެން 2 ދައުރަށްވުރެ އިތުރަށް ވެރިކަން ނުކުރެވޭ ގޮތަށް އޮތް އޮތުން ބަދަލުކުރައްވާ، އޭނާއަށް އުމުރަށް ވެރިކަމުގައި ހުރެވޭނެ މަގު ތަނަވަސް ކުރައްވާފައެވެ.
